Éxodo 39
39
Bix beeta'abic u nook aj kiino'ob
(Ex 28.1-43)
1Le jit'bil nook u ti'al u meeyjul le quili'ich najo', beeta'ab yéetel chacpuke'en nook, chacjome'en nook yéetel chac nook. Láili' bey beeta'abic le nook chéen u ti'al Aarón je'el bix u ya'almajil Yuumtzil ti' Moiseso'.
2U ti'al u beeta'al le efodo', meyajta'ab oro, chacpuke'en nook, chacjome'en nook, chac nook yéetel jaxbil lino. 3J ba'axo'ob yéetel x bajab jujun p'éel u xamachilo'ob oroe', ca j kosla'anta'abo'ob bey bekech suum u ti'al jit'bil bey but' chuuy yóokol chacpuke'en nook, chacjome'en nook, chac nook yéetel jaxbil lino. 4Dzaab ca'a p'éel u kaxabilo'ob le efod tu ca'a xuul u jáalo'ob. 5Le kax nak cu bin yóokol u ti'al machico', beeta'ab beya': yéetel oro, chacpuke'en nook, chacjome'en nook, chac nook yéetel jaxbil lino jach je'el bix tu ya'alajil Yuumtzil ti' Moiseso'.
6U jadzutz tuunichilo'ob cornalinaobe', j pedzo'ob yóokol u t'ilcunajilo'ob oro, dzíibta'an yóokolo'obe' u kaaba'ob u paalal Israel je'el bix u dzíibil x dzalabe'. 7Cu dzo'ocole' Bezaleele' tu dzáalantaj yóokol u x kaxabilo'ob le efod u ti'al u ka'ajsa'al u paalal Israel je'el bix tu ya'alajil Yuumtzil ti' Moiseso'.
8Le pix tzeemo', beeta'an xan ca'ach je'el bix le efodo': beeta'ab yéetel oro, chacpuke'en nook, chacjome'en nook, chac nook yéetel jaxbil lino. 9Ca'a ya'al, can ti'itz yéetel cu p'isic veinte yéetel ca'a p'éel centímetros u jujun tzéelilo'ob. 10To'a'an yéetel can tzol jadzutz tuunicho'ob: yáax jun tzole' dza'an ca'ach jun p'éel rubí, jun p'éel crisólito yéetel jun p'éel esmeralda; 11u ca'a tzole', jun p'éel granate, jun p'éel safiro yéetel jun p'éel jade; 12u yóox tzole', jun p'éel jacinto, jun p'éel ágata, yéetel jun p'éel amatista; 13u can tzole', jun p'éel topacio, jun p'éel cornalina yéetel jun p'éel jaspe 14doce le tuunicho'ob ca'acho', tumen doce u paalal Israel; ti' le doce tuunicho'obo' dzíibta'an u doce kaaba'ob u ch'i'ibalo'ob Israel je'el bix u yanil u dzíibil x dzalabe'
15Yóokol le pix tzeemo', beeta'ab jujun p'éel x jokenjooko'ob yéetel chéen oro ch'ota'ano'ob bey jaxbil kuche'. 16Beeta'ab xan ca'a p'éel t'ilcunajo'ob yéetel ca'a p'éel x julubo'ob yéetel oro, j dzaab le x julubo'ob beeta'ano'ob yéetel oro tu xuulo'ob u ca'a tzéelil le pix tzeemo', 17ca j dzaab le x jokenjooko'ob beeta'ano'ob xan láili' yéetel oro yóokol le x julubo'obo'. 18U ni'ob le x jokenjooko'obo', j dzaabo'ob yóokol u t'ilcunajilo'ob le oro, ca kaxláanta'abo'ob tu x kaxabilo'ob le efod yaan tu táano'. 19Beeta'ab xan u láak ca'a p'éel x julubo'ob, ca dzaabo'ob tu caablil le piix tzeem yóokol u sáabchi' yaan ichil cu p'áatal tu tzéel le efodo'. 20Beeta'ab u láak ca'a p'éel x julubo'obe' ca j dzaabo'ob tu táanil u x kaxabilo'ob le efodo', ba'ale' tu yáanal, tu tzel u but' chuuyilo'ob jun p'íit ca'anlil ti' u kax nakil le efodo'. 21Cu dzo'ocole' u x julubilo'ob le pix tzeem yéetel u x julubilo'ob le efodo', nu'upo'ob yéetel jun p'éel chacpuke'en jaxbil lino, u ti'al ca p'áatac le pix tzeem jun p'íit ca'anlil ti' u kax nakil le efodo', yo'olal ma' u náachtal ti' je'el bix u ya'almajil Yuumtzil ti' Moisese'.
