Éxodo 4
4
1Moisés túune' tu núucaj:
Leti'obe' bíin u tuuculo'ob táan in tusico'ob, ma' bíin u táan óolteno'obi'. Ba'ale' bíin u ya'alo'ob: Yuumtzile' ma' chíicpajac techi'. 2Yuumtzil túune' tu káat chi'itaj ti': ¿Ba'ax le yaan ta kabo'?
Moisese' tu núucaj: Jun p'éel Xóolte'.
3Yuumtzile' tu ya'alaj ti': Pul te j lu'umo'.
Moisese' tu pulaj te j lu'umo', tu séeblaquil suunaj jun túul caan le xóolte'o'. Moisese' j lacchaj u yáalcab u ti'al u náachtal ti', 4ba'ale' Yuumtzile' tu ya'alaj ti':
Tich' a kabe' ca mach tu nej. Moisese' tu tich'aj u kab, le ca tu machaj le caano', j suunaj xóolte'il tu ca'a téen.
5Tu ya'alaj Yuumtzil: Lela' u ti'al ca u yocsaj óolto'ob dzo'oc u chíicpajal teech Yuumtzil u Junab Ku a j máanjan ch'i'ibalo'ob, u Ku Abraham, u Ku Isaac, u Ku xan Jacob. 6Yuumtzile' tu ya'alaj ti': Bejela'e' oques a kab ta tzeem.
Moisese' tu yocsaj u kab tu tzeem, ba'ale' le ca tu jóokesaje', tu yilaj yaan u koja'anil jáaway ti', sac bey bate'. 7Ku túune' tu ya'alaj ti': Oques tu ca'a téen a kab ta tzeem.
Moisese' tu beetaj beyo', le ca tu jóoksaj tu ca'a tene', dzo'oc u yutztal je'el bix tuláacal u wíinclile'. 8Cu dzo'ocole' j a'ala'ab ti' tumen Yuumtzil:
Wa yéetel le yáax chíiculalal ma' tu táan óoltique'echo'ob mix tu yu'ubico'ob ba'ax ca wa'alique', je'el túun u táan óoltiquecho'ob yéetel le ca'a chíiculalo'; 9Ba'ale' wa ma' tu yocsaj óoltiquecho'ob mix tu táan óoltiquecho'ob mix yéetel le ca'a p'éel chíiculala', jóokes u ja'il le áalcab ja'o', wec te j lu'umo'. Le quéen cóojoc le ja' te j lu'umo', cu suut ki'ikil.
10Moisese' tu núucaj: ¡Waay! In Yuumtzil, tene' ma' t'áalcab in t'aani', cu dzo'ocole' lela' ma' jo'olojbe'eni', mix táantac yúuchul teen iquil a t'aan yéetel a palitzila', le ba'ala' jun p'éel ba'al úuchben. Je'el jay téen ca t'aanaquene' cu t'i'ilil in waak.
11Ba'ale' Yuumtzile' tu núucaj:
¿Máax dzáamail u chi' le máaco'? ¿Ma' wa teen le máax beetic u toottal, u cóoctal, u ch'óoptal wa ca paacatnac? 12Bey túuno', xeen, tumen teen bíin yanaquen ta wéetel, le quéen t'aanaqueche' bíin in ca'ans teech ba'ax unaj a wa'alic.
13Moisese' tu pechajubáa u ya'al:
¡Waay! Yuumtzil, beet utz a túuxtic u láak wa máax.
14Yuumtzil túune' j kuuxilnaj yéetel Moisés ca tu ya'alaj ti':
¡Te'elo' ti' yaan a sucu'un Aarón j levita! in wojel jach ma'alob u t'aan. U láak ba'ale' táan u taal u nactáantech, yaan u sen qui'imacchajal u yóol le quéen u yilech. 15T'aanen yéetel, tzol ti' tuláacal le ba'ax yaan a wa'ale'; teen xane' yaan in wantal ta wéetele'ex le quéen t'aananque'exe', bíin in nu'ucte'ex ba'ax unaj a beetique'ex. 16Teche' yaan a wa'alic ti' Aarón le ba'ax bíin in wa'al teche', Aarone' yaan u ya'alic ti' le caaj le ba'ax bíin a wa'al ti'e'. 17Bis le xóolte'a', tumen yéetel bíin a beet jak óol ba'alo'ob.
