Números 16
16
U x ma' u'uyajt'aanil Coré yéetel u jaadzil
1Jun túul j levie' ti' u ch'i'ibal Coate', cu kaaba'intic Coré u paal Ishar, yéetel u láak óox túul máaco'ob ti' u ch'i'ibalo'ob Rubene', cu kaaba'intico'ob Datán yéetel Abiram, u paalo'ob Eliab, yéetel On u paal Pelet, 2lik óolnajo'ob tu táan Moisés. Yéetelo'obe' tu nupajuba'ob u láak doscientos cincuenta israelitaob, máaco'ob yaan páajtalil ti'ob te ichil le caajo', le yano'ob ca'ach ichil le tzol xiquino'obo' tzica'ano'ob tumen le caajo'. 3Tuláacalo'obe' tu much'ajuba'obe' ca tu nactáantajo'ob Moisés yéetel Aarón, ca tu ya'alajo'ob ti'ob: ¡Waye' mix máaque'ex! tuláacal le caajo' dzo'oc u jun páaycunta'al tumen Ku, Yuumtzile' ti' yaan t éetele' ¿Ba'axten ca líikile'ex yéetel nojoch páajtalil tu yóokol u caajal Yuumtzil?.
4Ca tu yu'ubaj, Moisese' chinlaj tac u cóojol u táan óolal j lu'um, 5ca tu ya'alaj ti' Coré yéetel le máaxo'ob tzay pachto'obo'; piknal sáamale' Yuumtzile' bíin u ye'es máax u ti'al, yéetel máax jun páaycunsa'an yaan u páajtalil u ti'al u kubic le ti'ibil óolalo'. Chéen le máax bíin u yéeye' cu páajtal u kubic le ti'ibil óolalo'. 6Beete'ex lela': taase'ex u x p'uuluto'ob Coré yéetel le máaxo'ob yaan yéetelo', 7dza'ex chúuqui', láale'ex poomi', sáamale' tzole'exo'ob tu táan Yuumtzil, le máac bíin u yéey Yuumtzile', leti' jun páaycuna'an. ¡J levitaex tac way cu xu'ulule'!
8Cu dzo'ocole' Moisese' tu ya'alaj ti' Coré: j Leviex u'uyene'exi': 9¿Ca tucultique'ex wa jun p'íit ba'ax tu beetaj u Kuil Israel úuchic u yéeyique'ex ichil u caajil Israel, ca yanaque'ex naadz ti' leti' u ti'al a beete'ex u meeyjul u quili'ich naj Yuumtzil yéetel beyo' ca meyajtique'ex xan le caajo'? 10Yuumtzile' tu yóoltaj ca yanaquech naadz ti' yéetel tuláacal ch'i'ibalo'ob, le j levitaobo' ¿bejela'e' ca yaayamtique'ex xan a beeticaba'ex le aj kiinil? 11Tu jaajile' Aarone' mix máac u ti'al ca t'aanaque'ex kaas tu yo'olal; teech yéetel le u láak máaco'obo' ta beetaje'ex u p'u'ujul Yuumtzil.
12Cu dzo'ocole' Moisese' tu túuchi'itaj t'antbil Datán yéetel Abirán, u paal Eliab, leti'obe' tu núucajo'ob: ma' c káat j bini'. 13¿Ca tuclic jun p'íit ba'al ta beetaj úuchic a jóokesico'on ti' jun p'éel caaj tu'ux u kaab iim yéetel caab cu yáalcab bey ja'e', u ti'al ca a taaso'on j quíimil te x tocoy lu'uma', cu dzo'ocole' a káat a beetabáa nojochil t óokole'? 14Teche' ti' mix jun p'éel caaj a biso'on tu'ux u kaab iim yéetel caab cu yáalcab bey ja'e' mix a dzáato'on lu'umi' mix u pakalilo'ob uva. ¿A káat ca p'áatac tuláacale' ca bisa'aco'ob beyo'ob ch'óope'? Ma', ma' t bin c ilech.
15Moisés túune' sen kuuxchaje' ca tu ya'alaj ti' Yuumtzil: ¡Ma' a kamic u ti'ibil óolalo'ob! Tene' ma' in lukes ti'ob mix jun túul burro, mix in beet kaas ti' mix jun túul ti'obi'.
