2 Timotius 1

Salam

1:1-2

1Dari Paulus, yang Kristus Yesus utus sperti yang Allah su rencana, untuk kastau Allah pu janji tentang hidup yang tong dapat karna satu deng Kristus Yesus.

2Untuk Timotius, yang sa sayang macam sa pu anak sendiri.

Sa doa minta supaya Allah Bapa deng Kristus Yesus, tong pu Tuhan, kas tunjuk De pu baik, kasian deng sayang ke ko, trus kasi damai deng tenang ke ko.

Trima kasi ke Tuhan deng naseat

1:3-14

3Macam dulu sa pu moyang dong bikin, sa juga sunggu-sunggu semba Allah deng hati yang bersi. Mo siang ka malam ka, waktu sa doa, sa slalu ingat untuk doa ko. Sa rasa trima kasi skali ke Allah. 4Waktu sa ingat yang ko mnangis pas tong dua pisa tu, sa rindu skali mo baku dapat deng ko lagi supaya sa bisa rasa snang skali. 5Sa ingat kalo ko percaya Tuhan betul-betul, itu rasa percaya yang pertama tumbu dalam ko pu nene Lois, trus tumbu di ko pu mama Eunike juga. Sa tau skali, pasti percaya itu juga hidup dalam ko pu hati.

6Karna begitu jadi, sa mo kas ingat ko untuk lebi lagi pake hadia rohani yang Allah su kasi ko itu. Hadia yang ko dapat waktu sa taru tangan di ko. 7Karna Roh yang Allah kasi tra bikin tong jadi takut, tapi bikin tong kuat, bisa sayang yang lain, deng bikin hidup tratur. 8Jadi, jang malu untuk kasi saksi tentang kitong pu Tuhan. Jang malu gara-gara sa, orang yang dapa kas penjara karna Tuhan. Tapi ko juga harus mo ikut sengsara untuk Tuhan pu Brita Baik ini. Tahan smua itu deng kuat yang Allah kasi. 9Allah De kas slamat deng panggil kitong supaya tong pu hidup kusus hanya untuk Dia. Allah kas slamat kitong bukan karna apa yang tong bikin, tapi karna memang De su rencana begitu. Dari seblum dunia ada, Allah De su rencana kasi De pu kasian deng sayang ni lewat Kristus Yesus. 10Tapi skarang, Yesus Kristus yang kas slamat kitong su datang, jadi rencana ini baru jadi jlas untuk tong tau. Lewat Brita Baik ini, hukuman mati pu kuasa su dapa kas hancur. Trus, hidup yang trakan perna mati lagi itu, dapa kas tunjuk deng jlas ke kitong. 11Untuk Brita Baik ini suda, sa dapa angkat jadi De pu utusan yang nanti kastau deng ajar ini. 12Itu yang, sa dapat smua susa deng sengsara ini, tapi sa tra malu, karna sa tau sapa yang sa percaya. Sa yakin, kalo De pu kuasa untuk jaga liat apa yang De su kasi ke sa, sampe di hari trakir nanti.

13Smua yang sa su bilang tu, ko pegang baik-baik! Biar itu jadi conto ajaran yang benar untuk ko. Pake percaya deng sayang yang asal dari Kristus Yesus untuk bikin itu smua. 14Pake kuasa dari Roh Allah yang ada dalam kitong pu diri untuk jaga harta yang bagus skali ini, yang Tuhan kas percaya ke kitong.

Paulus dapa susa tapi ada yang tolong

1:15-18

15Timotius, sperti yang ko tau, smua orang di Propinsi Asia kecil#1:15 Propinsi Asia kecil ‒ De pu ibu kota tu Efesus, tempat yang Titus ada tinggal untuk ajar itu. dong su balik kas tinggal saya. Figelus deng Hermogenes, dong dua juga su balik kas tinggal saya. 16Cuma, ada Onesiforus deng de pu satu ruma smua yang su ulang-ulang kas smangat saya. Biar Tuhan kas tunjuk De pu sayang deng kasian ke dong. Onesiforus de juga tra malu untuk datang liat sa waktu sa dapa rante di penjara sini. 17De usaha skali cari sa, sampe de juga datang ketemu sa waktu sa dapa rante di kota Roma sini.

18Sa minta, biar Tuhan kas tunjuk De pu kasian deng sayang ke dia, pas di hari trakir nanti. Onesiforus de juga banyak tolong orang-orang di Efesus situ. Ko yang tinggal di Efesus jadi, pasti ko lebi tau itu daripada saya.

Currently Selected:

2 Timotius 1: MPapua

Highlight

Copy

Compare