1 Korintus 7

Tentang nika

7:1-16

1Trus skarang tentang apa yang kam su tulis ke sa, tentang baik untuk laki-laki kalo de tra kawin. 2Tapi, supaya tra jatu untuk bikin barang kurang ajar, baik kalo laki-laki tidur deng istri sendiri, trus prempuan tidur deng suami sendiri.

3Suami harus kas cukup istri pu hak, begitu juga istri ke de pu suami. 4Karna istri tra pu hak atas de pu badan sendiri, tapi de pu suami. Begitu juga suami tra pu hak atas de pu badan sendiri, tapi de pu istri. 5Kam jang tolak untuk tidur sperti suami-istri, bisa tolak untuk waktu yang tra lama, asal sama-sama stuju, supaya kam ada waktu kusus untuk berdoa. Habis itu kam kembali tidur sperti suami-istri lagi, supaya Iblis jang coba kam karna kam tra kuat tahan napsu. 6Itu sa kastau bukan printa tapi naseat saja. 7Biar begitu, lebi baik kalo smua orang sperti sa. Tapi stiap orang trima de pu hadia rohani dari Allah, yang satu hadia ini, yang lain hadia itu.

8Tapi untuk orang-orang yang tra kawin deng untuk janda-janda, sa kas naseat supaya lebi baik dong tetap hidup sendiri sperti sa. 9Tapi kalo dong tra kuat kuasai diri, lebi baik dong nika daripada hangus karna napsu.

10Untuk orang-orang yang su nika, sa ‒ tidak, bukan sa, tapi Tuhan ‒ kas printa, supaya istri jang cerai dari de pu suami.#Matius 5:32; 19:9; Markus 10:11-12; Lukas 16:18 11Tapi kalo su cerai, de harus tetap hidup trada suami ato de harus kembali deng de pu suami. Juga suami jang kas cerai de pu istri.

12Trus untuk sodara dong yang lain, ini sa yang kas naseat bukan Tuhan, kalo ada sodara sama-sama percaya yang pu istri bukan orang percaya, trus prempuan itu mo hidup sama-sama deng de, sodara itu tra bole kas cerai de. 13Juga kalo ada istri yang pu suami bukan orang percaya, trus laki-laki itu mo hidup sama-sama deng de, de jang kas cerai laki-laki itu. 14Karna suami yang bukan orang percaya tu de dapa bawa dekat ke Allah#7:14 dapa bawa dekat ke Allah ‒ Bahasa Yunani: dapa kas suci. Ini pu arti bukan suami ato istri itu su slamat. Dong blum percaya Yesus Kristus jadi dong blum slamat. Tapi, Allah su pili dong untuk jadi suami ato istri untuk orang percaya itu. Karna dong kawin deng orang yang percaya, jadi dong pu suami ato istri yang percaya itu bisa bantu dong supaya dong bisa percaya, trus dapa kas slamat. lewat de pu istri, trus istri yang bukan orang percaya tu de dapa bawa dekat ke Allah lewat de pu suami. Kalo tra begitu, pasti kam pu anana tu anana yang tra bersi di depan Allah, padahal anana itu su dapa bawa dekat ke Allah. 15Tapi kalo orang tra percaya itu mo cerai, kas biar de cerai. Untuk yang sperti begini ni sodara dong yang percaya tu tra taikat lagi. Tapi Allah panggil kam untuk hidup damei deng tenang. 16Yang istri, mungkin kam bisa kas slamat kam pu suami ka? Ato yang suami, mungkin kam bisa kas slamat kam istri ka?

Orang percaya pu cara hidup yang benar

7:17-24

17Masing-masing orang harus tetap hidup sperti yang Tuhan su kasi untuk de, tetap hidup dalam keadaan sperti waktu de dapa panggil dari Allah. Ini suda aturan yang sa kasi ke smua jemaat. 18Kalo satu orang dapa panggil dalam keadaan sunat, de jang usaha kas hilang tanda-tanda sunat itu. Kalo satu orang dapa panggil dalam keadaan tra sunat, jang de mo sunat. 19Karna sunat ato tra sunat tu tra penting. Yang penting tu setia ikut Allah pu printa-printa.