16Cu dzo'ocole' Moisese' tu ya'alaj ti' Coré: Ca'a taalaquech sáamal teech yéetel u láak máaco'ob tu táan Yuumtzil. Ti' bíin yanac xan Aaroni'. 17Jujun túulil u bis u x p'uulut ca u dzáa poomi'. Teech yéetel Aarone' yaan xan a bisique'ex a x p'uulute'ex u ti'al a dza'ex, tu tzéel u láak doscientos yéetel cincuenta x p'uuluto'ob, tu táan Yuumtzil.
18Jujun túul túune' tu ch'aj u x p'uulut, ca tu dzáa chúuc yéetel poomi' ca tu nadzajuba'ob tu tzéel Moisés yéetel Aarón tu táan u noj Paselil Much'tal. 19Coree' dzo'oc ca'ach u much'quintic le caajo' u ti'al ca yanaco'ob yéetele' actáan ti' u noj Paselil Much'tal. U nojbe'enil Yuumtzil chíicpaj túun tu táan tuláacal le caajo'. 20Yuumtzile' tu ya'alaj ti' Moisés yéetel ti' Aarón: 21¡Tzelaba'ex ti' le caajo', tumen bin in ca'aj in xu'uls jun súutuc!
22Ba'ale' leti'obe' chinlajo'ob, u táan poolo'ob t'áal tac lu'um, ca tu ya'alajo'ob: In Ku teech máax dzáic cuxtal ti' tuláacal máac. ¿Tu yo'olal u keban chéen jun túul máaque', ca p'u'ujul yéetel tuláacal le caaja'?
23Yuumtzile' tu núucaj ti' Moisés: 24A'al ti' tuláacal le j israelitaobo' ca u tzeluba'ob tu pasel Datán yéetel Abiramo'.
25Moisese' j líik yéetel u nuuquilo'ob Israel ca j bíin tu'ux yaan Datán yéetel Abiram. 26Ca tu ya'alaj ti' le caajo': Tzelaba'ex tu paselo'ob le kaakas máaco'obo', yéetel ma' a machique'ex mix ba'al u ti'alo'ob, ma' xan ca quíimique'ex tu yo'olal u kebano'obi'.
27Le caajo' tu tzelajuba'ob tu'ux yaan Coree', Datán yéetel Abiram. Datán yéetel Abirame' ti' yano'ob ca'ach tu jool u paselo'ob pa'ate' yéetel u yatano'ob yéetel u paalalo'obe'. 28Moisese' tu ca'a a'alaj: yéetel lela' quin we'esic u chíiculal u túuxtmailen Yuumtzil u ti'al in beet le ba'alo'oba', u ti'al ca a wile'ex ma' chéen tu juunal in wóol quin beetiqui'. 29Wa le máaco'ob cu quíimilo'ob chéen je'el bix u quíimil je'el máax u láak máaquilo'obe', bíin chíicpajac ma' u túuchi'itmen Yuumtzili': 30Ba'ale' wa Yuumtzil cu beetic jun p'éel jak óol chíiculal, yéetel cu je'ic u chi' le lu'umo' u ti'al u lu'ukulo'ob yéetel tuláacal ba'ax yaan ti'ob yéetel cu lúubulo'ob cuxa'ano'ob tu taamil le lu'umo', beyo' bíin a wojéelte'ex leti' le máaco'oba' tu tzelajo'ob Yuumtzil.
31Ca'aj dzo'oc u t'aan Moisese', je'epaj le lu'um tu yáanalo'obo' 32ca tu lukaj tuláacal le máaco'ob tu nupajuba'ob ti' Coré, pa'ate' yéetel u yotochnáalo'ob yéetel tuláacal ba'ax yaan ti'ob. 33J lúubo'ob cuxa'ano'ob tu taamil le lu'umo' pa'ate' yéetel tuláacal ba'ax yaan ti'ob ca'achi, ca j núup' le lu'um tu ca'a téeno'. Bey tzelico'obo' ichil le j israelitaobo'. 34Le ca'a u'uya'ab táan u yawato'obe', tuláacal le j israelitaob yano'ob tu bakpacho'obo' jóoko'ob áalcabil táan u ya'alico'ob: ¡bíin u luuko'on xan le lu'umo'! 35Cu dzo'ocol xane' Yuumtzile' tu túuchi'itaj jun p'éel káak ca tu quíimsaj le doscientos cincuenta Máaco'ob tu kubajo'ob ca'ach le poomo'.
