Ezekiyele 16

Uhedia wa Jerusalema

1Diui dia Latuyalaka diakayi le mi ntu ati: 2Onʼa untu, ulimbitshiya Jerusalema akambu wa wononyi wati: 3Khumadiondjo Latuyalaka katela Jerusalema ati: Uma lu kete ya Kanana mbakanyatungo; sho aki usi Amora, la nyo usi Hiti. 4Lushi lakayuto, vo kunkuhimbula ututu, kunkotsha ashi, kunkukita leho, kuyanga nkolotsha dihondo. 5Nduku untu akakendi dia nkutshela akambu ane la ketshi kuyanga nkusamba. Keli wakakukadja lʼusui wa hwe, ne dia we aki engo ka wononyi lu lushi lakayuto.

6Lamʼakamete leko, dimi lakakenyi, we angito lu dikila diaye; lakakutela nti: Kuyanga we eko lu mingito lu dikila diaye, uyali la lumu. 7Dimi lakakufudia efula uku tumbatumba dia lʼusui. We akuli, akayala utali ndu dimena diahangone. Awele aye wakamene; divu diaye diakuli utali. Keli we aki utakataka, utakataka utu.

8Lamʼakameti lasuki la ye ntu, dimi lakakendi, menyi ku etena kaye ka ntshukama kambukuka. Dimi lakakolotsha dihondo diami, lakakumbi utakataka aye. Dimi lakakutshimbela, lakadji la ye sheki, ku we akayala la mi, mbata Khumadiondjo Latuyalaka. 9Dimi lakakotsha lʼashi, lakakukitula dikila diaki lu dimba diaye, lakakushinula iso. 10Dimi lakakolotsha ahondo wʼasangu asangu, lakakolotsha sabata yʼekuhu ka konde; lakakolotsha uya wa linene; lakakolotsha ndu ahondo akina wʼushinga a wulu. 11Dimi lakakolotsha dengalenga, lakakudji ekoma lu anya la adidi lu kingu. 12Dimi lakakudji losolo lu ohembe, tungunga lu atui, la dembo dia kusu lʼote. 13Osoku mbakayalengama la paunyi la fesa, ahondo aye waki wa linene lʼololo, la ahondo akina wʼushinga a wulu wʼasangu asangu. We akalekaka shima ka pudipudi, usanga, la iso. We aki dimena diahangone. We akangone, akayala diulelu dia wuki. 14Lukumu la dimena diaye lakadiangana lʼatei a wedja. Dimena diaye diakaluwana uma lu lutumbu lami lakamakusha, mbata Khumadiondjo Latuyalaka.

15Keli we akekamaka dimena diaye. Uma lu lutumbu laye mbakayatatela ndjala kanga luseka. We akafudia luseka laye edja ndu lo lakeyama le untu tshe laketaka lasuki la ye. 16We akose ahondo aye amotshi, akayatshela ahuli wa ladiku wa ngaingai efula. We akatshaka akambu wa luseka loko, wuhu wahenamaki pundju. 17We akose ndu dengalenga diʼamena diaye diakatshama la fesa yami ndu la paunyi yami yakamakusha, we akayatshela difanelu diʼantu, akaditemolaka. 18Ku we akose ahondo aye wʼasangu asangu, akadikumbi. We akakitsha iso kami la malashi ami la ntundu kadio. 19We akose mbu yami ya nde — yakamakusha, shima ka pudipudi, iso, la usanga wakamakushaka — we akayilambuladio uku diango diʼupumu. Osoku mbakidio, mbata Khumadiondjo Latuyalaka. 20Ladiku diʼakambu aso, we akose anʼaye wʼapami la anʼaye wʼamantu wakayambutela, akalambula la ntundu kadio dia vo nanyema. Undi, luseka laye aki dikambu dia tshitshe, 21dia wi ndjaka anʼami la mbalambula dia vo mbeta lu dja la ntundu kadio? 22Lu akambu aye tshe wa wononyi la wa luseka laye, we kumbuho nshi yaye yʼusekaseka lamʼakiye utakataka, utakataka utu, ndu lamʼakayangitoka lu dikila diaye.

