ETUNDILO 28
28
1Ku va Isareli linõlẽlako huvove Arone lomãla vaye valume ha va mbumbila komangu yutunda, okuti Arone, lomãla va Arone, Nadava la Avihu, kuenda Eleasa la Itamare. 2O tongela Arone, huvove, uwalo u kola, wulamba, haiwo wa posoka. 3O pañinya vosi vakuavitima viuloño, haivo nda yukisa lespiritu liolondunge, okuti va tunga uwalo wa Arone woku u kolisa, oco a mbumbile komangu yutunda. 4Uwalo va tonga yu: onjeke yoponete, efonde, esanya, ocikutu catumba, ekofue, luvia. Va tungila Arone lomãla vaye uwalo u kola ha va mbumbila komangu yutunda.
5Va tambula ulu lalinya onoloti la a vumbula la a kusuka kuenda onanga yovalatanya.
6Efonde va li tunga lulu lalinya onoloti la a vumbula la a kusuka lonanga yovalatanya, upange wonoño. 7Li kala lapatahãlo avali kapepe kolosongo viaco vivali okuti li litokeka kumosi. 8Uvia walio wa vindiwa luloño, woku litika, u pangiwa ndeci va panga efonde, u linga cimosi lalio; vo tunga lulu lalinya onoloti la a vumbula la a kusuka lovalatanya. 9O nyañula otuvawe tuvali tuasardonika hu sokotola kokuao olonduko via va Isareli. 10Olonduko epandu kewe limosi, olonduko epandu kewe likuavo, ndomo va likuãi poku va cita. 11O sokotola olonduko viomãla va Isareli kovawe avali luloño woku sokotola ovawe ndeci va sokotola osinete, a ñualisa lovivela viulu. 12O kapa ovawe aco avali kapatahãlo efonde ha a lingi ovawe oku ivaluka omãla va Isareli. Arone ambata kovaso a Yehova olonduko viavo kovitẽi viaye vivali ndonjivaluiso. 13O tẽla ovivela viaco viulu, 14kuenda alienge avali ulu wa fina, o a tẽla ndovikolo via vindiwa. Alienge a vindiwa o a tokekiwa lovivela viaco.
15O tunga onjeke yoku wala ponete. Yi tungiwa luloño. Haimo muenda evi vioku tetulula lavio. Ndeci va tonga efonde haico o yi tonga. O yi tunga lalinya onoloti la a vumbula la a kusuka kuenda onanga yovalatanya. 16Yi kala lasũsũ akuãla a lisoka, lombandihinyo, usõvi epaluma, upati epaluma. 17O kapamo otuvawe lovivela viatuo, ovilala vikuãla viovawe. Kulala watete ku kala sardiu, topasiu, karbunkulu, owo ulala watete; 18kulala wavali emeralda, safira, diamante; 19kulala watatu jasintu, agata, ametisitia; 20lokulala wakuãla turkesa, sardonika, jaspe. A tumãla vovivela viaco a ñualiwa lulu. 21Ovawe a soka lolonduko viomãla va Isareli ekui la vavali, a soka lolonduko viavo. Ndoku sokotola osinete, eli londuko yalio, eli londuko yalio; a kalako mekonda liapata ekui lavali. 22O tongela onjeke yaco yoponete alienge ndovikolo, a vindiwa lulu wa fina. 23O tungila onjeke yaco yoponete ovinunga vivali viulu, o kapa ovinunga viaco vivali kolonẽle vivali vionjeke yoponete. 24Alienge aco avali ulu a vindiwa, o kapa vovinunga vivali kolonẽle vionjeke yoponete. 25Olosungu vivali vikuavo vialienge a vindiwa o vi tokekisa kovivela vina vivali, o vi kapa kapatahãlo efonde konẽle yokovaso. 26O tunga ovinunga vivali viulu, o vi tongela kolonẽle vivali vionjeke yoponete, konẽle yaco yi lisungue lonẽle yefonde yovokati. 27O tẽla ovinunga vivali viulu, vi tokeka kapatahãlo avali efonde vemẽhi, konẽle yaco yokovaso ocipepi lokutuihinya kuaco, kilu liuvia wefonde wa vindiwa luloño. 28Onjeke yoponete lovinunga viaco va vi pandeka kovinunga viefonde lukolo wonoloti, okuti yi kala kuvia wefonde wa vindiwa luloño, oco onjeke yoponete ka yi panduluka kefonde. 29Oco Arone ambata olonduko via va Isareli vonjeke yoponete omo muenda evi vioku tetulula lavio, ndokuti o vi ambata kutima eci a iñila omu mu kola. Vi linga onjivaluiso yi kala hũ kovaso a Yehova. 30O kapa Urimi la Tumimi vonjeke yoponete. Vi kala ponete ya Arone kutima waye eci a iñila ku Yehova. Oco Arone ambata kutima waye evi o tetuluila lavio va Isareli kovaso a Yehova oloneke viosi.
31O tonga esanya liefonde liosi onoloti lika. 32Vokati kaco mu kala epangu lioku iñisila utue; li kala lombandeke ya vindiwa yi ñuala kepangu, ndokepangu liocinjena cutale, okuti ka li toka. 33Kowoyelo o tunga alumau lalinya onoloti la a vumbula la a kusuka, oku ñualisa kowoyelo, lopokati kao olongenjo viulu. 34Ongenjo yulu kolumau, ongenjo yulu kolumau, oku ñuala kowoyelo wesanya. 35Arone a li wale wale eci a lingainga upange waye; ocileñi caco ci yevala eci a iñila omu mu kola kovaso a Yehova leci a tunda, okuti ka fi.
36O tela ulame wulu wa fina hu sokotolamo ndeci va sokotola osinete okuti OKU KOLA KU YEHOVA. 37O u kapa kukolo wonoloti, u kala kekofue; kovaso yekofue oko u kala. 38U kala kupolo wa Arone, kuenje Arone ambata ongole yovina vi kola, vina va Isareli va kolisa ha vi lingi oviali viavo vi kola. Olonjanja viosi u kala kupolo waye, oco vi taviwa la Yehova.
39Ocikutu catumba o ci tuta ca fina covalatanya, kuenda ekofue o tonga liovalatanya, kuenda uvia o linga lupange wukuakuposuisa lalinya.
40O tongela omãla va Arone valume ovikutu, lovivia kuenda ovifuto. Viosi o vi tongela ulamba leposo. 41Ovio o walisa Arone huvove lomãla vaye valume kumue laye, o va waveka, o va iha ocikundi, o va kolisa ha va mbumbila komangu yutunda. 42O va tongela ovikasau viovalatanya ha vi sitika osõi yepõlõla liavo. Vi tunde koviongo toke kovikalo. 43Arone lomãla vaye va vi wala eci va iñila kombalaka yoku ñualẽhẽla la Yehova, pamue eci veya ocipepi lutala ha va lingi upange omu mu kola, sanga ongole yi va wila ha va fi. Ci linga ocisila caye leci combuto yaye yu kuãi otembo ka yi pui.
Currently Selected:
ETUNDILO 28: EMB63
Highlight
Copy
Compare
Share
Want to have your highlights saved across all your devices? Sign up or sign in
Umbundu Bible © United Bible Societies, 1963.
