Ezekiyele 48

1Lanʼeli kumbu ya wedja. Lu kuma ka la ngelʼa kushi, Dane kakudja etenyi otoi. Ulelu andi wayuwanda uma lu Ashi a Mediteraneya, ku wayeta lu mbuka ka Hetelona edja ndu lʼeotwelo ka la Hamata; ku vo mbeta la Hazara-Enana (keli lʼulelu wa lu leke la ngelʼa kushi ka Damaseke, lu welelo wa Hamata). Ulelu awo wayuyala uma lu leke lʼehutwelu pulu ndu lu leke lʼedjelu. 2Uma lʼulelu wa Dane, Ashere kakundja etenyi otoi: uma lu leke lʼehutwelu pulu ndu lu leke lʼedjelu. 3Uma lʼulelu wa Ashere, Nafetali kakundja etenyi otoi: uma lu leke lʼehutwelu pulu ndu lu leke lʼedjelu. 4Uma lʼulelu wa Nafetali, Manase kakundja etenyi otoi: uma lu leke lʼehutwelu pulu ndu lu leke lʼedjelu. 5Uma lʼulelu wa Manase, Efarayima kakundja etenyi otoi: uma lu leke lʼehutwelu pulu ndu lu leke lʼedjelu. 6Uma lʼulelu wa Efarayima, Rubena kakundja etenyi otoi: uma lu leke lʼehutwelu pulu ndu lu leke lʼedjelu. 7Uma lʼulelu wa Rubena, Juda kakundja etenyi otoi: uma lu leke lʼehutwelu pulu ndu lu leke lʼedjelu.

8Lasuki lʼulelu wa Juda, uma lu leke lʼehutwelu pulu ndu lu leke lʼedjelu, kanyediki etshi ka kete kayunyulambula, yediko ya kubita nunu akumi ahendi la tanu lu wekeki; utali ato kawuyali uku wa wedja: uma lu leke lʼehutwelu pulu ndu lu leke lʼedjelu. Ku etemwelo kayuyala lʼatei. 9Etenyi ka kete kayuyusha Latuyalaka, kayali yediko ya kubita nunu akumi ahendi la tanu lʼutali, la nunu akumi ahendi lu wekeki. 10Etenyi kako kayuyala ekila. Elombedi wayukundja etenyi kawo yediko ya kubita nunu akumi ahendi la tanu lʼutali, lu leke la ngelʼa kushi; kubita nunu dikumi lu wekeki lu leke lʼedjelu, kubita nunu dikumi lu wekeki lu leke lʼehutwelu, ndu kubita nunu akumi ahendi la tanu lʼutali lu leke la diku dia kushi. Ku etemwelo ka Latuyalaka kayuyala kʼatei. 11Etenyi kako kayuyala ka elombedi wakakidiama, ana wa Zadoka, wakatshaka ulimu ami, ndu waki kumunganela lamʼakanganela asi Isariyele, ndu uku akanganela asi Lewi. 12Etenyi keso kayuyala etenyi kawo hita uma lʼetenyi ka kete yʼekila, etenyi kuleki ekila lʼumamu wa leke lʼasi Lewi. 13Asi Lewi wayukundja etenyi kawo lasuki la leke iʼelombedi, yediko ya kubita nunu akumi ahendi la tanu lʼutali; la kubita nunu dikumi lu wekeki. Utali ato tshe wayuyala kubita nunu akumi ahendi la tanu, la wekeki kubita nunu akumi ahendi. 14Tawusundjaki kuyanga mingonya etenyi ka kete ku; tawulanyaki etenyi kene ka kete kuleki dimena, ne dia to keko ekila le Latuyalaka.