23Lʼokongo wʼakambu aye tshe wa kolo (mananu, mananu kayali le ye! mbata Khumadiondjo Latuyalaka), 24we akayahikela luudu lʼetemolatemola, ndu akayatshela dihuli dia ladiku lu osese tshe. 25We akayatshela dihuli dia ladiku la kuma ka mbuka tshe. We akete dimena diaye engo ka wononyi. We akafula ekulu aye, akakalemeka umbetshetshi tshe, akafudia luseka laye. 26We akatemolaka ditemolatemola diʼasi Edjibitu, asukanyi aye, weli la saki ka ntemola dikishi. We akafudia temwelo diaye dia mbutshami kele. 27Okone dimi lakasimbula lunya lami ladiku diaye, lakakitshakitsha mbu yaye ya nde. Dimi lakakukimo lu anya a waku watukuhetshaka, le ana amantu wʼasi Filistiya, wakukaka sonyi ne dia etsha aye wa kolo. 28We akatemola dikishi diʼasi Asuriya, ne dia pusa kaye kumunduyama. We akadikhusamelaka, keli pusa kaye kumunduyama. 29We akafudia otemwelo aye wa dikishi uma lu kete ya Kanana pulu ndu lu Kaladiya, keli saki kaye kumunduyama.

30Khumadiondjo Latuyalaka kata ati: Ndi wuhu wa wodu weli lʼutema aye, dia ntsha akambu ane tshe uku umuntu kanga luseka, lahuki sonyi li! 31We akayihikela luudu la ladiku la kuma kʼosese tshe, akayatshela dihuli dia ladiku lu ahuli tshe wa hwe. We kundjala uku kanga luseka mete, ne dia we akonyola tshindu. 32We utshukami latunanaka luseka, latukalemeka apami akina lu dihuli dia umeye! 33Vo watutshindaka akanga a luseka tshe, keli we, atutshindaka esaka aye! We atasengaka la eshasha dia vo ndja uma lu ahuli tshe, dia ndjunana la ye. 34We ntshikitana la amantu akina lu luseka laye. Nduku pami katukuyelaka dia munana la ye. Osoku we nsumbaka apami, nduku latukutshindaka. Okone we ntshikitana la akina.

35Okone we kanga luseka, uki diui dia Latuyalaka. 36Khumadiondjo Latuyalaka kata ati: Sonyi kaye la utakataka aye wakenama le waku wakunana la ye, ndu ne dia dikishi diaye tshe dia wononyi, la dikila dia anʼaye diakayadilambulaka. 37Diako mbayumusanganya eseka aye tshe wakangenangenaka la ye, waku tshe wakayalangaka ndu wane tshe wakayahetshaka. Dimi layasanganya lu beke tshe dia nkolosha, layukete utakataka dia vo mena dimba diaye tshe. 38Dimi layukulumbuya uku atuwulumbuyaka amantu wadiaka awala, uku antu watundja dikila. Dimi layukutundja dikila lʼududu ndu la kandjema. 39Dimi layukukimo lu anya awo. Vo wayunyukula luudu laye lʼetemolatemola, wayulanya ahuli aye wa ladiku. Vo wayukukulula ahondo aye, wayukohotola dengalenga diaye, wayukutshika utakataka. 40Vo wayusanganya ului wʼantu dia ndo la ye, wayukuka ave, wayukuhika tombo. 41Vo wayu-tshumba mvudu yaye dja, wayukulumbuya la ntundu kʼamantu tshe. Dimi layukumiya luseka laye; we hutshindana tshindu ntu. 42Osoku mbayumushidiya kele kami le ye; ku dimi layutshikala ki, aha ndjukuka kele ntu. 43Khumadiondjo Latuyalaka kata ati: Ne dia we kumbuho nshi yaye yʼusekaseka, ndu ne dia we akantombokwela lu akambu ane tshe, diako mbayumukutshela uku weli etsha aye tshe.

