Números 7
7
Ti'ibil óolal u ti'al u jun páaycunta'al quiili'ich naj.
1Le kiin tu dzo'ocbesilac Moisés le quili'ich najo', tu jun páaycuntaj yéetel aceite, pa'ate' yéetel tuláacal u nu'uculo'ob le quili'ich najo' bey xan le nu'uculo'ob cu meyajo'ob tu muultunil kultajo'. 2Cu dzo'ocole' u nojchililo'ob u ch'i'ibalo'obe' áantajnajo'ob u ti'al u xo'ocol le j israelitaobo', 3j bino'ob u táanbeso'ob ti' Yuumtzil bey ti'ibil óolale' seis pixbil bolano'ob, yéetel doce wacax, u káat u ya'ale' jun p'éel bolan u ti'al ca'a túul u nojchilo'ob, yéetel jun túul wacax, tuláacal lela' tu táanbesajo'ob tu táan le quili'ich najo'.
4Yuumtzil túune' tu ya'alaj ti' Moisés: 5Kam le bolano'ob yéetel le wacaxo'obo', ca a dzáa ti' le j levitaob u ti'al u meeyjul u noj Paselil Much'tal, bíin u beet tu jujun túulil je'el bix u najmale'.
6Moisese' tu kamaj le bolano'ob yéetel le wacaxo'obo' ca tu t'oxaj ti' le j levitaobo'. 7Ti' u ch'i'ibal Gersone' tu dzáa ca p'éel bolan yéetel can túul wacaxo'ob, le kabéet u ti'al u meeyjulo'obe'. 8Ti' u ch'i'ibal Merarie' tu dzaj tu kab Itamar, u paal noj kiin Aarón can p'éel bolano'ob yéetel ocho wacax le kabéet u ti'al u meeyjulo'obe'. 9Ba'ale' ti' u ch'i'ibal Coate' ma' tu dzáa bolan mix wacaxi', tumen le quili'ich ba'alo'ob bíin u biso'obe' unaj u bisico'ob cúuch queléembaltbil'.
10Le ca'aj jun páaycunta'ab u multuunil le kultajo', u nuuquilo'ob u ch'i'ibalo'obe' tu bisajo'ob u ti'ibil óolalo'ob ca tu dzajo'ob tu táan u multuunil kultaj. 11Yuumtzil túune' tu ya'alaj ti' Moisés: u ti'al jun páaycunajil sáamsamal jujun túul ti' u nojchil múuch' cajtalil otochnáal bíin u bis u ti'ibil óolal u ti'al u jun páaycunta'al u multuunil kultajo'.
12Yáax kiine' tu bisaj u ti'ibil óolal Naasón, u paal Aminadab, ti' u ch'i'ibalo'ob Judá. 13U ti'ibil óolale' jun p'éel cáat beeta'an yéetel plata u aalile' mil cuatrocientos yéetel treinta gramos bey xan jun p'éel lac setecientos setenta gramos u aalil je'el bix u noj p'iisil le kulnajo', tuláacal chuup yéetel u ma'alobil juch'bil janalbe'en neeko'ob xa'akbesa'an yéetel aceite u ti'al ti'ibil óolal; 14tu bisaj xan chuup yéetel poom jun p'éel x jo'opob beeta'an yéetel oro, u aalile' diez gramos, 15jun túul chan wacax, jun túul j taman, yéetel jun túul j taman yaan un ja'ab ti' u ti'al u kubic láaj tóocbil, 16jun túul j yuuc u ti'al quíimsbil tu yo'olal keban 17u dzooque', u ti'al quíimsbil ba'alche' u ti'al ca'a bisajbáil, ca'a túul wacax, cinco j taman, cinco j yuuco'ob yéetel cinco j taman yaan un ja'ab ti'ob. Lela' u ti'ibil óolal Naasón, u paal Aminadab.
18U ca'a p'éel kiine' tu bisaj u ti'ibil óolal Natanael, u paal Zuar, u nojchil u ch'i'ibalo'ob Isacar, 19-23tu bisaj ti'ibil óolal je'el bix le tu bisaj Naasone'.
24Tu óox p'éel kiine' tu bisaj u ti'ibil óolal Eliab, u paal Helón, u nojchil u ch'i'ibalo'ob Zabulón, 25-29tu bisaj u ti'ibil óolal láili' je'el bix le yáaxo'obo'.
