SUSANA 13
13
Susana xot kinta'an u ti'al ca quíimsa'ac
1Cajacbal ca'ach Babilonia jun túul máac u kaaba'e' Joaquín. 2Dzoca'an u beel yéetel jun túul co'olel u kaaba'e' Susana, u x ch'upupaal Hilcías, jach qui'ichpam yéetel jach utz u yóol ti' qui'ichquelem Yuum. 3U taata yéetel u mamae' jach toj u cuxtalo'ob, leti'ob xane' tu ca'ansajo'ob yéetel u ya'almaj t'aan Moisés. 4Joaquine' jach ayikal, naadz ti' u najile' yaan jun p'éel jardin tu'ux yaan u pakalbil che'ob. Leti' u asab nojochil ichil tuláacal le judíobo', chéen ba'ale' suucchaja'an u much'icuba'ob tu najil.
5Ti' le ja'abo' j dzaab ca'a túul u nuuquilo'ob caaj u beeto'ob u p'is óolilo'ob le caajo'. Ba'ale' leti'obe' beyo'ob je'el bix tu ya'alaj qui'iquelem Yuum: Le kaaso' ila'ab Babilonia tu yo'olal le ba'ax cu beetico'ob le u nuuquil caaj bey xan u p'is óolo'ob caaj, cu beetico'ob bey táan u yáantico'ob le caajo'. 6Le máaco'obo' suuc u bino'ob tu najil Joaquín, tuláacal le yaan ti'ob wa ba'ax ba'atelile', cu bino'ob tu taanajo'ob. 7Tu chúumuc kiin le quéen lukuco'ob le máaco'obo', Susanae' suuc u yocol xíimbal te tu jardin u yíichamo'. 8Le ca'a túul u nuuquilo'ob caaj cu yilico'ob u yocol xíimbal sáamsamalo', chuup u pucsi'ikalo'ob yéetel kaas, 9kaschaj xan u tuuculo'ob tu yo'olal tu tu'ubsajo'ob Ku, mix suunaj ka'ajal ti'ob ba'ax toj cuxtali'. 10Tu ca'a túulalo'ob chuup u pucsi'ikalo'ob yéetel kaas tu yo'olal, chéen ba'ale' ma' tu ye'esajo'ob ba'ax cu yúuchul ti'obi', 11tumen cu ch'a'ico'ob subtal ca ojéelta'ac bix u káato'ob ca anchajac ba'al u yilo'ob tu yéetel. 12Bey túuno' sáamsamal ch'iiquilo'ob u tuculto'ob bix cun u yiluba'ob tu yéetel.
13Jun téene' tu ca'a túulal tu ya'alajo'ob: co'ox t najil tumen dzo'oc u yoraltal c janal; bey túuno' tu ca'a túulalo'ob j bino'ob tu beelo'ob. 14Chéen ba'ale' tu ca'a túulalo'ob xan j suunajo'ob ca tu nuptáantajuba'ob le tu'ux yáax luko'obo'. Ca tu káat chi'itajo'ob ba'axten j suunajo'ob, bey túuno' tu ca'a túulal tu tacaj u poolo'ob ti' le kaakas tuucul yaan ti'obo'. Bey túuno' ca tucultajo'ob bix cun u beetico'ob u ti'al u nuptáanticuba'ob yéetel Susana tu'ux yaan tu juunal.
15Táan u pa'atico'ob u kuchul u kiinil, jun téen túune', j bin te jardino', je'el bix suuc u beetico', láakinta'an chéen tumen ca'a túul x ch'úupalalo'ob, taacchaj túun u yichquil te jardino, tumen jach ya'ab u beetic ooxow. 16Jach mix máac yaan te'elo', chéen le ca'a túul u nuuquil caaj táan u ch'úuco'obo'. 17Susanae' tu ya'alaj ti' le x ch'úupalalo'obo': taase'ex teen aceite yéetel qui'iboc ja', kale'ex u jool najil le jardino' tumen bin in ca'aj ichquil. 18Leti'obe' tu beetajo'ob ba'ax a'ala'ab ti'ob; tu kalajo'ob u jool najil le jardino' ca jóoko'ob ti' u láak jool naj yaan tu tzéel u ti'al u taaso'ob ba'ax káata'ab ti'ob. Le u nuuquilo'ob le caajo' u ta'acbesmajuba'ob, le o'olal ma' ila'abo'obi'.
19Chéen p'elac u bin le x ch'úupalalo'obo', jóoko'ob áalcabil le ca'a túul nuxibo'obo', ca j bino'ob tu yicnal, 20ca tu ya'alajo'ob ti':
Ile, u jool najil le jardino' kala'ano'ob; mix máac ilico'on. Chuup c pucsi'ikal yéetel dzíibolal ta wo'olal, óol to'oni', kubabáa ti' to'on. 21Wa ma'e' c taquic a pool, c a'alic jun túul j xi'ipal yaan ta wéetel, le o'olale' ta wa'alaj ca jóokoc le x ch'úupalalo'obo'.