22Tuláacal u x suyem le efodo', j beeta'ab yéetel jit'bil chacpuke'en nook. 23Chúumuc u sáabchi' u caalile', paca'an ca'ach je'el bix u pa'acal u sáabchi' le búuco'ob beeta'ano'ob yéetel kéewele', tu yo'olal ma' u jáatal. 24Jadzutzquinta'ab u sáabchi' le suyem yéetel u wóolis ba'alilo'ob chacpuke'en nook, chacjome'en nook, chac nook yéetel jaxbil lino. 25Beeta'ab xan mejen campanaob oro u ca'aje' ca j tzoláanta'abo'ob tu pa'ate'il chúumuc ti' le wóolis ba'alo'ob ti' tuláacal u bak paach u sáabchi' 26u suyemil le quili'ich meyajo': jun p'éel chan campana jun p'éel chan wóolis ba'al, u láak chan campana, u láak chan wóolis ba'al je'el bix tu ya'alajil Yuumtzil ti' Moiseso'.
27Le suyemo'ob lino u caajo'ob u ti'al Aarón yéetel u paalalo'obo', beeta'abo'ob tumen jun túul aj jit', 28bey xan le pix jo'ol, u nu'uculo'ob u dza'abal le pix jo'olo', yéetel u xut' eexilo'ob jaxbil lino, 29le kax nak beeta'an yéetel jaxbil lino, chacpuke'en nook, chacjome'en nook yéetel chac nook but' chuyta'an je'el bix tu ya'alajil Yuumtzil ti' Moisese'.
30Beeta'ab xan yéetel chéen oro u xamachil jun páaycunaj u ti'al aj kiine', ca dzíibta'ab yóokol je'el bix dza'anil u dzíibilo'ob x dzalabe', bey u ya'alic u dzíibila': Jun páaycuna'an u ti'al Yuumtzil. 31Cu dzo'ocole' ca j dzaab u chacpuke'en jaxbil lino u ti'al u dza'abal le xamach yóokol le pix jo'ol tu ca'anlil je'el bix tu ya'alajil Yuumtzil ti' Moiseso'.
Cu dzo'ocsa'al u beeta'al le quili'ich najo'
(Ex 35.10-19)
32U meeyjul le quili'ich naj, u noj Paselil Much'tal yéetel Ku, j kuch u kiinil u dzo'ocol. Le j israelitaobo' tu beetajo'ob jach je'el bix tu ya'alajil Yuumtzil ti' Moiseso', 33Ku'ub ti' Moisés le quili'ich naj, u noj Paselil Much'tal, yéetel tuláacal u nu'uculo'obo': u x léechebilo'ob, u bujbil che'ilo'ob, u x katáabilo'ob, u yocomilo'ob yéetel u nu'ucul u yedztalo'ob, 34Le piix beeta'an yéetel u kéewelilo'ob j taman chac bona'anil, le piix beeta'an yéetel ma'alob kéewelo'obo', le x káasab u ti'al pixic le ba'asche'o', 35U ba'asche'il le nup t'aan yéetel u x katáabilo'ob, le maaco', 36Le táasche' yéetel tuláacal u nu'uculo'ob, le waaj cu jun páaycunta'al u ti'al Yuumtzilo', 37le x t'uchub sáas beeta'an yéetel oro u ti'al sáascunaj, u káat ya'ale' le sáaso'ob unaj u ma'alob tzola'antalo'ob yéetel u nu'uculo'ob; le aceite u ti'al sáasilcunajo', 38le u multuunil kultaj beeta'an yéetel oroo', u aceiteil jun páaycunaj, le qui'iboc poomo', le x káasab u ti'al u jool u noj Paselil much'tal, 39le multuunil kultaj bronce u ca'ajo' yéetel nu'ucul u káabta'al bak láili' bronce u ca'aje', u x katáabilo'ob yéetel tuláacal u nu'uculo'ob, le cáat yéetel u nu'ucul u yedztalo', 40le káasabilo'ob u ti'al le x péet paacho', u yocomilo'ob yéetel u nu'ucul u yedztalo'ob, le káasab u ti'al u jool najil le x péet paacho', le suumo'ob yéetel le dzop che'ob u ti'al le péet paacho', tuláacal le nu'uculo'ob u ti'al u meeyjul le quili'ich najo', 41u jit'bil nookil u ti'al u meeyjul kultaj te j quili'ich najo', le nook chéen u ti'al aj kiin Aarono', yéetel u nookil u beetico'ob u aj kiinil u paalal.
42Le j israelitaobo' tu beetajo'ob jach je'el bix tu ya'alajil Yuumtzil ti' Moiseso', 43le ca tu yilaj Moisés dzo'oc u beetico'ob beyo' tu qui' t'antaj.
Currently Selected:
Éxodo 39: MAYADC
Highlight
Copy
Compare
Share
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.