30Tu can p'éel kiine' tu bisaj u ti'ibil óolal Elisur, u paal Sedeur, u nojchil u ch'i'ibalo'ob Rubene', 31-35u ti'ibil óolale' láili' je'el bix le yáaxo'obo'.
36Tu cinco kiine' tu bisaj u ti'ibil óolal Selumiel, u paal Zurisadai, u nojchil u ch'i'ibalo'ob Simeón, 37-41u ti'ibil óolale' láili' je'el bix le yáaxo'obo'.
42U seis kiine' tu bisaj u ti'ibil óolal Eliasaf, u paal Reuel, u nojchil u ch'i'ibalo'ob Gade', 43-47u ti'ibil óolale' láili' je'el bix le yáaxo'obo'.
48U siete kiine' tu bisaj u ti'ibil óolal Elisama, u paal Amiud, u nojchil u ch'i'ibalo'ob Efraín, 49-53u ti'ibil óolale' láili' je'el bix le yáaxo'obo'.
54Tu ocho kiine' tu bisaj u ti'ibil óolal Gamaliel, u paal Pedasur, u nojchil u ch'i'ibalo'ob Manasés, 55-59u ti'ibil óolale' láili' je'el bix le yáaxo'obo'.
60Tu nueve kiine' tu bisaj u ti'ibil óolale' Abidán, u paal Gedeoni, u nojchil u ch'i'ibalo'ob Benjamín, 61-65u ti'ibil óolale' láili' je'el bix le yáax taalo'obo'.
66Tu diez kiine' tu bisaj u ti'ibil óolal Ahiezer, u paal Amisadai, u nojchil u ch'i'ibalo'ob Dan, 67-71u ti'ibil óolale' láili' je'el bix le yáax taalo'obo'.
72Tu once kiino'obe' tu bisaj u ti'ibil óolal Pagiel, u paal Ocrán, u nojchil u ch'i'ibalo'ob Aser, 73-77u ti'ibil óolale' láili' je'el bix le yáax taalo'obo'.
78Tu doce kiinilo'obe' tu bisaj u ti'ibil óolal Ahira, u paal Enán, u nojchil u ch'i'ibalo'ob Neftalí, 79-83u ti'ibil óolale' láili' je'el bix le yáax taalo'obo'.
84Bey túuno' le ca'aj jun páaycunta'ab le u multuunil kultajo', u nojchilo'ob u ch'i'ibalo'ob Israele' tu kubajo'ob doce jejeláas cáato'ob beeta'ano'ob yéetel plata, doce noj laco'ob láili' beeta'an yéetel plata bey xan doce x jo'opobo'ob beeta'an yéetel oro. 85Tu jujun p'éelil le cáato'obo' u aalile' mil cuatrocientos yéetel treinta gramos, bey xan jujun p'éel noj laco'obo' u aalile', setecientos setenta gramos. Tuláacal le plata yaan ti' le cáato'ob yéetel ti' le noj laco'ob, u aalile' veintiséis mil yéetel cuatrocientos gramos, je'el bix u noj p'iisil le quili'ich najo'. 86Yaan xan doce x jo'opobo'ob beeta'an yéetel oro chuup yéetel poom, ciento diez gramos aalil u jujun p'éelil je'el bix u noj p'iisil le quili'ich najo'. U oroil tuláacal le x jo'opobobo' mil trescientos yéetel veinte gramos u aalil.
87Le ba'alche'ob u ti'al láaj tóocbile', doce mejen wacaxo'ob, doce j tamano'ob, doce j taman yaan un ja'abil ti'ob, yéetel u ti'ibil óolalo'ob jejeláas janalbe'en neeko'ob, bey xan doce j yuuco'ob quíimsbil tu yo'olal keban. 88U ba'alche'ilo'ob u ti'al quíimsbil ca'a bisajbáil tu pa'ate'ile' veinticuatro mejen wacax, sesenta j tamano'ob, setenta j yuuco'ob yéetel sesenta j tamano'ob yaan jun ja'ab ti'ob. Lelo'oba' leti' le ti'ibil óolal úuchic u ku'ubul le u multuunil kultaj, le ca'a dzo'oc u jun páaycunta'alo'.
89Le ca'aj ooc Moisés tu noj Paselil Much'tal u ti'al t'aan yéetel Yuumtzil, tu yu'ubaj ti' cu t'aan Yuumtzil yóokol u maac u ba'as che'il nup t'aan, chúumuc ti' le aj cuxa'ano'ob yaan u xiiko'obo'.
Currently Selected:
Números 7: MAYADC
Highlight
Copy
Compare
Share
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.
