Jeremiya 39
39
Ekwelo ka Jerusalema
(2 Khum. 24:20—25:21; 2 Ek. 36:17-21; Jer. 52:3-30)
1Lʼeleku ka divwa ka diulelu dia Zedekiya, khumʼekanga ka Juda, lu ngondo ka dikumi kakayi Nebukadineza la ului andi wʼalimbi tshe dia ndjolosha Jerusalema, wakayuyidinga. 2Ku lu eleku ka dikumi lʼotoi ka diulelu dia Zedekiya, lushi la divwa, lu ngondo ka nei, mbakawatundula wushu wa eheli ka lukumbu lʼusumba. 3Lamʼakosama Jerusalema, ewandji tshe wa khumʼekanga ka Babilona: Nerengala-Sharezere, Samingare-Nebu, Saresekime, uwandji wʼelenga, Nerengala-Sharezere, uwandji wʼakanga wʼaloho, kame la ewandji ekina tshe wa khumʼekanga ka Babilona wakayi, wakayudjase lu suku. 4Kamʼakawaenyi Zedekiya, khumʼekanga ka Juda, ndi la elimbi andi tshe, vo wakalawo, wakatumbi uma lʼusumba lʼutshu lu mbuka ka lʼekambo ka khumʼekanga, lu suku dia lʼasa peli pendi. Ku vo wakalawo utsha lʼAraba. 5Keli ului wʼalimbi wʼasi Kaladiya wakayelana la wo, wakatunda Zedekiya lu esui wa la Jeriko. Lamʼakawatuwunda, vo wakotole utsha la Ribila, lu kete ya Hamata, le Nebukadineza, khumʼekanga ka Babilona. Ku ndi akatulumbuya. 6Khumʼekanga ka Babilona akadiaki ana apami wa Zedekiya la ntuudu ka ndi la Ribila. Ndi akadiaki ndu antu a waki tshe wa Juda. 7Ndi akuli Zedekiya ashu, akukeleka molola, wakotole utsha la Babilona.
Lohombo lʼAsi Juda
8Asi Kaladiya wakatshumbi luudu la khumʼekanga ndu mvudu yʼantu, wakanyukula peli dia lukumbu la Jerusalema. 9Nebuzaradana, olombodi wʼalamy akatole atshikadi wa lʼusumba utsha la Babilona: atshikadi wakaseko lu wedi andi, ndu atshikadi waki konseko lu wedi andi. 10Nebuzaradana, olombodi wʼalami, akatshiki asi wula wa wedja waki kundjala la diango lu kete ya Juda. Ndi akawasha dikambo ndu dikambo diʼelua.
Nebukadineza Ambulama Jeremiya
11Nebukadineza, khumʼekanga ka Babilona, akatela Nebuzaradana, olombodi wʼalami, lu dikambu dia Jeremiya ati: 12Uwose, kulamaki ololo, tutshelaki nduku dikambu dia kolo, keli kutshelaki uku ayundukutelaka. 13Okone Nebuzaradana, olombodi wʼalami, Nebushazi-bana, uwandji wʼelenga, Nerengala-Sharezere, uwandji wʼakanga wʼaloho, la elombodi a waki tshe wa khumʼekanga ka Babilona wakatumi antu, 14wakatosa Jeremiya uma lu seke dia luudu la lukanu. Vo wakayukimo le Ngedaliya, on a Ahikame, onʼa Shafana, dia ndi mbotola lakandi. Ku ndi akatudjase lʼatei a wudja.
Ambulaka Ebede-Meleke Dia Mbushimbela
15Diui dia Latuyalaka diakayi le Jeremiya lamʼakawulamaka lu seke dia luudu la lukanu ati: 16Utshu, ututeli Ebede-Meleke, usi Etiyopiya, wati: Latuyalaka Kanga lulimbilimbi, Unyashungu wa Isariyele, kata ati: Enda, dimi lutsha nshidiya aui wakamataka dia ntshela usumba one kolo, aha ololo. Vo wayushidiyama la ntundu kaye lushi lako. 17Keli dimi layukushimbela lushi lako. We hukimwama lu anya wʼantu wukaye woma, mbata Latuyalaka. 18Dimi layukushimbela, we hudiakema la yombo. Lumu laye layuyala engo kaye ka dimbu, ne dia we akambekama, mbata Latuyalaka.
Currently Selected:
Jeremiya 39: TLL
Highlight
Copy
Compare
Share
Want to have your highlights saved across all your devices? Sign up or sign in
La Bible en Otetela © Allianee Biblique de la Republique Democratique du Congo, 1991