22Susanae' tu yokol ca tu ya'alaj: ¡Mina'an tu'ux in púudzul! Wa quin beetic ba'ax ca wa'alique'ex ti' tene', yaan in xot kinta'al u ti'al ca quiimsa'aquen, wa xan ma' tin wóoltique' ma' tu páajtal in púudzul ta kabe'ex. 23Ba'ale' asab ma'alo'ob ma' in p'atquinbáa ti' te'ex, quex ca lúubquen ta kabe'ex, Beyo' ma' tin beetic keban tu táan qui'ichquelem Yuum.
24Bey túuno' Susanae' awatnaj yéetel tuláacal u muuk, ba'ale' bey xan le ca'a túul u nuxibo'obo'. 25Jun túul ti'obe' áalcabnaje' ca tu je'ej u jool najil le jardino'.
26Le ca j u'uya'ab u yawato'ob te jardino', le máaco'ob yano'ob te j najo' j ooc u yáalcabo'ob ti' le jool naj yaan tzéelilo' u ti'al u yilo'ob ba'ax cu yúuchul. 27Le ca tu tzicbaltajo'ob le ca'a túul nuxibo'ob ba'ax u pat jo'oltmajo'obo', le palitzilo'obo' tu ch'a'ajo'ob subtal, tumen jach mix jun téen u yu'ubmajo'ob u ya'ala'al ba'al bey tu yo'olal Susanao'.
28Tu láak kiine', le ca j much'laj le caaj tu yotoch Joaquín u yíicham Susanae', j taalo'ob le ca'a túul nuxibo'obo' yéetel u kaakas tuuculil u beetico'ob u quiimsa'al. 29Ca tu ya'alajo'ob tu táan le caajo': A'ale'ex ca taasa'ac Susana u x ch'upupaal Hilcías, u yatan Joaquin. Ca j beeta'ab u taal. 30Le ca j kuch x leti'e', láakinta'an tumen u taata yéetel u maama, u paalal yéetel u láaktzilo'ob. 31Susanae' jun túul co'olel jach nuum yéetel jach qui'ichpam. 32U pixmaj u yich yéetel jun p'éel nook, le o'olale' le kasa'an máaco'obo' tu ya'alajo'ob ti' ca u tzele, u ti'al u yilico'ob u jadzutzil. 33Tuláacal u láako'ob yéetel u yéet óolo'ob, bey xan tuláacal máaxo'ob ilique' táan u yokolo'ob. 34Bey túuno' le ca'a túul nuxibo'obo, wa'alajo'ob chúumuc ti' le máaco'obo', ca tu dzajo'ob u kabo'ob tu yóokol u pool susana. 35Leti'e' táan u yokol ca tu líikesaj u yich ca'an, tumen u kubmaj u pucsi'ikal ti' qui'ichquelem Yuum.
36Le nuxibo'obo' tu ya'alajo'ob beya'; chéen to'on yano'on ca'ach te jardino', táan c xíimbaltic, ca j kuch le x co'olela' yéetel ca'a túul x ch'úupalalo'ob, ca tu beetaj u ka'alal u jool najil le jardino', yéetel ca xi'ico'ob le x ch'úupalalo'obo'. 37Tu séeblaquile' ca j náadz jun túul j xi'ipal u ta'acmajubáa ca'achi, x leti'e' ca tu kubjubáa ti'. 38To'one' ti' yano'on ca'ach ti' jun p'éel ti'itz le jardino', le ca t ilaj le kaasa' j bino'on áalcabil tac tu'ux yano'ob. 39T ilaj u méekmajuba'ob, ba'ale' ma' páatchaj c machic le j xi'ipalo', tumen asab yaan u muuk ti' to'on, yéetel tu je'aj le jool najo' ca j púudzi. 40Bey túuno' ca t machaj x leti', yéetel t káataj ti' máax le j xi'ipalo', 41ba'ale' ma' tu yóoltaj u ya'al ti' to'oni'. Leti' le c a'alic te'exa' tumen to'on j ile.
Tuláacal le caaj much'ucbalo' tu yocsaj óoltajo'ob, tumen leti'ob u nuuquil le caajo', leti'ob xan u aj pis óolal. Bey túuno' xot kinta'ab u ti'al ca quiimsa'ac.
Cu yáanta'al Susana tumen Daniel
42Bey túuno' Susanae' awatnaj yéetel tuláacal u muuk: ¡Ku mina'an xu'ulul ti' teech, teche' a wojel tuláacal ba'al, a wojel quex ma' úuchaqui', 43teche' a wojel ma' jaaj ba'ax cu ya'alic le máaco'ob tin wo'olala'! ¡Ile bin in ca'aj quíimil, quex tumen ma' in beet mix ba'al ti' le cu pat jo'oltco'ob tin wo'olal le kaakas máaco'oba'!
44Qui'ichquelem Yuum u'uy u yawat Susana. 45T'aan u bisa'al quiimsbile', Kue' tu yajsaj u quili'ich pixan jun túul j xi'ipal u kaaba' Daniel, 46leti'e' tu yawtaj yéetel tuláacal u muuk: ¡Tene' ma' tin cuchic u si'ipili u quiimsa'al le co'olela'!