Undi, we kuntsha akambu aso wa sonyi ladiku diʼakambu aye tshe wa wononyi? 44Antu tshe watutaka tukedi, watukaka yukedi nye lu dikambu diaye vati: Ona mbudi diwungu, keti nyangu koshindi. 45We akuto le nyo, lakatuni umendi la anʼandi. We akuto le waku wakatuni waumewo la anʼawo; nyo eki usi Hiti, la sho usi Amora. 46Samariya keli enundu aye a umuntu, ludjashi lu lunya laye la lomoso, ndi la anʼandi wʼamantu. Sodoma keli kusheye a umuntu, ludjashi lu lunya laye la pami, ndi la anʼandi wʼamantu. 47We kumbetawo ndjela paka ditshelu diawo kuyanga ntsha paka akambu awo wa wononyi. Akambu aso waki dikambu dia tshitshe le ye; we akaleki ntsha kolo lu akambu aye tshe. 48Uku wemi la lumu! mbata Khumadiondjo Latuyalaka, onanyo Sodoma kuntsha, ndi kana anʼandi wʼamantu, uku akayatshi, we la anʼaye wʼamantu. 49Ulungi, onʼeli kolo ka onanyo Sodoma. Ndi la anʼandi wʼamantu wakadjase wudjasedjase la utaku lʼatei a mbu ya nde kambi la ongonyi efula. Keli vo kunkimanyia amenyi fono la ehumbi. 50Vo wakayasemaka, wakatshaka akambu wa wononyi la ntundu kami, diako mbakamawanya lamʼakamenyi dikambu so. 51Ndu Samariya atatshi etenyi ka hendi ka kolo yakayatshi. We akafudia akambu aye wa wononyi wuleki wawo. Uma lu akambu wa wononyi tshe wakayatshaka, mbakayete ananyo uku antu waha la unungu. 52Uyaembele sonyi yaye. We akete ananyo uku antu waha la unungu, ne dia kolo yakayatshaka, yakaleki kolo yakawatshaka wononyi. Vo wambukuleka ololo, okone utshami sonyi. Ukike sonyi kaye, ne dia lasuki la ye, ananyo wambufana la antu wʼololo.

53Dimi layukaluya Sodoma la anʼawo wʼamantu, la Samariya la anʼawo wʼamantu uma lu fumbi. Dimi layukaluya ndu asikaye lʼatei awo uma lu fumbi, 54dia we ndjaembela sonyi yaye, la mbutshama sonyi, ne dia akambu tshe wa kolo wakayatshaka, ne dia we aki usambi awo. 55Onanyo Sodoma la anʼandi wʼamantu wayukalula uku akiwo ntundu. Samariya la anʼawo wʼamantu wayukalula uku akiwo ntundu. Ndu we la anʼaye wʼamantu nyayukalula uku akinyu ntundu. 56We kunyimula lukumbu la onanyo Sodoma lu lushi laye lʼutaku, 57ntundu kolo yaye yateyama? Kakiane we ambuyala engo ka dionyo le ana amantu wa Edome, le asukanyi awo tshe, ndu le asi Filistiya weli lʼutshimba aye, watuku-hetshaka. 58Embe wutshu wa kolo yaye ndu wʼakambu aye wa wononyi, mbata Latuyalaka.

59Ee, Khumadiondjo Latuyalaka kata okone ati: Dimi layukutshela uku akayatshaka. We akonyola etshibelu lamʼakayalanya daka. 60Keli dimi layuho daka diakamadji la ye lu nshi yaye yʼusekaseka. Dimi layushikike la ye daka dia pundju. 61We ayuho ditshelu diaye, ku ayutshama sonyi lamʼayuyulungula anangu wʼamantu, wa nundu ndu wa kushi. Dimi layukushawo dia vo ndjala uku anʼaye wʼamantu, keli aha uma lu daka diaye. 62Dimi layushikike daka diami le ye. Ku we ayeya wati: Dimi keli Latuyalaka; 63dia we mbuho la nkashimo, ndu aha mbufula unyo ntu dia sonyi kaye lamʼayumukudimanyia akambu tshe wakayatshaka, mbata Khumadiondjo Latuyalaka.

Currently Selected:

Ezekiyele 16: TLL

Highlight

Copy

Compare