Jeremiya 26
26
Wambanela Jeremiya Dia Mbudiaka
1Lʼetatelu ka diulelu dia Jehoyakina,#26:1 2 Khum. 23:36—24:6; 2 Ek. 36:5-7. onʼa Josiya, khumʼekanga ka Juda, kakayi diui ne uma le Latuyalaka le Jeremiya. 2Latuyalaka kata ati: Utemali lu seke dia lukumbu la luudu lami, dimi Latuyalaka. Uteli waku wambuya uma lʼesumba tshe wa Juda dia ndjontemola lu luudu lami aui tshe wamumukudjangela dia we mbatela. Tutshikaki nduku diui. 3Undu, vo wayulunga, wayukadimo untu lʼuntu uma lu mbuka kandi ka kolo, dia dimi nemba utema uma lʼelanyelu kakamasanguya mbatshela, ne dia etsha awo wa kolo. 4Kuwateli wati: Latuyalaka kata ati: Naka nyu hanyu-mbukela dia nkendakenda lu elembe ami wakamakitsha la ntundu kanyu, 5dia nunga aui wa ekambi ami amvutshi, watumunyutumelaka kʼolomo la pindju, keli nyu kumbaukela, 6ku dimi layete luudu lone uku Shilo,#26:6 Jas. 18:1; Esam. 78:60; Jer. 7:12-14. ndu layete usumba one engo ka mananu le wedja tshe wa la kete.
7Elombedi, amvutshi, la antu tshe wakuki Jeremiya ateketa aui aso lu luudu la Latuyalaka. 8Laniʼakashidiya Jeremiya mvuta aui tshe wakawudjangela Latuyalaka dia ndi mvutela antu, elombedi, amvutshi, ku antu tshe wakawundi, wata vati: Mete, we ayuvo! 9Okoko wana wakayatshi akambu wahatayi lu lukumbu la Latuyalaka, wati: Luudu lone layuyala uku Shilo, la usumba one wayuyala tongo tu, waha la antu? Wudja tshe wakamotela Jeremiya lu luudu la Latuyalaka.
10Lamʼakuki ewandji wa Juda akambu ako, vo wakayi uma la luudu la khumʼekanga uya lu luudu la Latuyalaka, wakayudjase lʼeotwelo ka Suku diʼUyuyu dia luudu la Latuyalaka. 11Elombedi la amvutshi wakatela ewandji la antu tshe vati: Untu one nkukaka mvo, ne dia ndi akatshi aui wa kolo dikambu diʼusumba one, uku akanyuki lu atui anyu.
12Ku Jeremiya akatela ewandji tshe la wudja tshe ati: Latuyalaka kakantumi dia ndjuta aui tshe wakanyuki lu dikambu dia luudu lone la usumba one. 13Okone nyolongosole mbuka yanyu la etsha anyu kakiane, nyukitanyia diui dia Latuyalaka, Unyashungu anyu. Ku ndi ayolemba utema lu elanyelu kakandati lu dikambu dianyu. 14Keli le mi, dimi leko lu anya anyu. Nyuntsheli uku alanganyu ndu uku eli ololo lu ashu anyu. 15Dikambu otoi, nyeyi nyati: Naka nyu nyayundjaka, nyayuyakitshiya dikila diaha la unungu lu ete anyu, nyu, usumba one, la wane wudjashi loko; ne dia mete, Latuyalaka kakantumi dia dimi nyutela aui aso tshe.
16Ku ewandji la wudja tshe wakatela elombedi la amvutshi vati: Untu one hakuki ndjakema, ne dia ndi akatutedi aui lu lukumbu la Latuyalaka, Unyashungu asu. 17Dihangamendi dimotshi dia wudja wakemala, wakatela ului tshe wʼantu vati: 18Mika, usi Moreshete, akataka akambu wahatayi lu nshi ya Hezekiya, khumʼekanga ka Juda. Ndi akatela wudja wa Juda tshe ati: Latuyalaka Kanga lulimbilimbi kata ati:
Siona ayufusama uku lafusa ekambo.
Jerusalema ayuyala tuta diʼave
La ukungu wa luudu la Latuyalaka
ayuyala uku ukunda wa lʼukungu#26:18 Mik. 3:12.
19Hezekiya, khumʼekanga ka Juda, la Juda tshe wakudiaki uka? Undi, ndi kumbuka Latuyalaka woma? Ndi konsengasenga Latuyalaka dia ndi mbuka ketshi? Latuyalaka konemba utema lu elanyelu kakandati dikambu diawo uka? Shu tuyanga ndjatungela unungu a wuki.
20Ndu pami kekina Uriya, onʼa Shemaya, usi Kiriyate-Jearima, akataka akambu wahatayi lu lukumbu la Latuyalaka, dikambu dia usumba one la kete nye pupu uku aui tshe wutshi Jeremiya. 21Lamʼakuki khumʼekanga Jehoyakima, ndi lʼahuka andi tshe la ewandji andi tshe aui andi, khumʼekanga ak uyangi dia mbudiaka. Keli lamʼakuki Uriya lukumu loso, ndi akuki woma, akalawo, akatshu lʼEdjibitu. 22Khumʼekanga Jehoyakima akatumi Elenatana, onʼa Akebore, ndi la antu amotshi, utsha lʼEdjibitu. 23Vo wakatosa Uriya uma lʼEdjibitu, wakatuya la ndi le khumʼekanga Jehoyakima, ndi akudiaki la yombo, akakadja udu andi lu waumbu wʼantu kʼantu. 24Keli lunya la Ahikame, onʼa Shafana, laki kame la Jeremiya, diaha vo mbukimo le antu dia vo mbudiaka.
Currently Selected:
Jeremiya 26: TLL
Highlight
Copy
Compare
Share
Want to have your highlights saved across all your devices? Sign up or sign in
La Bible en Otetela © Allianee Biblique de la Republique Democratique du Congo, 1991
