1 Korintus 12
12
Ada banyak hadia rohani tapi Roh cuma satu
12:1-11
1Sodara-sodara, skarang tentang hadia-hadia rohani, sa mau supaya kam tau apa yang benar. 2Kam ingat, waktu kam masi blum knal Allah tu kam dapa pengaru deng dapa seret untuk semba patung-patung yang tra bisa bicara. 3Itu yang sa mo kas yakin kam, kalo orang yang dapa pimpin dari Roh Allah tra mungkin bisa bilang, “Kutuk Yesus suda!” juga trada satu orang yang bisa mngaku, “Yesus tu Tuhan,” kalo tra dapa pimpin dari Roh Allah.
4Hadia rohani ada macam-macam, tapi Roh Allah tu hanya satu saja. 5Kerja untuk layani Tuhan ada macam-macam, tapi Tuhan tu hanya satu saja. 6Cara untuk kerja Tuhan pu pekerjaan ada macam-macam juga, tapi yang kerja smua itu dalam smua orang tu Allah yang satu itu saja.
7Masing-masing orang dapat hadia dari Roh Allah untuk smua orang pu baik. 8Ke orang yang satu, Roh itu kasi hadia rohani untuk bicara deng cara pikir paling baik, trus ke orang lain Roh yang sama tu kasi hadia rohani untuk bicara deng kas jlas tentang Allah. 9Ke orang yang satu, Roh yang sama kasi percaya yang kuat, trus ke yang lain De kasi hadia rohani untuk kas sembu. 10Ke orang yang lain, Roh kasi kuasa untuk bikin tanda luar biasa, trus ke orang lain De kasi hadia rohani untuk kastau Allah pu pesan, trus ke yang lain lagi De kasi hadia rohani untuk kas beda macam-macam roh. Ke orang yang lain, De kasi hadia rohani untuk bicara pake bahasa Roh, trus ke yang lain lagi De kasi hadia rohani untuk kas jlas bahasa Roh itu. 11Tapi Roh yang sama yang satu itu yang kerja smua ini, De yang kasi hadia rohani ke masing-masing orang deng cara kusus sperti yang De mau.
Ada banyak bagian tapi badan cuma satu
12:12-31
12Karna sama sperti badan tu satu trus de pu bagian-bagian ada banyak, trus bagian-bagian itu biar ada banyak tapi badan tu satu saja, begitu juga Kristus. 13Karna tong smua su dapa baptis dalam Roh yang satu itu, tong jadi satu badan, biar tong mo orang Yahudi ka, orang bukan Yahudi ka, mo budak ka, orang bebas ka, tong su dapa taru Roh yang satu tu ke dalam tong pu hati.
14Karna badan juga bukan dapa bentuk dari satu bagian saja, tapi dari banyak bagian. 15Kalo kaki bilang begini, “Karna sa bukan tangan, sa bukan bagian dari badan,” jadi betul ka de bukan bagian dari badan? 16Kalo tlinga bilang begini, “Karna sa bukan mata, sa bukan bagian dari badan,” jadi betul ka de bukan bagian dari badan? 17Kalo smua badan jadi mata saja, badan itu mo dengar bagemana? Kalo smua badan jadi tlinga saja, badan itu mo cium bagemana? 18Tapi Allah su taru masing-masing bagian satu tempat kusus di badan, sperti yang De mau. 19Kalo badan hanya satu bagian saja, brarti itu bukan badan. 20Memang ada banyak bagian, tapi badan cuma satu saja.
21Jadi, mata tra bisa bilang ke tangan, “Sa tra perlu ko.” Begitu juga kepala tra bisa bilang ke kaki, “Sa tra perlu ko.” 22Tapi badan pu bagian-bagian yang kliatan tra kuat skali, itu yang tong perlu skali. 23Trus badan pu bagian-bagian yang untuk tong kliatan kurang dapa hormat, tong pratikan baik-baik. Trus untuk tong pu bagian-bagian yang tra pantas untuk kas liat, tong pele baik-baik. 24Badan pu bagian-bagian yang pantas dapa kas liat, tra perlu bikin begitu. Allah su susun tong pu badan deng baik skali, sampe bagian-bagian yang kurang penting tu dapa pratikan baik-baik. 25Begitu supaya jang ada baku mlawan dalam badan, tapi masing-masing bagian yang beda-beda tu bisa baku pratikan. 26Kalo satu bagian mendrita, smua bagian yang lain juga ikut mendrita. Kalo satu bagian dapa puji, smua bagian yang lain juga ikut snang.
27Kam smua tu Kristus pu badan, trus kam masing-masing tu bagian dari badan itu. 28Begitu juga dalam jemaat, Allah su kas siap orang untuk masing-masing bagian. Pertama jadi utusan, kedua jadi nabi, ketiga jadi guru. Trus dong yang dapat hadia rohani untuk bikin tanda luar biasa, untuk kas sembu, untuk bantu orang, untuk pimpin, untuk bicara dalam macam-macam bahasa Roh. 29Dong smua utusan ka? Dong smua nabi ka? Ato dong smua guru ka? Dong smua dapat kuasa untuk bikin tanda luar biasa ka? 30Ato hadia rohani untuk kas sembu, ato untuk bicara dalam bahasa Roh, ato untuk kas jlas arti dari bahasa Roh itu ka?
31Jadi, kam harus usaha untuk dapat hadia rohani yang lebi penting. Tapi sa mo kas tunjuk sama kam jalan yang lebi penting lagi.
Currently Selected:
1 Korintus 12: MPapua
Highlight
Copy
Compare
Share
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
