Jeremiya 37
37
Wambunda Jeremiya
1Zedekiya, onʼa Josiya, akayala khumʼekanga lu dihuli dia Koniya, onʼa Jehoyakima, lakadji Nebukadineza, khumʼekanga ka Babilona, lu kete ya Juda.#37:1 2 Khum. 24:17; 2 Ek. 36:10. 2Keli ndi kununga aui wa Latuyalaka, wakandateketa lʼunyo wʼumvutshi Jeremiya, ndi, ekambi andi, kuyanga wudja andi.
3Khumʼekanga Zedekiya, akatumi Jehukala, onʼa Shelemiya, ndi la olombedi Zefaniya, onʼa Maseya, le umvutshi Jeremiya ati: Utolombele Latuyalaka, Unyashungu asu. 4Laso ku Jeremiya akoto, akatumbi lʼatei wʼantu, ne dia vo watawudji lu lukanu. 5Ului wʼalimbi wa Farayo wakayi uma lʼEdjibitu. Ku lamʼakuki asi Kaladiya wakadingi Jerusalema lukumu lako, vo wakamo uma la Jerusalema.
6Diui dia Latuyalaka diakayi le umvutshi Jeremiya ati: 7Latuyalaka, Unyashungu wa Isariyele, kata ati: Kanyututeli khumʼekanga ka Juda, lakanyutumi nyati: Nyuki, ului wʼalimbi wa Farayo wakayi dia ndjunyukimanyia wuyanga nkalula utsha lu kete yawo, lʼEdjibitu. 8Asi Kaladiya wayukalula, wayuyolosha usumba one, wayuwosa, wayutshumba. 9Latuyalaka kata ati: Tanyuyadimbiyaki, nyati: Asi Kaladiya wayutumwela, ne dia vo hawumo. 10Kuyanga mbutunyolembia ului wʼalimbi wʼasi Kaladiya watolokaka la nyu ta, kuyanga mbutuwuyala la puta tshu, vo wutunela untu lʼuntu uma lu luudu landi la dipema, wututshumba usumba one.
11Lamʼakamo ului wʼalimbi wʼasi Kaladiya uma la Jerusalema ne dia woma wʼului wʼalimbi wa Farayo, 12Jeremiya akalangi ntumba uma la Jerusalema dia ntsho utsha lu kete ya Bendjamina, dia ntukundja etenyi kandi uma lʼatei a wudja. 13Lamʼakakumi Jeremiya la suku dia Bendjamina, Iridja onʼa Shelemiya, onʼa Hananiya, olombodi wʼalami, aki leko. Ndi akandi umvutshi Jeremiya, ata ati: We ambukadimo lu wedi wʼasi Kaladiya! 14Jeremiya akûkaluya diui ati: Kashi, dimi hakadimo lu wedi wʼasi Kaladiya. Keli Iridja kunanga mbukela, akawundi, akayi la ndi lʼewandji. 15Ku ewandji wakuki Jeremiya kele, wakokomola, wakawudji lu luudu lʼufundji Jonatana, ne dia vo wakalukadimula luudu la lukanu.
16Jeremiya akoto lu yindju ya pika ya udjima, akatshikala loko nshi efula. 17Ku khumʼekanga Zedekiya akatumi untu dia ntuwosa. Khumʼekanga akawumbula lu luudu landi lu usheshe ati: Undi, diui dimotshi dia Latuyalaka dieko? Ku Jeremiya akûkaluya diui ati: Dimotshi dieko! Ndi akawutela ntu ati: We ayukimwama lu anya wa khumʼekanga ka Babilona. 18Jeremiya akambula khumʼekanga Zedekiya ntu ati: Lu na akamakutshela kolo, we, ekambi aye, kana wudja one, kakanyambidji lu lukanu? 19Kakiane, lendʼeli amvutshi anyu wakanyutelaka akambu wahatayi vati: Khumʼekanga ka Babilona huya dia ndjolo la nyu, kuyanga la kete nye? 20Kakiane we khumemi, khumʼekanga, dimi lambukosengasenga nti: Uki ndu etawo osengosengo ami one mbukema le ye. Tunkaluyaki ntu lu luudu lʼufundji Jonatana, dimi ntukutuvo leko. 21Khumʼekanga Zedekiya akati dia vo nama Jeremiya lu seke dia luudu la lukanu. Vo wakawushaka ukama wa ma la lushi la lushi uma lʼosese vʼakatshi wa ma, edja ndu lamʼakashili ma tshe lʼusumba. Okone Jeremiya akatshikala lu seke dia luudu la lukanu.
Currently Selected:
Jeremiya 37: TLL
Highlight
Copy
Compare
Share
Want to have your highlights saved across all your devices? Sign up or sign in
La Bible en Otetela © Allianee Biblique de la Republique Democratique du Congo, 1991
