Números 4
4
U jejeláas meyaj le j levitaobo'
1Yuumtzile' tu t'anaj Moisés yéetel Aarón ca tu ya'alaj ti'ob: 2Xoque'ex jay túul u yotochnáalo'ob u cajtalil le j levitaob tu tzoolol u ch'i'ibalo'ob Coat, 3le máaxo'ob yaan treinta tac cincuenta u ja'abilo'obe', nu'ucano'ob u ti'al meyaj tu noj Paselil Much'tal.
4U meyaj u ch'i'ibalo'ob Coate', sen quili'ich, je'el le ba'ax bíin u beeto'oba': 5Le quéen kuchuc u kiinil u líikil u binbal le caajo', Aarón yéetel u paalale' bíin u lukso'ob le káasab yaan tu jool le sen quili'ich cúuchilo', yéetele' cu to'ico'ob u ba'asche'il le nup t'aano'. 6Bíin u dza'ob tu yóokole' jun p'éel pixib beeta'an yéetel ma'alob kéewelo'ob, cu dzo'ocole' cu jayico'ob jun tacáalili' jun p'éel chacpuke'en nook, cu dza'abal u katáabilo'ob u ti'al u cúuch queléembalta'al. 7Yaan xan u ja'ayal jun p'éel chacpuke'en nook yóokol u táasche'il táanbesajil cu dzo'ocole' cu tzo'olol yóokol u jáaycab laquilo'ob, u jo'opobilo'ob, u chúujilo'ob, yéetel u pichelilo'ob u ti'ibil óolal u ti'al u kab uva, bey xan le waaj cu táanbesa'al mantadzo'. 8Tu yóokol tuláacal lelo', bíin ja'ayac jun p'éel chac nook, cu dzo'ocole' cu pi'ixil yéetel le pixib beeta'an yéetel ma'alob kéewelo'obo', cu dza'abal u katáabilo'ob u ti'al u cúuch queléembalta'al. 9Cu dzo'ocole' cu ch'a'abal jun p'éel chacpuke'en nook u ti'al u pi'ixil le x t'uchub sáaso', le sáaso'obo', le x nat'abo'obo', le x jayacsa'al lac yéetel tuláacal u nu'ucul u dza'abal aceite. 10Tuláacal le ba'alo'obo', bíin to'oboc yéetel jun p'éel pixib beeta'an yéetel ma'alob kéewelo'ob, cu dza'abal u katáabilo'ob u ti'al u cúuch queléembalta'al.
11Bey xan bíin ja'ayac jun p'éel chacpuke'en nook yóokol le multuunil kultaj oro u ca'aj, cu to'obol yéetel jun p'éel pixib beeta'an yéetel ma'alob kéewelo'obe' cu dza'abal u katáabilo'ob u ti'al u cúuch queléembalta'al. 12Cu dzo'ocole' cu mo'olol le nu'uculo'ob cu meyaj te j quili'ich najo', cu dza'abal ti' jun p'éel chacpuke'en nook, cu to'obol yéetel jun p'éel pixib beeta'an yéetel ma'alob kéewelo'ob, cu bisa'al xan cúuch queléembaltbil ti' u katáabilo'ob. 13Unaj u láaj cho'obol u ch'ach'alquil yéetel u púusta'al u ta'anil le u multuunil kultajo', cu dzo'ocole' cu to'obol yéetel jun p'éel chacjome'en nook. 14Tu yóokol bíin dza'abac tuláacal le ba'ax cu kabéetchajal u ti'al u quili'ich meeyjulo'ob tu multuunil kultajo': u nu'uculo'ob t'aba'an chúuc u x lu'utzubilo'ob, u x jo'opobilo'ob, u nucuch laquilo'ob; yéetel tuláacal u nu'uculo'ob le multuunil kultajo'. Ti' tuláacal lelo' bíin dza'abac jun p'éel u pixilbil ma'alob kéewelo'ob, bey xan u katáabilo'ob u ti'al u cúuch queléembalta'al. 15Le quéen dzo'ococ u láaj to'obol tumen Aarón yéetel u paalal tuláacal le quili'ich nu'uculo'ob, quéen dzo'ococ túun u máakanta'alo'ob u ti'al bisbile' je'el u páajtal u taal u paalal Coat u ti'al u cúuch queléembalto'ob le ba'alo'obo'. Ba'ale' ma' unaj u machico'ob mix ba'al quili'ich yéetel u kabo'ob, tu yo'olal ma' u quíimilo'ob. Tuláacal u nu'uculo'ob u noj Paselil Much'tal unaj u cúuch queléembalta'al tumen u paalal Coat. 16Eleazar, u paal aj kiin Aarone', leti' bíin ilic u aceiteil sáaso'ob, qui'iboc poom, bey jejeláas janalbe'en neeko'ob u ti'al táanbesa'al mantadz ti'ibil óolalo'ob ti' teen, je'el bix le u aceiteil jun páaycunajo'. Yaan xan u canantic le quili'ich naj yéetel tuláacal ba'ax yaan ichilo' bey xan u quili'ich ba'alilo'ob. 17Yuumtzile' tu t'anaj Moisés yéetel Aarón ca tu ya'alaj ti'ob: 18Ma' bíin a cha'ex u sa'atal u cajtalil u yotochnáanlo'ob Coat ichil le j levitaobo'. 19U ti'al ma' u núumsaj yajtico'ob quíimil tu yo'olal u machco'ob quili'ich ba'alo'ob, unaj a beetique'ex beya'; Aarón yéetel u paalal bíin u ya'al ti' u jujun túulil ba'ax bíin u beet yéetel ba'ax bíin u bisej. 20Beyo' mina'an ba'ax o'olal u yoclo'ob mix jun súutuc u yilo'ob quili'ich ba'alo'obi', ma' xan ca quíimco'obi'. 21Yuumtzile' tu t'anaj Moisés ca tu ya'alaj ti': 22Xoc xan tu tzoolol jay túul u yotochnáalo'ob u cajtalilo'ob Gersón 23le je'enque'ex yaan treinta tac cincuenta u ja'abilo'ob, nu'ucano'ob u ti'al meyaj tu noj Paselil Much'talo'. 24U meyajo'ob u ch'i'ibal Gersone', leti' lelo'oba': 25Unaj u cúuch queléembaltico'ob u káasabilo'ob le quili'ich naj, u noj Paselil Much'talo', le pixib beeta'an yéetel ma'alob kéewelo'ob cu ja'ayal yóokol le káasab cu bin tu jool le u noj Paselil Much'talo', 26u káasabilo'ob le x péetpaacho', u káasabil u jool le x péetpaach bakpachtmail le quili'ich naj yéetel u multuunil le kultajo', u suumilo'ob yéetel tuláacal le ba'axo'ob kabéet u ti'al u meyajilo'obe'. 27Aarón yéetel u paalal bíin u ye'eso'ob ti' u paalal Gersone' le meyaj bíin u beeto'ob, yéetel ba'axo'ob bíin u cúuch queléembalto'ob, te'ex bíin a wa'ale'ex ti'ob ba'ax cun u beeto'ob. 28Lela' leti' le meyaj bíin u beeto'ob u cajnáalilo'ob u yotochnáalilo'ob yéetel ch'i'ibalo'ob Gersón tu noj Paselil Much'tal yáanal u tzolbe'en t'aan Itamar u paal aj kiin Aarón.
