Éxodo 35
35
U ya'almaj t'aanil sábado
(Ex 31.12-17)
1Moisese' tu much'quintaj tuláacal u caajil Israele' ca tu ya'alaj ti'ob: Yuumtzile' dzo'oc u túuchi'itic le a'almaj t'aano'oba': 2Bíin páatchajac u yúuchul meyaj seis kiino'ob, ba'ale' u siete kiine', jun p'éel u kiinil quili'ich sábado a ti'ale'ex u ti'al u tziiquil Yuumtzil. Je'el máax bíin meyajnac ti' le kiino' yaan u xot kíinta'al, yaan u quíimil. 3Tuláacal tu'ux bíin cajlaque'exe', mix unaj a t'abique'ex káak sábadoi'.
U ti'ibil óolalo'ob u ti'al u beeta'al quili'ich naj
(Ex 25.1-9)
4Moisese' tu t'anaj tuláacal u caajil Israele', ca tu ya'alaj ti'ob: Lela' leti' le ba'ax tu túuchi'itaj Yuumtzil ca beeta'aca': 5Mole'ex ichile'ex jun p'éel ti'ibil óolal u ti'al Yuumtzil. Tuláacal le máaxo'ob u káato'ob u dza'ob ti'ibil óolalo'ob ti' Yuumtzil tu jaajil yóolo'obe', Unaj u taasico'ob oro', plata, bronce, 6chacpuke'en nooko'ob, chacjome'en nooko'ob, chac nooko'ob, ma'alob lino, u tzo'otzel j x yuuc, 7u kéewelilo'ob j taman chac bona'anil, ma'alob kéewelo'ob, u che'il acacia, 8aceite u ti'al le sáaso'obo', u nu'uculilo'ob u ti'al u qui'iboquinta'al aceiteil jun páaycunaj yéetel u ti'al u qui'iboccunta'al poom, 9U jadzutz tuunichilo'ob cornalina yéetel u láak qui'ichquelem tuunicho'ob u ti'al t'ilcuntbil ti' le efodo' yéetel u pix tzeem le nojoch aj kiino'obo'.
U nu'uculo'ob le quili'ich najo'
(Ex 39.32-43)
10Tuláacal le máaxo'ob yaan ti'ob u na'atil u beeta'al jadzutz ba'alo'obe', unaj u taalo'ob u beeto'ob le ba'ax dzo'oc u ya'alic Yuumtzilo': 11le quili'ich naj yéetel u chuybil najil, u piix le najo', u x jookobilo'ob, u bujbil che'ilo'ob, u x katáabilo'ob, u yocomilo'ob yéetel u nu'ucul u yedztalo'ob, 12le ba'asche'o', u x katáabilo'ob yéetel u maac, le chuybil káasab balic le ba'aso', 13le mayac che'o', u x katáabilo'ob yéetel u nu'uculo'ob, le waaj cu jun páaycunta'al u ti'al le Yuumtzilo', 14le x t'uchub sáas u ti'al sáascunajo', u nu'uculo'ob yéetel u sáasilo'ob, u aceiteil le sáasilo'obo', 15le u multuunil kultaj u ti'al poom yéetel u x katáabilo'obo', le aceite u ti'al jun páaycunajo', le qui'iboc poomo', le káasab nook u ti'al u jool le quili'ich najo', 16u multuunil kultaj u ti'al tóocbil ti'ibil óolal yéetel u x póocobil bronce u ca'aj, u x katáabilo'ob yéetel tuláacal u nu'uculo'ob, le cáat yéetel u nu'ucul u yedztalo', 17le chuybil káasab nooko'ob u ti'al le táancabo', u yocomilo'ob yéetel u nu'ucul u yedztalo'ob, le chuybil káasab u ti'al u jool najil le táancabo', 18le x dzop che'ob u ti'al le quili'ich naj yéetel u táancabilo', bey xan u suumilo'ob, 19u jit'bil nookil u ti'al u meeyjul kultaj te j quili'ich najo', u quili'ich nook aj kiin Aarón, yéetel u nookil u beetico'ob u aj kiinil u paalal.