36Yuumtzile' tu t'anaj Moisés ca tu ya'alaj ti': 37A'al ti' Eleazar, u paal Aarone' ca u jóokes le x p'uuluto'ob ichil le ba'axo'ob j p'at ti' le tóoco', ca u pul náach le t'aba'an chuc p'áatalo'. 38U x p'uuluto'ob le máaco'ob dzo'oc u quíimilo'ob tu yo'olal u kebano'obo', dzo'oc u p'áatalo'ob jun páaycunta'ano'ob iquil úuchic u kubico'ob poom tin táan. Jaycunta'aco'ob u jaajay laminailo'ob u ti'al u ba'alal u multuunil kultaj, u ti'al ca ila'ac bey jun p'éel ka'ajsaj iik tumen tuláacal le j israelitaobo'.
39Eleazar le aj kiino' tu molaj le x p'uuluto'ob bronce u ca'ajo', tu'ux ca'ach tu kubajo'ob le poom le máaco'ob j quíimo'ob ti' le tóoco' ca tu ya'alaj ca jaycunta'aco'ob u ti'al u ba'alal u multuunil kultaj. 40Lela' u ti'al ka'ajsaj iik ti' le j israelitaobo' u ti'al ma' u náadzal mix máac u kub poom tu multuunil kultaj ti' Yuumtzil wa ma' sijnal ti' u ch'i'ibal Aarón, wa u láak cu beetique' bíin úuchuc ti' le ba'ax úuch ti' Coree' yéetel u láako'obo'. Tuláacal beeta'ab jach je'el bix u ya'almajil Yuumtzil ti' Eleazar tu chi' Moisese'.
41Tu láak kiine', tuláacal u caajil Israele' jo'op' ya'alico'ob ba'al ti' Moisés yéetel ti' Aarón. Cu ya'alico'ob beya': ¡Te'exe' táan a quíimsique'ex u caajal Yuumtzil!
42Tuláacalo'ob tu bakpachto'ob Moisés yéetel Aarón; ba'ale' leti'obe' bino'ob tu noj Paselil Much'tal. Ti' le súutuco' chíicpaj u nojbe'enil Yuumtzil. 43Moisés yéetel Aarón túune' j bino'ob actáan ti' u noj Paselil Much'tal, 44Yuumtzile' tu ya'alaj ti' Moisés: 45¡Tzelaba'ex ichil tuláacal le máaco'obo' tumen bin in ca'aj in xu'ulso'ob ti' le súutuca'! Moisés yéetel Aarone' chinlajo'ob tac u cóojol u táan poolo'ob j lu'um, 46Moisese' tu ya'alaj ti' Aarón taas a x p'uulut, dzáe u chúuquil u multuunil kultaj ca a láal poomi'; ca séeb xi'iquech tu'ux yaan le caajo' ca a káat ti' Ku u sa'atsaj u si'ipilo'ob, tumen dzo'oc u sen p'u'ujul Yuumtzil táan u cáajal u báan quíimilo'ob.
47Aarone' tu beetaj le ba'ax tu ya'alaj Moiseso' ca j bin áalcabil tu'ux much'ucbal le caajo'. Kue' dzo'oc u túuxtic le báan quíimil ichil le caajo'. Aarón túune' tu dzaj poomi' ca tu káataj ti' Ku u sa'atsaj si'ipil le caajo'. 48Cu dzo'ocole' tu dzajubáa' chúumuc ti' le dzo'oc u quíimilo'ob yéetel le cuxa'ano'obo', le báan quíimilo' jáawi. 49Ba'ale' dzo'oquili' u quíimil catorce mil yéetel setecientos máaco'ob, jun páay le yáax quíimo'ob tumen tu much'ajuba'ob le ca j líik Coree'. 50Le ca'aj xu'ul le báan quíimilo' Aarone' suunaj tu jool u noj Paselil Much'tal u ti'al u much'tal yéetel Moisés.
Currently Selected:
Números 16: MAYADC
Highlight
Copy
Compare
Share
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.