29Xoc xan tu tzoolil jay túul ch'i'ilancab, u cajnáalil u yotochnáalo'ob yéetel láaktzilo'ob Merari. 30Láaj dzíibt u kaaba' le yaan treinta tac cincuenta u ja'abilo'ob, nu'ucano'ob u ti'al meyaj tu noj Paselil Much'talo'. 31-32Le meyaj bíin u beeto'ob tu noj Paselil Much'talo' leti' lela': bíin u cúuch queléembalto'ob u bujbil che'ilo'ob le quili'ich najo', u katáabilo'ob, u yocomilo'ob, u nu'ucul yedztalo'ob u x bajab che'ilo'ob yéetel u suumilo'ob, bey xan tuláacal le kabéet u ti'al u meyajilo'obo'. Teech bíin a wa'al ti' tu jujun túulil ba'ax unaj u cúuch queléembaltico'ob. 33Lela' leti' u meyajilo'ob tu noj Paselil Much'tal bíin u beet u ch'i'ibalo'ob Merari yáanal u tzolbe'en t'aan Itamar u paal aj kiin Aarón.
34Moisés, Aarón yéetel u nuuquilo'ob le caajo', tu xocajo'ob tu tzoolol jay túul u cajnáalilo'ob u yotochnáalilo'ob u ch'i'ibal Coat 35je'enque'ex yaan treinta tac cincuenta u ja'abilo'ob nu'ucano'ob u ti'al j meyaj tu noj Paselil Much'tal, 36ca j dzíibta'ab u kaaba'ob dos mil setecientos yéetel cincuenta máaco'ob tu pa'ate'il. 37Lelo' leti' le buca'aj tu chucaj u ch'i'ibal Coat, cu páajtal u meyajo'ob ca'ach tu noj Paselil Much'tal je'el bix le dzíib kaaba'ob tu beetaj Moisés, yéetel Aarón, jach je'el bix a'ala'abic ti' Moisés tumen Yuumtzile'. 38U paalal Jersón, tu tzoolol u cajnáalilo'ob u yotochnáalo'ob, 39je'enque'ex yaan treinta tac cincuenta u ja'abilo'ob nu'ucano'ob u ti'al meyaj tu noj Paselil Much'tale', 40dos mil seiscientos yéetel treinta. 41Lelo' leti' tu pa'ate'il ca'ach u ch'i'ibal Jersón cu páajtal u meyajo'ob tu noj Paselil Much'tal je'el bix le dzíibil kaaba' tu beetaj Moisés yéetel Aarón yáanal u tzolbe'en t'aan Yuumtzil. 42U paalal Merari' tu tzoolol u ch'i'ibalo'ob u yotochnáalo'ob, 43je'enque'ex yaan treinta tac cincuenta u ja'abilo'ob nu'ucano'ob u ti'al u meeyjul u noj Paselil Much'talo', 44tres mil yéetel doscientos. 45Lelo' leti' tu pa'ate'il ca'ach u paalalo'ob Merari' cu páajtal u meyajo'ob tu noj Paselil Much'tal, je'el bix le dzíib tu beetaj Moisés yéetel Aarón jach tu ya'alajilac Yuumtzil ti' Moiseso'. 46Tuláacal le j levitaob j xo'oc tumen Moisés, Aarón yéetel u nuuquilo'ob Israel tu tzoolol u cajnáalilo'ob yotochnáalo'ob, 47je'enque'ex yaan ca'ach treinta tac cincuenta u ja'abilo'ob nu'ucano'ob u ti'al u meeyjul u noj Paselil Much'tale', 48ocho mil quinientos ochenta. 49Lela' leti' le dzíibil kaaba'ob beeta'ab je'el bix tu ya'alajilac Yuumtzil ti' Moisés, bey xan j a'ala'ab ti' jujun túulil ba'ax bíin u beet yéetel ba'ax bíin u cúuch queléembalt je'el bix a'ala'abic tumen Yuumtzil ti' Moisese'.
Currently Selected:
Números 4: MAYADC
Highlight
Copy
Compare
Share
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.