U caajil Israele' cu taasic ti'ibil óolal u ti'al le quili'ich naj
20Tuláacal u cajnáalil Israele', j luko'ob tu yicnal Moisés, 21cu dzo'ocole', tuláacal le máaxo'ob tu yu'ubajo'obe' péecnaj u pucsi'ikalo'ob yéetel jaaj óolal, j suunajo'ob yéetel u ti'ibil óolalo'ob ti' Yuumtzil u ti'al u beeta'al u najil le nuptáantbal yéetel tuláacal le ba'ax kabéet, bey xan le nook chéen u ti'al le aj kiino'obo'. 22Taal j xiibo'ob yéetel co'olelo'ob, tu taasajo'ob tu juunal yóolo'ob yéetel chuca'an óolal x ch'iquibo'ob, x dzipito'ob, x bakalkabo'ob, tuupo'ob oro u ca'ajo'ob, yéetel tuláacal u ba'alilo'ob oro. Tu jujun túulilo'obe' tu taasajo'ob le ti'ibil óolal oro u jóokesmajo'ob u ti'al Yuumtzilo'. 23Tuláacal le máaxo'ob yaan ti'ob chacpuke'en nook, chacjome'en nook, chac nook, ma'alob lino, u tzo'otzel x yuuc, u kéewelilo'ob j taman chac bona'an wa ma'alob kéewelo'obe' tu taasajo'ob. 24Le máaxo'ob u jóokesmajo'ob, plata wa quex bronce u ti'al ti'ibil óol ti' Yuumtzile', cu taasico'ob ca'ach ti' Yuumtzil; bey xan le máaxo'ob yaan u che'il acacia ti'obe', tu taasajo'ob xan u ti'al u beeta'al tuláacal le ba'axo'ob kabéeto'. 25Le co'olelo'ob yaan u kabil jit' ti'obo', cu taasico'ob ca'ach u jiit'il chacpuke'en nook, chacjome'en nook, chac nook yéetel ma'alob lino; 26Bey xan le co'olelo'ob yaan u kabil jaax ti'ob j ooc tu yóolo'obo', tu jaxo'ob u tzo'otzel x yuuc. 27U nuuquilo'ob le caajo' tu taaso'ob u jadzutz tuunichilo'ob cornalina yéetel u láak ma'alob qui'ichquelem tuunicho'ob u ti'al t'ilcuntbil ti' le efod yéetel le pix tzeem u ti'al le nojoch aj kiino'obo', 28qui'iboc ja', aceite u ti'al sáasil, bey xan u ti'al u aceiteil jun páaycunaj yéetel u ti'al qui'iboc poom.
29Tuláacal u j xiibilo'ob yéetel u co'olelilo'ob Israel tu yu'ubajo'ob u dzíibolalil u yáantajo'ob u ti'al u beeta'al ba'ax tu ya'alaj Yuumtzil ti' Moiseso', tu taasajo'ob tu juunal yóolo'ob ti'ibil óolal ti' Yuumtzil.
Máaxo'ob dza'an ti'ob u kabil u beeta'al jadzutz ba'alo'ob
(Ex 31.1-11)
30Moisese' tu ya'alaj ti' le j israelitaobo': Ile'ex, Yuumtzile' dzo'oc u yéeyic Bezaleel u paal Uri u yáabil Hur ti' u ch'i'ibalo'ob Judá, 31Bey xan dzo'oc u chupic yéetel u pixan Ku, bey yéetel ojéelalil, na'atil, kaj óolalil yéetel u páajtalil u beetic túumben ba'alo'ob, 32bey je'el bix nu'uc dzíibil, yéetel u meyajtic oro, plata, bronce, 33u jadzutz t'óoja'al qui'ichquelem tuunich yéetel u meyajta'al, u ti'al u jadzutz t'óoja'al che', yéetel je'el ba'alac u láak jadzutz meyajile'. 34Dzo'oc xan in dzáic páajtalil ti' u ti'al u ca'ansaj. Leti' yéetel Aholiab u paal Ahisamac sijnal tu ch'i'ibalilo'ob Dane', 35dzo'oc in dzáic ti'ob u kabil u beetico'ob jadzutz ba'alo'ob, u ti'al u beetico'ob je'el ba'alac jadzutz t'óojbil qui'ichquelem tuunich yéetel u but' chuuyil chacpuke'en nook, chacjome'en nook, chac nook, yéetel ma'alob lino, bey xan u ti'al u jit' je'el ba'alac jadzutze'.
Currently Selected:
Éxodo 35: MAYADC
Highlight
Copy
Compare
Share
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.
