ETUNDILO 31
31
1Yehova yu wa popia la Mose hati, 2Tala, Becalele ndo tukula onduko, eye omõla a Uri, omõla a Huru, kepata lia Yuda. 3Ndo yukisa Espiritu lia Suku ha lingi ukualondunge, wa lunguka, ukuakukulĩha, onoño yovoloño osi, 4oku panga ovikuata viuloño, ha talavaya lulu, lopalata, losipi, 5loku songa ovawe oku sokeka vivela, loku songa oviti, loku talavaya ovomesele osi. 6Tala, nda tukula kumuamue laye Aholiava, omõla a Ahisamaka, kepata lia Dani. Vovitima via vakualondunge vosi nda kapa olondunge ha va lingi cosi nda ku sapuila okuti 7ombalaka yoku ñualẽhẽla la Yehova, locikasia covisila, lomangu yohenda yi li kilu liaco, lovikuata viosi viombalaka, 8lomesa lovikuata viaco, londiyelo ya fina lovikuata viaco viosi, lutala winsensu, 9lutala wocilumba coku pia elisi lovikuata viaco viosi, letasu lomangu yaco, 10luwalo wa tungiwa ca fina, luwalo u kola wocitunda Arone luwalo womãla vaye, woku vumbila komangu yutunda, 11lulela woku waveka, linsensu violosimbolua vi pepa viomu mu kola. Va ci linge cosi ndeci nda ku sapuila.
12Yehova yu wa popia la Mose hati, 13Popia la va Isareli huti, Lavi asambata ange, momo o-o ondimbukiso pokati kange lene yenda ño kovitumbulukila viene, ho limbuka okuti ame ndi Yehova ndukuaku u kolisi. 14Wu kolisa esambata momo li kola kokuene. Wosi o li lavisa ipaiwa, u o lingamo upange, omunu waco o tepiwa ku vakuavo. 15Upange u lingiwa oloneke epandu, puãi eteke liepanduvali olio esambata liowusa wefendelo, li kola ku Yehova. U o linga upange keteke liesambata ipaiwa muẽle. 16Omo va Isareli va lava esambata ha va li kolisa kovitumbulukila viavo viosi, ndocisila ka ci pui. 17Olio ondimbukiso pokati kange la va Isareli otembo ka yi pui. Omo oloneke epandu Yehova wa lulika ilu longongo, kuenje eteke liepanduvali wa puyuka, yu wa kavuluka.
18Eci Yehova a mãla oku vangula laye kilu liomunda Sinai, wa eca ku Mose ovawe avali ovisila, a sonẽhĩwa lomuine wa Suku.
Currently Selected:
ETUNDILO 31: EMB63
Highlight
Copy
Compare
Share
Want to have your highlights saved across all your devices? Sign up or sign in
Umbundu Bible © United Bible Societies, 1963.
