Jeremiya 44
44
Jeremiya Ambutela Asi Juda Weli lʼEdjibitu Akambu Wahatayi
1Diui diakayi le Jeremiya lu dikambu diʼasi Juda tshe wakadjase lu kete ya Edjibitu, la Mingidole, la Tapanehese, la Memifi ndu lu kete ya Paterose ati: 2Latuyalaka Kanga lulimbilimbi, Unyashungu wa Isariyele, kata ati: Nyu nyakenyi elanyelu tshe kakamatumela Jerusalema, ndu esumba tshe wa la Juda. Kakiane, vo weko atongo atu, waha la antu 3ne dia kolo kakawatshi dia mbutshami dikeli lamʼakawatshokaka dia ntutshumbela ditemolatemola malashi la ditemola, diakiwo kumbeya, vo, nyu, kuyanga washenyu. 4Keli dimi lakanyutumelaka ekambi ami amvutshi umaka pindju, dia vo ndjunyutela vati: Tanyutshaki dikambu dia wononyi ne diatumuhetshaka. 5Keli vo kununga kuyanga mpuke atui. Vo kunkadimo uma lu kolo kawo, kunkimo ntshumbela ditemolatemola malashi. 6Okone ududu ami la kele kami wakatshulo, wakahete lu esumba wa Juda ndu lu tushinga ta Jerusalema. Vo wakalanyema, wakayala atongo uku ewo elo. 7Diako mbata Latuyalaka Kanga lulimbilimbi, Unyashungu wa Isariyele, ati: Okoko wana wayatshelanyu kolo kene ka wuki, dia nshila apami, amantu, ana, la ana wʼashashi uma lʼatei wa Juda ushiki, wuhu waheya ntshikala nduku otoi lʼatei anyu? 8Dikambu kuna diambutshanyu dikeli, la dikishi diakanyatshi lʼanya anyu, la-mʼatunyutshumbelaka ditemolatemola dia lu kete ya Edjibitu malashi lene akanyayi dia ndjudjase, dia nyu nshila ushiki la dia nyu ndjala engo ka mananu la ka wononyi lʼatei a wedja tshe wa la kete? 9Undi, nyu nyambuhela kolo ya washenyu, kolo ya khumi ya dikanga ya Juda, kolo ya wadiewo, ndu kolo yanyu, la kolo ya wadienyu, yakanyatshaka lu kete ya Juda, ndu lu tushinga ta Jerusalema? 10Nyu nyatayakitshakitsha edja ndu elo, nyatuki woma, nyatakendakenda lu elembe ami ndu lu adjangu ami wakamakitsha la ntundu kanyu ndu ka washenyu.
11Okone Latuyalaka Kanga lulimbilimbi, Unyashungu wa Isariyele, kata ati: Nyendi, dimi lutsha mbediya elundji kami le nyu dia nyutshela kolo, dia nshila Juda tshe ushiki. 12Dimi layunda atshikadi wa Juda wakediya dundji diawo utsha lu kete ya Edjibitu, dia ntudjase leko. Vo wayushila ushiki, wayoko lu kete ya Edjibitu, wayudiakema la yombo ndu la ndjala ka kasha. Vo wayuvo ndu wa waki ndu wa tshitshe la yombo ndu la ndjala ka kasha. Vo wayuyala engo ka mpongwela soi, engo ka nkashimo, engo ka mananu, la engo ka dionyo. 13Dimi layusuya waku wudjashi lu kete ya Edjibitu uku akamasuya Jerusalema la yombo la ndjala ka kasha ndu la elandu. 14Lʼatei wʼatshikadi wa Juda wakatshu utsha lu kete ya Edjibitu dia ntukutudjase leko, nduku otoi ayuhanda kana ntshikala dia nkalula lu kete ya Juda lene alangawo ntudjase, tshikima amotshi mbulawi.
