OVILINGA 14

1Oco, ki Ikoniyu, va iñila vosunangonga ya va Yudea, kuenje va kundilamo ohundo ya tua okuti va lua va tava, la va Yudea, la va Helasi. 2Puãi va Yudea, vana ka va tavele, va tutuminya vakualofeka, kuenje va fungisa ovitima viavo okuti va pembula vakuetavo. 3Paulu la Barnaba va kalako osimbu kuenje va longaisa ondaka ya Ñala lutõi. Ñala, poku tava okuti ovilimbu lovikomo vi lingiwa lovaka avo, opo a imbila ondaka yocali caye uvangi. 4Puãi owiñi wovimbo wa litepa, vamue va tiamela ku va Yudea, vamue kovapostolo. 5Eci vakualofeka kumue la va Yudea lakulu vavo va tumbika ongombo yoku va tondala loku va asa ovawe, 6oco va ci limbuka kuenje va tilila kovaimbo amue o ko Lukaonia okuti ko Lustra lo ko Derbe kuenda kofeka yi lisungue. 7Oko va kundila ondaka yiwa.

8Vo Lustra mua kala omunu wa fa ovolu, wa kala ocilema tunde vimo lia inaye, ka la enda. 9Eye wa yeva Paulu eci a kunda. Paulu wo vanja sui kuenje wo limbuka okuti o kasi lekolelo liokuti, ñaya. 10Oco Paulu wa popia lolukandi hati, Votoka. Miũha. Oco wa votoka lonjanga kuenje wa fetika oku enda. 11Eci owiñi wa mola eci ca linga Paulu, oco va vilikiya kelimi lia Lukaonia vati, Olosuku via tu lokila latimba ndomanu. 12Va tukula Barnaba vati, Eye osuku Sewusi, kuenje Paulu, omo eye ohundi, oco vo tukula vati, Eye osuku Hermes. 13Onembele ya Sewusi ya kala konele yimbo, kuenje ocitunda caco ca nena olongombe loloneleho kolombundi, momo ca yongola oku kala lowiñi eci va va lumbila. 14Eci ovapostolo Barnaba la Paulu va ci yeva, va tola uwalo wavo, va limba pokati komanu, 15kuenje va vilikiya vati, Alume, eci hẽ, vu ci lingila nye? Etu letuvo timanu lovituwa ndene. Tuo neneli ondaka yiwa okuti vu tinduka kovina evi viaño ha vu pongolokela ku Suku ukuamuenyo, u wa lulika ilu losi kuenda okalunga lovina viosi vi kasimo. 16Kovitumbulukila viosiahũlu eye wa tava okuti olofeka viosi vi endela volonjila viavio muẽle. 17Haimo lumue, ka la liweka oku eca olondimbukiso viu wimbila uvangi, momo wa lingainga ohenda. Wo wihi ombela ya tunda kilu, wo muisi ovovo elau, kuenje wa kutisa ovitima viene omo wo wihi okulia kuenda esanju. 18Haimo lumue, ndãño va popia ndomo, haimo ca kala upange oku kandangiya omanu okuti ka va va lumbila ovilumba.

19Puãi kueya va Yudea va tunda ka Antiokea lo ki Ikoniyu. Ovo va tavisa omanu kovisimilo viavo. Oco, va sosola Paulu lovawe, kuenje, eci va soka okuti wa fa, oco vo kokela kofeka. 20Puãi, eci oloñame vio ñuala, eye wa votoka kuenje wa iñila vimbo. Hẽla yaco wa tunda, wa enda ko Derbe kumue la Barnaba. 21Eci va kunda ondaka yiwa vimbo liaco, kuenje va tavisa oloñame via lua, oco va tiukila ko Lustra lo ki Ikoniyu kuenda ka Antiokea. 22Va kolisa ovitima violoñame. Va va vetiya vati, Lamelẽli ketavo, momo ka tu iñila vusoma wa Suku te lohali ya lua. 23Vakongelo osi va nola akulu kuenje va va kundika ku Ñala una va kolela. Va ci linga loku likutilila kuenda oku likandangiya okulia.

24Noke va pita vo Pisidia kuenje veya ko Pamfulia. 25Eci va longisa ondaka ko Perga va lokila ka Atalea. 26Oku tunda oko va endela vonaviyu toke ka Antiokea, kuna va kundikiwilue kocali ca Suku oku linga upange va malusula ndeti. 27Eci va pitila, vongolola ekongelo kuenje va sapula cosi Suku a linga lavo, vati, Suku wa yuluila vakualofeka epito liekolelo. 28Oko va kala kumue loloñame okasimbu.

Currently Selected:

OVILINGA 14: EMB63

Highlight

Copy