20Stiap orang harus tetap hidup dalam keadaan sperti waktu de dapa panggil dari Allah. 21Kalo waktu ko dapa panggil tu ko jadi budak, itu trapapa. Tapi kalo nanti ko dapat kesempatan untuk jadi bebas, pake kesempatan itu. 22Karna budak yang Tuhan panggil untuk ikut Tuhan, de tu su jadi Tuhan pu orang bebas. Begitu juga deng orang bebas yang Kristus panggil, de tu Kristus pu budak. 23Kam su dapa bli lunas. Itu jadi, kam jang jadi manusia pu budak lagi. 24Jadi sodara-sodara, biar masing-masing orang tetap hidup di depan Allah dalam keadaan sperti waktu de dapa panggil.

Tentang orang-orang yang blum nika deng janda-janda

7:25-40

25Skarang untuk orang-orang yang blum nika. Sa tra dapat printa apapa dari Tuhan untuk dong. Tapi sa kasi sa pu saran karna sa orang yang bisa dapa percaya karna Tuhan pu baik. 26Ingat tentang smua susa yang mo jadi, sa rasa lebi baik stiap orang tetap hidup sperti de pu keadaan yang skarang. 27Kalo ko su taikat deng prempuan satu, jang usaha untuk cerai. Kalo ko tra taikat deng prempuan, jang usaha untuk cari prempuan. 28Tapi kalo ko nika, itu bukan dosa. Begitu juga kalo nona satu de nika, itu bukan dosa. Tapi orang-orang yang begitu nanti kena susa banyak dalam dong pu hidup. Jadi sa tra mau kam kena susa itu.

29Sodara-sodara, sa pu maksud tu begini, De pu waktu su dekat. Itu jadi, dalam waktu yang masi ada ni, orang-orang yang ada istri, harus hidup macam de trada istri. 30Trus orang-orang yang mnangis, harus hidup macam de tra mnangis. Orang yang snang skali, harus hidup macam de tra rasa snang. Orang yang bli, harus hidup macam de trada apapa. 31Deng kata lain, orang yang sibuk deng macam-macam urusan di dunia ini, jang sibuk deng itu smua. Karna dunia yang tong tau skarang ini nanti hilang.

32Sa mau supaya kam hidup bebas dari rasa kuatir. Orang yang tra pu istri, de pu pikiran bisa fokus untuk Tuhan saja, tentang bagemana de mo kas snang Tuhan pu hati. 33Tapi orang yang su pu istri, de pu pikiran fokus ke dunia, tentang bagemana de bisa kas snang de pu istri, 34jadi de pu pikiran tabagi-bagi. Prempuan yang tra pu suami ato yang masi nona, dong pu pikiran fokus untuk Tuhan saja, supaya dong pake badan deng hati, kusus untuk Tuhan. Tapi prempuan yang su pu suami, de pu pikiran fokus ke dunia, tentang bagemana de bisa kas snang de pu suami. 35Sa tulis ini bukan untuk larang kam tapi untuk tolong kam sendiri, supaya kam bisa bikin apa yang benar, itu tu kam bisa fokus ke Tuhan deng pikiran tra tabagi-bagi.

36Tapi kalo ada orang yang rasa kalo de tra bikin apa yang benar sama de pu calon, trus kalo de tra bisa tahan de pu napsu, lebi baik dong nika kalo memang dong rasa itu yang dong mau. Itu bukan dosa. 37Tapi kalo ada orang yang betul-betul yakin dalam de pu hati kalo de tra perlu nika, apalagi kalo de betul-betul bisa tahan de pu napsu, yang de bikin tu baik, asal trada yang paksa de untuk bikin begitu. 38Jadi, orang yang nika deng de pu calon, yang de bikin tu baik. Trus orang yang tra kawin, yang de bikin tu lebi baik lagi.

39Istri taikat sama de pu suami slama de pu suami hidup. Kalo de pu suami su mninggal, de bebas nika deng orang yang de suka, asal orang itu tu orang percaya. 40Tapi sa pikir, de lebi snang lagi kalo de tetap tinggal sendiri, sa rasa sa bicara begini karna sa juga ada Roh Allah.

Currently Selected:

1 Korintus 7: MPapua

Highlight

Copy

Compare