ETUNDILO 18
18
1Yetiro, ocitunda ca Midiane, haeye ndatembo ya Mose, wa yeva viosi Suku a lingila Mose lomanu vaye va Isareli. Wa yeva ndomo Yehova opa va Isareli ke Egito. 2Yetiro, ndatembo ya Mose, wa tambula Cipora ukãi wa Mose, eci o tiuwiya kumosi 3lomãla vaye vavali. Ukuavo onduko yaye Gerisiome, omo hati, Nda kala ocingendelei vofeka yamãle. 4Ukuavo, onduko yaye Eliesere, omo hati, Suku ya tate eye oñuatisi yange haeye wa mopela kosipata ya Fareo. 5Yetiro, ndatembo ya Mose, weya ku Mose lomãla vaye lukãi waye vekalasoko omo va tungila ocilombo komunda ya Suku. 6Eci umue a sapuila Mose, hati, Yetiro, ndatembo yove, yu iya kokuove lukãi wove lomãla vaye vavali kumue laye, 7oco Mose wa tunda oku ñualẽhela la ndatembo yaye, wo petamẽla, wo sipula. Va lipasula, va iñila vombalaka. 8Mose wa sapuila ndatembo yaye viosi via linga Yehova ku Fareo lo ku va Egito oku popela va Isareli. Wo sapuila ovitangi via pita vonjila, lomo Yehova a va popela. 9Yetiro wa sanjukila esumũlũho liosi Yehova a muĩsa va Isareli, omo wa va popela peka lia va Egito.
10Yetiro wa linga hati, Yehova a pandiyiwe, una wo popeli peka lia va Egito kuenda Fareo. 11Kaliye nda kulĩha okuti Yehova wa piãla, olosuku viosi vi sule, omo wa popela omanu peka lia va Egito eci va va talisa ohali. 12Yetiro, ndatembo ya Mose, wa lumba ku Suku ocilumba coku pia elisi locilumba coku yoka. Kuenje Arone weya lakulu vosi va Isareli. Va lila ombolo kovaso a Suku, kumue la ndatembo ya Mose.
13Hẽla liaco Mose wa tumãla oku tetuluila omanu. Omanu va ñuala Mose tunde komẽle toke koñolosi. 14Eci ndatembo ya Mose a mõla viosi eye a lingila omanu oco wa pula hati, Eci o kasi loku lingila omanu oco nye? O tumãlela nye, lika wove, okuti omanu va ku ñuala tunde komẽle toke koñolosi? 15Mose wa kumbulula ndatembo yaye hati, Omo omanu veya kokuange oku pula ku Suku. 16Nda va kuete ondaka veya kokuange, kuenje netulula pokati komunu lokuavo. Ndi va longisa alomboluilo ovisila via Suku lolonimbu viaye. 17Ndatembo ya Mose wa popia laye hati, Eci o kasi loku linga ka ca sungulukile. 18Ove lomanu va kasi love, vu limala ongusu. Upange ndowu u ku lema enene, oku u linga lika wove ku ci tẽla. 19Kaliye yevelela handi kondaka yange. Hu imba onumbi, kuenje Suku a kale love. Ove o linga kapitiya pokati komanu la Suku. Olondaka viavo o vi pitiya ku Suku. 20O va longisa ovisila viaco lovihandeleko. O va imba onumbi yonjila va endelamo, lupange va linga. 21Kuenda vali pokati komanu vosi o nolapo alume vamue va sunguluka, haivo va sumbila Suku, alume vocili, haivo va suvuka ovitukiko. Omanu va tepisua kovisoko. Ovisoko viaco vi kala ndomo, vimue lohulukãi ohulukãi, vimue locita ocita, vimue lakui atãlo, vimue lekui ekuĩ. Lomanu va nolĩwa ovo va linga asongui vovisoko viaco. 22Ovo va tetuluila omanu olonjanja viosi. Ondaka yosi yinene veya layo kokuove, puãi ondaka yitito va yi sokiya ovo muẽle. Oco ci ku leluka, kuenje va ku kuatisa. 23Nda o linga ndomo, kuenje Suku layevo haico a ku handeleka, o kala ciwa. Lomanu valo vosi lavovo va enda lombembua kocitumãlo cavo.
24Oco Mose wa yevelela kondaka ya ndatembo yaye, wa linga viosi a popia. 25Mose wa nola alume volondunge ku va Isareli vosi, wa va kapa ndasongui vomanu vaco okuti asongui vovisoko viohulukãi ohulukãi, asongui vovisoko viocita ocita, asongui vovisoko viakui atãlo, lasongui vovisoko viekui ekui. 26Ovo va tetuluila omanu olonjanja viosi. Olondaka via tatama va vi nena ku Mose, puãi olondaka vitito va vi sokiya ovo muẽle. 27Noke Mose wa tava okuti ndatembo yaye enda, kuenje wa enda kofeka yavo.
Currently Selected:
ETUNDILO 18: EMB63
Highlight
Copy
Compare
Share
Want to have your highlights saved across all your devices? Sign up or sign in
Umbundu Bible © United Bible Societies, 1963.
