1 Korintus 2

Brita tentang Kristus mati di kayu salib

2:1-5

1Sodara-sodara, begitu juga dulu waktu sa datang untuk kastau Allah pu rahasia ke kam, sa tra bicara pake manusia pu pintar ato mo kas tunjuk kalo sa mngerti smua-smua deng baik. 2Karna sa su putuskan, kalo sa ada sama-sama deng kam, sa tra bicara yang lain, hanya tentang Yesus Kristus, tentang yang De su mati di kayu salib saja. 3Trus waktu sa masi sama-sama deng kam, sa rasa diri tra kuat, takut skali deng gementar.#Kisah Para Rasul 18:9 4Sa pu kata-kata yang sa kastau, sa tra bicara deng manusia pu pintar yang bikin kam percaya, tapi deng bukti kalo itu Roh Allah yang pu kuasa. 5Supaya kam pu percaya tu bukan atas dasar manusia pu pintar tapi atas dasar Allah pu kuasa.

Mngerti smua deng baik

2:6-16

6Biar begitu tapi untuk dong yang pu percaya su kuat, tong kastau tentang Allah tau smua-smua. Bukan tentang manusia pu pintar, juga bukan orang-orang yang pegang kuasa di dunia ini pu pintar yang nanti dong trada lagi. 7Tapi tong bicara tentang Allah tau smua-smua, itu De pu rahasia yang dulu De kas sembunyi. Tapi seblum Allah bikin dunia ini, Allah su kas tetap itu supaya tong yang percaya bisa dapa puji deng hormat juga. 8Dari orang-orang yang pegang kuasa di dunia ini, trada yang mngerti tentang Allah pu rencana ini. Kalo memang dong mngerti, dong trakan kas salib Tuhan yang pantas dapa puji deng hormat itu. 9Tapi sperti ada tatulis, “Apa yang mata tra perna liat, tlinga tra perna dengar, deng yang tra perna muncul di manusia pu pikiran, itu yang Allah su kas siap untuk orang-orang yang sayang De.”#Yesaya 64:4

10Allah su kas tunjuk itu sama tong lewat De pu Roh. Karna Roh Allah cari tau smua-smua, sampe Allah pu isi hati yang tasembunyi juga. 11Yang tau orang pu isi hati tu cuma orang itu pu roh sendiri to? Begitu juga deng Allah, yang tau Allah pu isi hati tu cuma Roh Allah sendiri. 12Tong tra trima roh yang dari dunia ini, tapi Roh yang asal dari Allah, supaya tong mngerti smua yang Allah kasi karna Allah baik hati.

13Jadi tong bicara pake kata-kata yang tong dapa kas ajar dari Roh Allah, bukan dari manusia pu pintar. Tong kas jlas apa yang dari Roh Allah untuk dong yang dapa pimpin dari Roh Allah. 14Tapi orang yang trada Roh Allah, tra bisa trima apa yang asal dari Roh itu, karna dong anggap itu tu barang bodok. Juga dong tra bisa mngerti apapa, karna itu smua hanya bisa mngerti kalo Roh Allah ada dalam dong. 15Orang yang dapa pimpin dari Roh Allah bisa nilai smua-smua, tapi trada satu orang juga yang bisa nilai orang itu. 16Karna ada tatulis: “Sapa yang bisa tau Tuhan pu pikiran ka? Sapa yang bisa kas naseat Tuhan?”#Yesaya 40:13 Tapi tong pu cara pikir sama sperti Kristus pu cara pikir.

Currently Selected:

1 Korintus 2: MPapua

Highlight

Copy

Compare