Sanghano 20

Wayage Paulo

1Kimbembele kija vikimalile, Paulo katuma kuwakema iwanahina, kawagangamaza na kulagana nawo, imalabaho kahalawa kachola Makedonia. 2Kabita mumuja, kawakungulusa miyoyo yowalangukiza bwando, kavika Ugriki. 3Kakala hiko miyezi midatu; na viyalondile kuchola Siria kwa nzila ya mazi, Wayuda wamtendela msagu wihile, avo kabweleganya kabita Makedonia. 4Na weilongoze nayo iwo wano, Sopatro mwanage Piro yalawile Berea, Aristarko na Sekundo, wanhu wa Tesalonike, na Gayo yalawile Derbe, na Timoteo, Tikiko na Trofimo walawile Asia. 5Awo walongola, watubeta Troa. 6Na tweye tuhalawa Filipi, siku za migate haigelagwa usasu vizibitile; tuchola mwanza wa mazuwa matano, tuwavikila wayetu Troa, tukala hiko mazuwa saba.

Mmhale Eutiko kabwezwa mgima

7Siku ya ichanduso ya ijuma (jumapili) vitukalile twilundiza kwimegela migate, Paulo kawapetela Longa, kabasiliza malonga kuvikila ikilo kikulu, kwa mzoko kalonda kusegela imitondo. 8Kukala na taa bwando kuja uchana kuna digati ditukalile twilundize. 9Mmhale imonga twaga jake Eutiko kakala hadilisha, kuno yokukila, kilumbo Paulo viyabasilize kulonga, yuja mmhale kahumwa na utulo, kagwa hasi kulawa kuna digala jekadatu; wamdondola yafile. 10Paulo kahulumuka, kamgwila kamuhagatila yolonga, “Sikumulile, kwa mzoko ino yahali mpile.”

11Kakwela kabili uchana, kaumega mkate, kaja, kalongelela bwando nawo hata vuuchele; avo vivo yalawile hiko. 12Wambweza yuja immhale mpile, na miyoyo yawo itindiwala goya.

Mwanza mjahazi kuvika Milete

13Na tweye vitulagizwe na Paulo, twingila mjahazi tuvika Aso, giladi twitinghane nayo hiko; kwa mzoko mwenyecho kagesa kuchola na magulu. 14Na heyo viyatuvikile hiko Aso, tumsola tuvika Mitilene. 15Tulawa hiko, na siku jekabili tuvika behi na Kio, siku jekadatu tubita Samo, kuno tukala Trogilio na siku jekane tuvika Mileto. 16Kwa mzoko Paulo kalonda kubita Efeso mjahazi, sikuyakawe kuvikila Asia; kachola mbwisambwisa giladi, kamba ihadahika, yakaje isikunghulu ya Kuhulumuka Loho Yangʼalile hiko Yerusalemu.

Wavyele wa Efeso walagana na Paulo

17Kulawa Mileto Paulo katuma wanhu wachole Efeso kuwakema Wavyele wa didale ja Efeso. 18Na hewo vuwavikile kawalongela, “Mwemwe wenyego mvimanya lulawile siku ya ichanduso vinghalile namwe hano Asia. 19Nimsanghanikila Mndewa na uholo wose na mahozi na kugezigwa, Wayuda vuwakalile wonhendela misagu ihile. 20Na niye silekile kuwasimulila mbuli zose zilumbile kuwataza, bali niwalangukiza kibunubunu, na ngʼanda kwa ngʼanda. 21Niwazuma Wayuda na Wagriki wamuhindukile Mulungu na kumtogola Mndewa wetu Yesu Kristo. 22Avo loleni nogoga nzila kuchola Yerusalemu, nifungigwe mloho, wala sigamanya gonda gamhate kuja. 23Kinhangile kimwe, Loho Yangʼalile konisindila mviwambo vyose yolonga, kugelwa mkifungo na manghulubu gonibeta. 24Komu nogelegeza upile wangu si kinhu kibanzile, niumambukize mwanza wangu na sanghana ija mgwelelwe na Mndewa Yesu, kuisindila mbuli inogile ya ugozi wa Mulungu.

25Avo loleni, niye vinivikile kumwenu na kuwalongela Undewa wa Mulungu, nivimanya kamba honda mchone kabili kihanga changu ngʼo. 26Avo lelo dino nomzumani mweye mose kamba niye nabule na mbuli ya mulopa wa munhu yoyose. 27Kwa mzoko silekile kuwasimulilani kivugulo chose cha manogelwa ga Mulungu. 28Iteganyeni wenyego na didale jose, kilumbo Loho Yangʼalile kamwikani mweye muwe wemilizi wa didale, giladi muwenghize wanahina wa Mulungu, diyagulile kwa kuulava mulopa wake mwenyecho. 29Nihamala kusegela niye, nivimanya kamba yokwingila miduma milapi kumwenu, honda wajonele bazi didale. 30Kabili mmwanza wenu wokwinuka wanhu wa kulanguliza gehile, na kuwakwega iwanahina wegondanye nawo. 31Avo mkale meso na kukumbukila kamba miyaka midatu, ikilo na imisi, silekile kumzuma kila munhu na mahozi. 32Avo nomwikani mmakono ga Mulungu na hasi ya Longa jake ja unozi jonda didahe kuwazenga na kuwenghani uhazi hamonga na wose wangʼazigwe. 33Sigesile mhiya hebu zahabu hebu uvazi wa munhu. 34Mvitanga wenyego kamba makono gangu gano ganisumila, ganinghiza niye na wayangu wakalile hamonga na niye. 35Niwalagila vyose kamba itwandama kugadukila sanghana, avo vivo tuwataze wonyolila, kuno tugelegeza malonga ga Mndewa Yesu yalongile mwenyecho, Kamota mwene kugola kubanza mwene kugolelwa.”

36Imala baho kafugama mavindi, kampula Mulungu hamonga na hewo wose. 37Na hewo walila nghani, wamuhagatila Paulo muugosi, wamnonela nghani. 38Manyululuko bwando gawengila kilumbo cha longa dija diyalongile, kamba honda wachone kabili kihanga chake; wamuhilika kuna dijahazi.

Currently Selected:

Sanghano 20: ZAM75

Highlight

Copy