15Apami tshe wakeyaka vati: Wadiesu wakatshumbelaka ditemolatemola malashi, amantu tshe ului a wuki wakemadi leko. Ku antu tshe wakadjashi la Paterose lu kete ya Edjibitu, wakakaluya Jeremiya diui vati: 16Lu dikambu diʼaui wakayatutedi lu lukumbu la Latuyalaka, shu hatukukitanyia nduku yema. 17Keli shu tayutshaka akambu tshe uku wutshisu dia ntshumbela khumʼekanga ka umuntu ka lʼulungu malashi, la dia mbulambulaka elambu wa lutela, uku akatatshaka, shu la washesu, khumi ya dikanga yasu la ewandji asu lu esumba wa Juda ndu lu tushinga ta Jerusalema, ne dia lu nshi sho, shu takayalaka la mbu ya nde efula, takenaka olo, kumpumoka nduku lukulu lʼengeno. 18Keli umaka lamʼakatakimo ntshumbela khumʼekanga ka umuntu ka lʼulungu malashi, la mbulambula elambu wa lutela, shu tatuyalaka la ehumba wa diango tshe, tatudiakemaka la yombo ndu la ndjala ka kasha. 19Tena tshe dia-katatshumbelaka khumʼekanga ka umuntu ka lʼulungu malashi, ndu diakatulambulaka elambu wa lutela, aha lu lulangu la waumesu kakatukatelaka ekati dia mbolemia, ndu mbakatulambulaka elambu wa lutela uka?
20Jeremiya akatela antu tshe ipami, amantu, wane tshe wakûkaluya diui ati: 21Undi, Latuyalaka kumbuho ndu kumbidja yimba lu dikambu dia malashi wakanyatshumbaka lʼesumba wa Juda ndu lu tushinga ta Jerusalema, nyu la washenyu, khumi ya dikanga yanyu la ewandji anyu ndu antu wa lu kete? 22Latuyalaka kumbeya ndjakimela ntu, ne dia kolo ka etsha anyu la akambu wa wononyi wakanyatshaka. Diako mbambuyala kete yanyu tongo tu, aha la untu, engo ka nkashimo ndu engo ka mananu, uku weyo elo. 23Nyu nyakatshumbelaka ditemolatemola malashi, nyakatshela Latuyalaka kolo, kunkitanyia aui andi, kunamaka elembe andi, adjangu andi, la aui andi. Diako mbambuya elanyelu kene le nyu uku weto elo.
24Jeremiya akatela wudja tshe ndu amantu tshe ntu ati: Nyu asi Juda tshe weli lu kete ya Edjibitu, nyulungi diui dia Latuyalaka! 25Latuyalaka Kanga lulimbilimbi, Unyashungu wa Isariyele, kata ati: Ndu nyu ndu wadienyu nyakati uma lʼenyo anyu, nyakatshi lʼanya anyu nyati: Shu tayushidiya alokoloko asu wakatadji wa ntshumbela khumʼekanga ka umuntu ka lʼulungu malashi la wa mbulambula elambu wa lutela. Kakiane, nyushikike alokoloko anyu, nyashidiya. 26Okone nyu asi Juda tshe wudjashi lu kete ya Edjibitu, nyulungi diui dia Latuyalaka! Latuyalaka kata ati: Nyuki, dimi lakatshibi lukumbu lami la wuki, diaha usi Juda nyimula lukumbu lami ntu lu kete ya Edjibitu ati: Uku eli Khumadiondjo Latuyalaka la lumu! 27Nyuki, dimi latuwaendaka dia mbatshela kolo, aha ololo. Asi Juda tshe weli lu kete ya Edjibitu wayuvo la yombo ndu la ndjala ka kasha edja ndu wambushila ushiki. 28Wane wayuhanda yombo, wayukalula uma lu kete ya Edjibitu utsha lu kete ya Juda djui ya tshitshe. Atshikadi tshe wa Juda wakatshu utsha lu kete ya Edjibitu dia ntudjase leko, wayulimbitela diui diakona diayushidiyama: diami kana diawo. 29Dimi layunyenya djimbitelu nye, dia nyu mbeya nyati: Dimi layunyusuya lu dihuli ne, dia nyu nimbitela nyati: Aui ami wayushidiyama dikambu dianyu dia nyutshela kolo, mbata Latuyalaka. 30Nyuki, dimi layukimo Farayo Hofera, khumʼekanga ka Edjibitu, lu anya wʼatunyi andi, lu anya a waku watuyangaka mbudiaka, uku akamakimo Zedekiya, khumʼekanga ka Juda, lu anya wʼutunyi andi Nebukadineza, khumʼekanga ka Babilona,#44:30 2 Khum. 25:1-7. lakuyangaka dia mbudiaka.
Currently Selected:
Jeremiya 44: TLL
Highlight
Copy
Compare
Share
Want to have your highlights saved across all your devices? Sign up or sign in
La Bible en Otetela © Allianee Biblique de la Republique Democratique du Congo, 1991
