Jeremiya 42
42
Okendji wa Jeremiya le Johanana
1Elombodi tshe wʼalimbi: Johanana, onʼa Karea; Azariya, onʼa Ho-shaya; lʼantu tshe a waki ndu wa tshitshe, wakatshu, 2wakatosengasenga umvutshi Jeremiya vati: Etawo esengosengo asu! Utoteketele le Latuyalaka, Unyashungu aye, lu dikambu dia wane tshe wambutshikala, ne dia taki efula, ku kakiane tambutshikala djui ya tshitshe, uku wenaye weme. 3Latuyalaka, Unyashungu aye, atenya mbuka kahumbasu ndjela, ndu uku abumbasu ntsha! 4Umvutshi Jeremiya akawatela ati: Dimi lambuka. Kakiane, dimi lambutsho dia molomba Latuyalaka, Unyashungu anyu, uku elombelo kanyu. Dimi layuyunyulimbitshiya akambu tshe wayunyukaluya Latuyalaka, halunyushe nduku diui. 5Vo wakatela Jeremiya vati: Latuyalaka ayali omenyi wa mete ndu wa kolamelu lu dikambu diasu, naka shu hatutsha kene kayukutuma Latuyalaka, Unyashungu aye, dia ndjututela. 6Shu tayukitanyia diui dia Latuyalaka, Unyashungu asu, lakutumasu le ndi, dia shu ndjala la ongenongeno lamʼayutukitanyia diui diandi.
7Lʼokongo wa nshi dikumi, diui dia Latuyalaka diakayi le Jeremiya. 8Ku Jeremiya aketi Johanana, onʼa Karea, elombodi wʼalimbi tshe waki kame la ndi, la antu tshe, wa tshitshe ndu wa waki. 9Ndi akawatela ati: Latuyalaka, Unyashungu wa Isariyele, lakanyatumi le ndi dia dimi tunyosengesengelandi, kata ati: 10Naka nyu nyayutshikala lu kete nye, dimi layunyushikike loko. Dimi halunyudiaka. Dimi layunyune, halunyu-nula, ne dia lambuyatshumuya dia kolo kakamanyutshela. 11Tanyukaki khumʼekanga ka Babilona, lukanyu woma, woma. Tanyuwukaki woma, ne dia dimi leko kame la nyu dia nyushimbela ndu dia nyutshungula uma lʼanya andi, mbata Latuyalaka. 12Dimi layutunyukamia ketshi le ndi, ku ndi ayunyuka ote vuvu, ayunyukimo dia nyu ndala lu kete yanyu. 13Naka nyayuhedia diui dia Latuyalaka, Unyashungu anyu, 14ndu nyayuta nyati: Kema, shu hatutshikala lu kete nye, keli tayutsho utsha lu kete ya Edjibitu, lene ahatena ta, ahatuka dimama, ndu lene ahatuhumba ma, leko kayutudjase. 15Nyuki diui dia Latuyalaka, nyu atshikadi wa Juda! Latuyalaka Kanga lulimbilimbi, Unyashungu wa Isariyele, kata ati: Naka nyu nyayediya dundji dianyu dia ntsho utsha lʼEdjibitu, dia ntudjase leko, 16ku yombo yukanyu woma, yayutunyunda lu kete ya Edjibitu; ku ndjala ka kasha kukanyu woma, kayunyumamema wulu leko; ku nyayutuvo leko. 17Antu tshe wayediya dundji diawo utsha lʼEdjibitu dia ntudjase leko, wayutuvo la yombo, ndjala ka kasha, ndu la elandu. Nduku untu ayutshikala kana mpanda elanyelu kayumatumela.
18Latuyalaka Kanga lulimbilimbi, Unyashungu wa Isariyele, kata ati: Uku akatshulwama kele kami, la ududu ami le asi Jerusalema, osoku mbayutshulwama kele kami le nyu lamʼayunyukuma lʼEdjibitu. Ku nyu nyayutuyala engo ka mpongwela soi, engo ka nkashimo, engo ka mananu, engo ka dionyo. Nyu hanyuyena dihuli ne ntu. 19Nyu atshikadi wa Juda, Latuyalaka oso anyutela ati: Tanyutshokaki utsha lʼEdjibitu! Nyeyi nyati: Dimi lambuyala omenyi lu dikambu diako elo. 20Nyu nyakayakesi, ne dia nyu nyakantumi le Latuyalaka, Unyashungu anyu, nyati: Ututolombele Latuyalaka, Unyashungu asu. Kuyututeli akambu tshe wayuta Latuyalaka, Unyashungu asu, ku shu tayatsha. 21Dimi lambunyutelawo elo. Keli nyu hanyukitanyia diui dia Latuyalaka, Unyashungu anyu, kuyanga lu diui otoi lu dikambu diakandantumi. 22Okone nyeyi nyati: Nyayutuvo la yombo, ndjala ka kasha, ndu la elandu lu dihuli dialanganyu ntsho la ntudjase.
Currently Selected:
Jeremiya 42: TLL
Highlight
Copy
Compare
Share
Want to have your highlights saved across all your devices? Sign up or sign in
La Bible en Otetela © Allianee Biblique de la Republique Democratique du Congo, 1991