Moisese' ca'a suunaj Egipto
18Moisese' j suunaj tu yotoch Jetro u suegroe' ca tu ya'alaj ti':
Yaan in suut Egipto tu'ux yaan in láako'ob in wéet ki'ikelo'ob. In káat in wila'a wa láili' cuxa'ano'obe'.
Jetroe' tu núucaj: Xi'ic teech utzil.
19Ca'aliquil ti' yaan ca'ach Moisés tu lu'umilo'ob Madiane', Yuumtzile' tu ya'alaj ti':
Suunen Egipto tumen dzo'oc u láaj quíimil le máaxo'ob u káato'ob u quíimsecho'ob ca'acho'.
20Moisés túune' tu ch'a'a u yatan yéetel u paale',#4.20 U paal: tu t'aanil Hebreoe' míin u káat u ya'al u paalalo'ob. ca tu na'acsajo'ob yóokol jun túul burro, ca j suunaj Egipto. Tu bisaj xan tu kab u xóolte' Ku. 21Cu dzo'ocole' Yuumtzile' tu ya'alaj ti' Moisés:
Le quéen kuchquech Egiptoe', qui' il a wil a beetic tu táan faraón le máactzilo'ob dzo'oc in dzáic teech u páajtalil a beetica'. Tene' yaan in beetic u pechicubáa u ti'al ma' u cha'ic u jóokol le j israelitaobo'. 22Teech túune' bíin a wa'al ti' faraón: Bey u ya'alic Yuumtzila': Israele' u nojochil in paal. 23Dzo'oc in wa'alic teech ca cha'a' u jóokol in paal u ti'al ca xi'ic u kulten; ba'ale' tu yo'olal ma' a cha'a' u jóokole', bin in caaj in quíims a nojoch a paal.
24Ti' jun p'éel cúuchil te j bejo' tu'ux ca'ach cun u máans áakab Moisés yéetel u yatan bey xan u paale', j jóok Yuumtzil u nactáant Moisés ca j máan u quíimsic. 25Séfora túune', tu ch'a'a jun p'éel tuunich yaan u yeje' ca tu xotaj u yoot'el u j xiibil u paal; cu dzo'ocole' tu machaj u yoot'el u j xiibil le chan xi'ipalo' tu cu'ultaj tu yooc Moisés ca tu ya'alaj ti': Tu jaajile' jun túulech ki'ikel íicham in ti'al.
26Yuumtzil túune' tu p'ataj u bin Moisés. Séfora xane' tu ya'alaj j ki'ik íichamil ti' Moisés tu yo'olal le súut kuptajo.
27Ca'aliquil Yuumtzile' dzo'oc u ya'alic ti' Aarón: Xeen a nactáantabáa yéetel Moisés te x tocoy lu'umo'. Aarone' j bine' ca tu nactáantaj Moisés tu witzil Ku. Te'elo' tu te'escuntaj yéetel jun p'éel dzu'udz 28Moisés túune' tu tzicbaltaj ti' Aarón tuláacal le ba'ax tusbelta'ab ti' tumen Yuumtzil ca u ya'ale', bey xan le nucuch jak óolal ba'alo'ob a'ala'ab ti' ca u beete. 29Cu dzo'ocole' j bino'ob tu ca'a túulilo'ob u much'quinto'ob u nuuquilo'ob Israel, 30Aarone' tu tzicbaltaj tuláacal le ba'ax tu ya'alaj Yuumtzil ti' Moisese', tu beetaj xan tu táan le máaco'ob le jak óolal ba'alo'ob tu ya'alaj Ku ca u beeto'.
31Le máaco'obo' tu táan óolto'ob. Le ca tu yojéeltajo'ob xan dzo'oc u táan óolta'alo'ob tumen Yuumtzil, yéetel dzo'oc u yila'al bix u mukyajo'obe', j chinlajo'ob u kulto'ob Ku.
Currently Selected:
Éxodo 4: MAYADC
Highlight
Copy
Compare
Share
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.
