Zefaniya 1
1
Lushi lʼUdudu wa Latuyalaka
1Diui dia Latuyalaka diakayi le Zefaniya, onʼa Kushi, onʼa Ngedaliya, onʼa Amariya, onʼa Hezekiya, lu nshi ya Josiya,#1:1 2 Khum. 22:1—23:30; 2 Ek. 34:1—35:27. onʼa Amona, khumʼekanga ka Juda.
2Dimi layulanya diango tshe
Dieli ladiku dia kete, mbata
Latuyalaka.
3Dimi layudiaka antu la nyama,
Fudu ya lʼulungu la nsi ya lʼashi a
waki.
Dimi layulanya antu wa kolo.
Dimi layushila antu tshe
Weli ladiku dia kete ushiki, mbata
Latuyalaka.
4Dimi layusimbula lunya lami dia ndo
la Juda,
Ndu dia ndo la asi Jerusalema tshe.
Dimi layushila atshikadi wa Bala
ushiki uma lu dinuli ne,
Ndu layunya lukumbu lʼelombedi,
atemodi wa dikishi.
5Ee, layushila waku watotemolaka
Ului wa diango dia lʼulungu lʼete wa
mvudu,
Waku watotemolaka, watutshibaka le
Latuyalaka,
Ndu watutshibaka Milikome,
6Waku wakakadimo uma le Latuyalaka,
Waki kunyanga Latuyalaka kuyanga
mbumbula ushiki.
7Uyali ki la ntundu ka Khumadiondjo
Latuyalaka,
Ne dia lushi landi laya suki.
Latuyalaka akalongosola ulambu,
Ndi akakidia wane wakandeti lʼulambu.
8Lu lushi lʼulambu wa Latuyalaka,
Dimi layusuya ewandji la ana apami
wa khumʼekanga,
Ndu wane tshe wolotshi eloto wʼasi
wedja.
9Lushi lako, dimi layusuya wane tshe
watulimboka ladiku diʼukingo,
La waku watuludiaka luudu la
khumewo too la akambu wa ngala la
lukesu.
10Latuyalaka kata ati:
Lushi lako, tukuku tayukema uma la
suku dia Nsi,
Alelu uma lu leke lukina, la lundju la
wulu uma lʼakuna.
11Nyuleli nyu asi Etuli;
Ne dia ambetshetshi wʼukanda kema
ntu,
Wane tshe watembaka fesa wambushila
ushiki.
12Lushi lako, dimi layuyangiayangia
Jerusalema la atala.
Dimi layusuya antu wudjashi lʼatei
wʼengenongeno awo,
Watutaka lʼetema awo vati: Latuyalaka
hutsha ololo kana kolo.
13Ekundji awo wayuyala diango dia
dimbu,
Mvudu yawo yayuyala elanyelu ketu.
Vo wayuhika mvudu, keli hawudjase
loko.
Vo wayune ekodi wa vinyo lu dikambo,
Keli hawono ashi awo wʼelua.
14Lushi la wuki la Latuyalaka laya suki,
Lo lambusukana, lo layuya esadi.
Lushi la Latuyalaka lambukukia diui
dialo.
Ahuka wambuda tukuku ta wulu.
15Lushi lako, layuyala lushi lʼududu,
Lushi lʼohenyobenyo la asui,
Lushi la dihandju la elanyelu,
Lushi la udjima la lutshukutshuku,
Lushi la wangi la udjima a tshududu,
16Lushi la ama na la tukuku ta ta,
Dia ndo la esumba a wulu, ndu la
tangelu diʼetali.
17Dimi layela asui le antu
Dia vo nkendakenda uku akanga a
tutshungu,
Ne dia wakantshela, dimi Latuyalaka,
kolo.
Dikila diawo diayutshulwama uku
ditshu,
La emunyi awo uku tumi.
18Fesa yawo kuyanga paunyi yawo
hayeya mbashimbela
Lu lushi lʼududu la latuyalaka.
Keli kete tshe yayutshumbama la dja
ya kandjema kandi,
Ne dia ndi ayukumia ekumelu ka
woma
Le waku tshe watudjaseka la kete.
Currently Selected:
Zefaniya 1: TLL
Highlight
Copy
Compare
Share
Want to have your highlights saved across all your devices? Sign up or sign in
La Bible en Otetela © Allianee Biblique de la Republique Democratique du Congo, 1991
