Mako 4

Wela wʼUmbuki a Wuhu

(Mat. 13:1-9; Luk. 8:4-8)

1Jesu akatatela mbetsha antu ntu lʼumamu wʼuduwa. Ului a wuki wʼantu wakudingi. Ku ndi akoto lu watu waki lʼuduwa,#4:1 Luk. 5:1-3. akadjase. Ului tshe wʼantu wakemala lʼumamu wʼashi. 2Ndi akawaetsha akambu efula la wela. Ndi akawatela lu wetshelu andi ati: 3Nyulungi! Umbuki akatshu la ntuka wuhu. 4Lamʼakandatukaka wehu, emotshi wakako lʼumamu a mbuka. Fudu yakayi, yakekomola. 5Wehu ekina wakako lu kete yʼave, lene aki kema kete kambi. Kemʼedja vo wakatumbi, ne dia kete yaki kunune. 6Lamʼakandi unya, vo wakalengela. Vo wakalungula, ne dia tawaki la ediu. 7Wehu ekina wakako lʼatei wʼatende. Atende wakuli, waketshidia, ku vo kumbidja tongo. 8Wehu ekina wakako lu kete yʼololo, wakuli, wakangone. Vo wakato tongo; wakayifudia: emotshi akumi asatu akumi asatu, akumi asamalu akumi asamalu, ekina lukama lukama. 9Ndi akati ati: One leli la atui a mbuka, uki.

Dikambu Diatelandi Antu Akambu la Wela; Ambushihudia Ambeki dia Wela a Wuhu

(Mat. 13:10-17; Luk. 8:9-10)

10Lamʼakawatshikala la ndi ndame, waku waki lasuki la ndi la ambeki andi dikumi la ahendi, wakawumbula dikambu dia wela ako. 11Ku ndi akâkaluya diui ati: Wakanyusha ewu ka mbeya akambu wakashama wa diulelu dia Unyashungu Keli le antu akina, akambu mvutamaka la wela. 12Okone menda wayenda, keli hawenyi; mbuka wayuka, keli hawushihudia, ne dia vo watukukadimula etema dia kolo yawo nyimanyema?#4:12 Is. 6:9-10. 13Ndi akawambula ati: Nyu hanyulimbitela wela ene? Naka kema, ukundi ayunyulimbitela wela tshe? 14Umbuki a wuhu one, eli one latutaka aui wa Unyashungu. 15Wehu wakako lʼumamu a mbuka weli wane watukaka diui, ku kemʼedja Satana ambakosola diui diakawuki. 16Wehu wakako lu ave, weli wane watukaka diui, ku kemʼedja watudietawoka lʼongenongeno. 17Keli vo waha la ediu lʼetema awo, watuyalaka etenyi ketu. Lʼokongo diku, lamʼayuya fono la asui, vo wayutakana esadi. 18Wehu wakako lʼatei wʼatende, weli wane watukaka aui, 19keli tukanyi tʼakambu wa lʼetena kene, lukesu lʼekundji, la saki ka diango dikina wamboto, wambutshidia diui, ku dio diambuyala aha la wuhu. 20Wehu wa kako lu kete yʼololo, weli wane watukaka diui la watudietawoka. Vo watotokaka elua: emotshi akumi asatu akumi asatu, akumi asamalu akumi asamalu, ekina lukama lukama.

Wela wa Tala; Antu Wuki Diui

(Luk. 8:16-18)

21Jesu akawambula ati: Watelaka tala dia diotshiya la tshina dia kidunda, kana lʼukilingu a tangi? Hawutudikitshaka ladiku diʼekitshelu ka tala?#4:21 Mat. 5:15; Luk. 11:33. 22Nduku dikambu diambushama, diahashwama. Ntu nduku dikambu diambukumbama, diahenama.#4:22 Mat. 10:26; Luk. 12:2. 23Naka untu la atui wa mbuka, ndi uki. 24Ndi akawatela ati: Nyudji tukanyi lu wehu wʼaka-mbu wukanyu. Wayunyedikela diango, uku awaedikelanyu#4:24 Mat. 7:2; Luk. 6:38. Wayunyusha ndu diango dikina ladiku. 25Untu tshe leli la diango, wayuwusha dikina. Untu tshe laha la diango, wayokosola ndu kene keli la ndi.#4:25 Mat. 13:12; 25:29; Luk. 19:26.

Wuhu Ambula lu Usheshe

26Jesu akati ati: Diulelu dia Unyashungu diambufana la untu lakuki wuhu lu kete. 27Untu ako aketamaka, aketoka lʼutshu ndu la yanyi. Wehu wakatumbi, wakuli, ku ndi kumbeya okone akawuli. 28Kete yame mbatuyatungelaka wehu: ntundu dikatshi, lʼokongo uhundu, ku tongo yʼetshundju lu asha. 29Lamʼayela wehu, ku ndi muna la lukuwa, ne dia nshi ya dinela yambukuka.#4:29 Joe. 3:13.

Wela a Lotongo la Lohodia

(Mat. 13:31-32; Luk. 13:18-19)

30Jesu akambula ati: La na ayutufanya diulelu dia Unyashungu? Wela akona wayutuwauka lu dikambu diadio? 31Dio dieko uku lotongo la lohodia, latuwukaka lu kete, kuyanga lo ndeka wehu tshe wa la kete tshitshe. 32Lamʼalukawo lu kete, ku lamʼatumbalo, utamba alo atulekaka mbu ya nde tshe wuki, atutundjaka tahi ya waki. Okone fudu ya lʼulungu mbeyaka mbidjase lu dedi diawo.

33Ndi akawaetshaka diui dia Unyashungu la wela efula wa wuhu one, wuhu wakaweyi nimbitela diui. 34Ndi kumbaetsha diui, tshikima ndu wela. Keli lamʼakandayalaka ndi la ambeki andi atu, ndi akamanyaka akambu tshe fundu.

Ngimbi lʼUduwa

(Mat. 8:23-27; Luk. 8:22-25)

35Lushi lako la dikolo, Jesu akawatela ati: Tutshu la wedi. 36Lamʼakawakimo ului wʼantu, vo wakoto la ndi kaku lu watu. Ndu watu ekina waki la wo. 37Ngimbi ka wuki kakayi. Asukhu wʼashi wakoto lu watu, ku watu akayangi ndula lʼashi. 38Jesu aki la kuma ka watu, etami djo lu weko. Vo wakawemula; wakawutela vati: Umbetsha, we ambetawo dia shu mvo? 39Ndi akemo, akahangwela loheledi, akatela uduwa ati: Olembohali! Ku loheledi lakanyukama, lakalembohala yoo. 40Ndi akawambula ati: Ukundi ukanyu woma na? Nyu nyatayala la mbetawo? 41Ku wakatamanya mbuka woma; wakambwana vati: Akona one na? Ndu loheledi ndu uduwa wambukitanyia diui diandi!

Currently Selected:

Mako 4: TLL

Highlight

Copy