47Tuláacal le máaco'obo' j suunaj u yicho'ob ti'e', ca tu káatajo'ob ti': ¿Ba'ax u káat u ya'al le ba'ax táant a wa'alica'?
48Leti'e' yanchaj chúumuc ti'ob ca tu ya'alaj ti'ob: ¿Jach wa táaj mina'an a na'ate'ex j israelitaex, ba'axten ca xot kintique'ex jun túul co'olel quex ma' a kaj óolte'ex mix a wojele'ex ba'ax úuchi'? 49Suunaque'ex tu cúuchil le p'is óolo', tumen le ba'ax tu ya'alajo'ob le máaco'obo' chéen tuus. 50Bey túuno' tuláacal le caajo' j suunaj tu séeblaquil. Le túun u láak le u nuuquilo'ob le caajo' tu ya'alajo'ob ti' Daniel: co'oten, culen ichilo'on, dzáa c ojéelt ba'ax ca tucultic, tumen Ku dzáa teech páajtalil bey je'el bix ti' u nuuquilo'ob le caajo'.
51Náachcunte'ex jun túul ti' u láak le nuxibo'obo', tumen teen quin in káat u chi'ob.
52Ca ja'atzo'ob. Bey túuno' tu túuxtaj t'anbil jun túulee', ca tu ya'alaj ti': ch'ija'an ti' ja'abo'ob yéetel ti' kasa'anil, bejela'e' yaan u lúubul ta wóokol le kebano'ob a beetmaj ca'ach úuchile', 53tumen yéetel ba'ax ma' jaaje' ca xot kintic máaco'ob mix ba'al kaas u beetmajo'ob, ba'ale' ca sa'atsic u si'ipil le máaco'ob u beetmajo'ob ba'al kaaso', quex tumen Qui'ichquelem Yuum a'almil: Ma' a xot kintique'ex quiimsbil máac ma' u beetmaj kaasi' bey xan mix u si'ipil yaan. 54Ma'alob túun, wa jach tu jaajil ta wilaj u nup kebantcuba'e', a'al to'on yáanal ba'ax che'il ta wilajo'ob.
Leti'e' tu núucaj:
Yáanal jun cúul castaño.
55Ba'ale' Daniele' tu ya'alaj ti': ¡Jach ma'alob! Ta wa'alaj jun p'éel tuus yaan u beetic a quíimi. ¿Bix a wa'alic tu yáanal jun cúul castaño? ¡U ángel Kue' dzo'oc u yu'ubic u ya'alic ca quiimsa'aquech ch'acbilech ca'a búuj!
56Bey túuno' tu ya'alaj ca bisa'ac jun túula' yéetel ca taasa'ac u láak le nuxibo'. Ca tu ya'alaj ti': ¡Wíinic u ch'i'ibalech Canaán tumen ma' u ch'i'ibalech Judae': jadzutzil kascuntech, a kaakas dzíibolaj kascunt a pucsi'ikal! 57Bey a beetique'ex yéetel u co'olelilo'ob Israel, leti'ob xane' tu yo'olal u sajaquilo'obe', cu kubicuba'ob ti' te'ex. Ba'ale' le co'olela' u ch'i'ibal Judá, le o'olale' ma' lúub ta kabe'exi'. 58Behora', a'al teen, ¿Yáanal ba'ax che'il ta chucajo'ob?
Yáanal jun cúul encina tu núucaj leti'.
59Ba'ale' Daniele' tu ya'alaj ti':
¡Jach ma'alob! Teech xane' le tuus ta beetajo' le cun u beet a quiimsa'al. ¿Bix a wa'alic tu yáanal jun cúul encina? ¡U ángel Kue' táan u pactic, yéetel u máascab u taal u beet u lúubul ta wóokol tumen bey cun u bujech! ¡Bey cun u quiimsile'ex tu ca'a túulale'ex!
60Bey túuno' tuláacal le caaj much'ucbalo', awtnaji yéetel tu qui' t'antaj Ku tumen cu yáantic máax cu kubic u pucsi'ikal ti'.
61Bey túuno' Daniele tu beetaj u ya'alico'ob le ca'a túul nuxibo'ob ma' jaaj ba'ax tu yáax a'alajo'obo' ch'a'apachta'abo'ob tumen le caajo', ca j beeta'ab ti'ob bey je'el bix leti'ob tu yo'olal u kasa'anilo'ob tu tucultajo'ob u beetico'ob ti' Susana: 62Quiimsa'abo'ob je'el bix u ya'alic u ya'almaj t'aan Moisés. Bey túuno' ti' le kiino' ma' cha'ab u quiimsa'al jun túul co'olel mix ba'al u si'ipil. 63Hilcías Yéetel u yatane' tu dzajo'ob nib óolal ti' Ku tu yo'olal u x ch'upulpaal Susana, bey tu beetilo'ob xan Joaquín, u yíicham, yéetel tuláacal u láaktzilo'ob, tumen mix ba'al subtzil caxta'ab ti'. 64Bey túuno' Daniele' jach yaabilta'ab tumen le caajo'.
Currently Selected:
SUSANA 13: MAYADC
Highlight
Copy
Compare
Share
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.