ETUNDILO 36
36
1Becalele la Aholiava lomunu wosi Yehova avela uloño lukũlĩhiso okuti va tẽla muẽle oku linga upange umue oku tunga onjo yi kola, va talavaya oku linga cosi Yehova a tukula.
2Oco Mose wa kovonga Becalele la Aholiava kuenda vosi va loñolõha kovina viñi viñi haivo ovitima viavo via va vetiya oku iya oku linga upange. 3Va tambula ku Mose olombanjaile viosi va Isareli va nena oku kuatisa lavio upange wonjo yi kola. Locipango cavo omanu va nena nena kokuaye olombanjaile omẽle omẽle, 4okuti olondingupange viosi via linga ovopange osi onjo yi kola, via tunda omunu omunu kupange a kala oku linga, vieya, 5via sapuila Mose viti, Omanu va kasi loku eca ca lua enene. Eci ci sukiliwa oku linga upange Yehova a tukula ci sule. 6Oco Mose wa handeleka kuenje va imba oluiya kocilombo cosi vati, Ndaño ulume ndaño ukãi ka ka nene vali ombanjaile yoku kuatisa onjo yi kola. Oco va tutuiya omanu kuenje ka va nenele vali. 7Momo ovina wa kala lavio via tẽla oku linga upange waco wosi, kuenda via supapo.
8Vosi vakuavitima viuloño pokati kava va linga upange va tunga otavernakulu lekui kolonanga viovalatanya lalinya onoloti la a vumbula la a kusuka la vakeruvi, upange wuloño Becalele wa vi tunga. 9Usõvi wavio onanga onanga wa kala akui avali kovikeya kovikeya ecelãla, upati wavio onanga onanga ovikeya vikuãla, olonanga viosi oseteko yimosi.
10Olonanga vitãlo wa vi tongihinya pamosi, olonanga vitãlo wa vi tongihinya pamosi. 11Wa tungavo olongovela vionoloti konẽle yonanga ya kala konẽle yevi via litongihinya; haivio a tunga konẽle yonanga ya kala konẽle yavikuavo via litongihinya. 12Akui atãlo kolongovela wa tunga konanga eyi lo konẽle yonanga yoku tongihinya kukuavo wa tungavo akui atãlo kolongovela; olongovela viaco via liloña. 13Wa tungavo akui atãlo kakuatelo ulu, wa pandeka pamosi olonanga lakuatelo aco. Oco otavernakulu ya linga yimosi.
14Wa tunga olonanga lovonya olohombo ha yi lingi ombalaka yi sikĩlĩla otavernakulu; ekuĩ kolonanga konanga yimosi a tunga. 15Usõvi wonanga onanga akui atatu kovikeya, upati wonanga onanga ovikeya vikuãla; oseteko yimuamue yolonanga viaco ekui lamosi. 16Wa tongikinya pamosi olonanga vitãlo, lolonanga epandu pamosi. 17Wa tungavo akui atãlo kolongovela konẽle yonanga ya kala konẽle yevi via litongikinya, lo konẽle yonanga ya kala konẽle yavikuavo via litongihinya wa tunga akui atãlo kolongovela. 18Wa tungavo akui atãlo kakuatelo osipi oku pandeka pamosi ombalaka ha yi lingi yimosi. 19Wa tungila ombalaka ocisikĩlĩlo covipa violonupi va vi teka leci cikusuka, lo kilu liaco ocisikĩlĩlo covipa violonjundu.
20Wa pasa avaya otavernakulu oviti viositimi oku talamisa vilu. 21Usõvi wevaya ekui kovikeya, upati wevaya levaya ukeya komeyu. 22Evaya levaya lia kala lovisisi vivali via likuata; oco a panga avaya osi otavernakulu. 23Wa pasa avaya otavernakulu; akui avali okonele yoko Sul a imba ovaso ko Sul. 24Wa tunga akui akuãla kalukuki opalata okosi yavaya aco akui avali; otualukuki tuvali kosi yevaya limosi mekonda liovisisi vivali, otualukuki tuvali kosi yevaya likuavo mekonda liovisisi vialio vivali. 25Onẽle yavali yotavernakulu, yina voko Norte, wa yi pasela akui avali kavaya, 26lalukuki ao akui akuãla opalata, alukuki avali kosi yevaya limosi, alukuki avali kosi yevaya likuavo. 27Onyima yotavernakulu ya imba ovaso kutakelo wa yi pasela avaya epandu. 28Avaya avali wa a pasela avindi otavernakulu okonyima. 29Va a pandeka pamosi kosi, haico kilu a tongihinyua locinunga cimosi; oco a linga lao kavali kao kavindi aco avali. 30Kua kala avaya ecelãla lotualukuki tuaco tuopalata ekui kepandu; kosi yao evaya levaya alukuki avali.
31Wa pasa olombala viositimi; vitãlo viavaya onẽle eyi yotavernakulu, 32lolombala vitãlo viavaya onẽle yikuavo yotavernakulu, lolombala vitãlo viavaya otavernakulu okonyima ya imba ovaso kutakelo. 33Olumbala luopokati wa lu pimbilika kavaya tunde konẽle toke konele yikuavo. 34Wa laña avaya aco lulu, wa tunga ovinunga viao viulu oku pimbilikamo olombala; wa laña lulu olombala viaco.
35Wa tunga ongumbo yeyavailo lalinya onoloti la a vumbula la a kusuka lovalatanya; wa yi tunga la vakeruvi, upange wuloño. 36Wa vi pasela olongunji vikuãla viositimi, wa vi laña lulu, lolonjolo viaco viulu; wa yengulula alukuki akuãla opalata. 37Wa tungavo ombindikiyo yuvelo wombalaka lalinya onoloti la a vumbula la a kusuka lovalatanya, upange wukuakuposuisa lalinya; 38lolongunji viaco vitãlo lolonjolo viaco. Wa laña lulu ovitue viaco lolombala viaco; alukuki aco a kala osipi.
Currently Selected:
ETUNDILO 36: EMB63
Highlight
Copy
Compare
Share
Want to have your highlights saved across all your devices? Sign up or sign in
Umbundu Bible © United Bible Societies, 1963.
