Etatelu 6
6
Kolo ya Antu
1Lamʼakatatela antu nfulanela la kete, vo wakuti ana amantu. 2Ku ana apami a Unyashungu wakenyi vati: Ana amantu wakuti antu amena mbewo. Okone vo wakatshuki wane wakawasonola uma lʼatei awo. 3Latuyalaka akati ati: Nyuma kami hutshikala le untu pundju, ne dia untu eko paka emunyi etu. Nshi ya lumu lʼuntu yayuyalaka deku lukama la akumi ahendi. 4Akunguti wʼantu#6:4 Wal. 13:33. wakiko la kete. Ku lamʼakeyana ana apami wa Unyashungu la ana amantu wʼantu, vo wakuti la wo ana. Ana ako wakayala antu a waki, ndu wa lukumu lu nshi sho.
5Latuyalaka akenyi ati: Kolo kʼantu kambuhama efula la kete, ndu tukanyi tshe tʼetema awo ndjalaka kolo ketu nshi tshe. 6Latuyalaka akayatshumuya, akanyangi efula ne dia ndi akatungi untu la kete. 7Ndi akati ati: Dimi layushila antu wakamatungi la kete, nyama, dikendakenda diayakutula, ndu fudu ya lʼulungu, ushiki. Lambuyatshumuya ne dia lakatungi. 8Keli Noa aki ololo lu ashu wa Latuyalaka.#6:8 Mat. 24:37; Luk. 17:26; 1 Pet. 3:20.
Noa Ambutsha Watu a Luudu
9Nonga ya Noa nye. Noa aki ololo la uluwanyi lʼatei wʼantu wa lolonga landi.#6:9 2 Pet. 2:5. Ndi akakendakendaka la Unyashungu. 10Noa akuti ana apami asatu: Sheme, Hama la lafeta. 11Kete yakayala kolo lu ashu a Unyashungu, yakaluli too la akambu wa ngala. 12Unyashungu akendi kete, ku ndi akenyi ati: Yo yambuyala kolo ketu, ne dia untu lʼuntu akalanya mbuka kandi.
13Unyashungu akatela Noa ati: Ekumelu kʼengo tshe keli la lumu kambukuka lu ashu ami, ne dia vo wambuludia kete too la akambu wa ngala la dihotwanelu. Ulungi, dimi luyanga mbalanya kame la kete. 14Kutshi watu a luudu lʼetamba wʼelshumbi. Katanya mvudu motshi lʼetei. Kukiti elungu lʼetei ndu lʼandja. 15Kûtshi okone: utali awo kawuyali kubita kama shatu, wuki awo kubita akumi atanu, la wemema awo kubita akumi asatu. 16Kutshiki didishi dimotshi lu watu a luudu dieli la kubita otoi lu wemema. Kutshiki suku lu eheli ka watu. Kuhimbuli mvudu shatu yahatanyi: otoi lʼesi, otoi lʼatei, la lukina ladiku. 17Ulungi, dimi luyanga ntuma elula kʼashi la kete, dia nanya engo tshe keli la lumu lʼesi ulungu. Engo tshe keli la kete kayuvo. 18Keli dimi layushikike daka diami le ye. We ayoto lu watu, anʼaye wʼapami, wadeye, la wadi wa anʼaye mbayoto kame la ye. 19Uma lu wehu tshe wa diangu dieli la lumu, kotshiya pendi pendi lu watu dia dilama esenyu kame la ye. Dio kadiuyali wadi la umi, wadi la umi. 20Diango pendi pendi uma lu wuhu la wuhu diayuya uya le ye dia dilama esenyu: fudu uku wehu ayo, dungalunga uku wehu adio, ndu dikendakendaka tshe diayakutula la kete uku wehu adio. 21Kose ndu wehu tshe wa mbu ya nde, kuwekitsha lasuki la ye. Vo kawuyali mbu ya nde yaye ndu yawo. 22Noa akatshi osoku.#6:22 Heb. 11:7. Dikambu tshe diakawutela Unyashungu mbakandatshi.
Currently Selected:
Etatelu 6: TLL
Highlight
Share
Copy
Want to have your highlights saved across all your devices? Sign up or sign in
La Bible en Otetela © Allianee Biblique de la Republique Democratique du Congo, 1991