15Etenyi ka kete kutshikadi yediko ya kubita nunu tanu lu wekeki, la kubita nunu akumi ahendi la tanu lʼutali, huyala ekila. To kayuyala dikambu diʼusumba, dia mpika mvudu la nkamba dikambo; usumba ayuhikama kʼatei. 16Onʼeli tediko tawo: lu leke la ngelʼa kushi, kubita nunu nei la kama tshanu; lu leke la diku dia kushi, kubita nunu nei la kama tshanu; lu leke lʼehutwelu, kubita nunu nei la kama tshanu; ndu lu leke lʼedjelu, kubita nunu nei la kama tshanu. 17Lʼandja wʼusumba, ayuyala kete ya hwe: lu leke la ngelʼa kushi, kubita kama hyendi la akumi atanu; lu leke la diku dia kushi, kubita kama hyendi la akumi atanu; lu leke lʼehutwelu, kubita kama hyendi la akumi atanu; lu leke lʼedjelu, kubita kama hyendi la akumi atanu. 18Utali wa dihuli diambutshikala lʼumamu wa dihuli diʼetenyi kʼekila, ayuyala kubita nunu dikumi lu leke lʼehutwelu, kubita nunu dikumi lu leke lʼedjelu. Dihuli diako diayuyala lʼumamu wa leke lʼekila. Diango diʼuma loko diayuyala mbu ya nde ya wane wayukambaka lʼusumba. 19Antu wa lu wedja tshe wa Isariyele wayukambaka ulimu lʼusumba, wayukamba dikambo loko. 20Leke luku tshe, kete yʼekila kame la kete yʼusumba, layuyala lʼutali wa kubita nunu akumi ahendi la tanu, la wekeki kubita nunu akumi ahendi la tanu, beke nei pupu.

21Etenyi ka kete kambutshikala lu wedi ako ehendi wa etenyi ka kete kʼekila la kʼetenyi kʼusumba, kayuyala kʼuwandji. To kayusimbemala la etshi kʼekila keli la kubita nunu akumi ahendi la tanu lu leke lʼehutwelu, la keli la kubita nunu akumi ahendi la tanu lu leke lʼedjelu, lu welelo wa tenyi dia wedja. Etshi kako kayuyala kʼuwandji. Kete yʼekila la etemwelo wayuyala kʼatei. 22Kete yʼasi Lewi la kete yʼusumba yayuyala kʼatei a kete kʼuwandji. Etenyi kʼuwandji kayuyala lʼasa leke la Juda la leke la Bendjamina.

23Lu dikambu dia wedja wambutshikala, Bendjamina kakundja etenyi otoi uma lu leke lʼehutwelu pulu ndu lu leke lʼedjelu. 24Uma lʼulelu wa Bendjamina, Simeyona kakundja etenyi otoi: uma lu leke lʼehutwelu pulu ndu lu leke lʼedjelu. 25Uma lʼulelu wa Simeyona, Isakara kakundja etenyi otoi: uma lu leke lʼehutwelu pul ndu lu leke lʼedjelu. 26Uma lʼulelu wa Isakara, Zebuluna kakundja etenyi otoi: uma lu leke lʼehutwelu pulu ndu lu leke lʼedjelu. 27Uma lʼulelu wa Zebuluna, Ngada kakundja etenyi otoi: uma lu leke lʼehutwelu pulu ndu lu leke lʼe-djelu. 28Uma lʼulelu wa Ngada lu leke la la diku dia kushi, ulelu wayeta uma la Tamara pulu ndu lu ashi wa Meribate-Kadeshe. Ku vo tuhulo lʼokodi wa Edjibitu edja ndu lʼashi wa Mediteraneya. 29Oso eli kete yayunyukahanya ukito lu eukelu kʼuwali le wedja wa Isariyele. Oso eli tenyi diawo, mbata Khumadiondjo Latuyalaka.

30Lanʼeli ahuli wayutumbaka antu uma lʼusumba. Utali wa leke la ngelʼa kushi, wakedikama kubita nunu nei la kama tshanu. 31Wayetaka asuku wʼusumba kumbu ya wedja wa Isariyele. Asuku asatu wayuyala lu leke la ngelʼa kushi: suku dia Rubena, suku dia Juda, suku dia Lewi. 32Utali wa leke lʼehutwelu ayuyala kubita nunu nei la kama tshanu. Lo layuyala la asuku asatu: suku dia Josefu, suku dia Bendjamina, la suku dia Dane. 33Utali wa leke la diku dia kushi ayuyala la kubita nunu nei la kama tshanu. Lo layuyala la asuku asatu: suku dia Simeyona, suku dia Isakara, la suku dia Zebuluna. 34Utali wa leke lʼedjelu ayuyala kubita nunu nei la kama tshanu. Lo layuyala la asuku asatu: suku dia Ngada, suku dia Ashere, la suku dia Nafetali.#48:34 Eny. 21:12-13. 35Utali wʼutshimba tshe wʼusumba ayuyala kubita nunu dikumi la enanei. Uma lu lushi lako, wayetaka usumba ako vati: Latuyalaka eko leko.

Currently Selected:

Ezekiyele 48: TLL

Highlight

Copy

Compare