Lucas 1
1
1Tayta Teófilo, Jesucristo kay patsachö imata ruranqantam atskaq runakuna qellqayarqan. 2Tsay qellqayanqanqa Jesucristuwan qallananpita paqta puriqkuna willakuyanqannöllam kaykan. Paywan puriqkuna imata ruranqantapis rikashqa kayaptinmi willakuyänanpaq Jesucristo mandarqan. 3Tsaymi noqapis qallananpita imanö kanqantapis alli tapupakuskir llapanta qamman qellqamü. 4Tsaynöpam qampis kayta liyir musyanki Jesucristupaq yachatsiyäshunqayki rasunpa kanqanta.
Bautizaq Juan yurinanpaq ángel willakunqan
5Judeachö Herodes rey kaykaptinmi juk sacerdöti Zacarías shutiyuq karqan. Paymi Abías sacerdötipita miraq kar tsay casta sacerdötikunawan Dios Yayata templuchö serviyarqan.
Zacaríaspa warminpa shutinmi Elisabet#1.5 Wakin traduccionkunachöqa Isabel niyanmi. karqan. Paypis sacerdöti Aarónpa ayllunpitam karqan.
6Ishkanmi Dios Yaya munanqannö kawakur mandamientunkunata y leyninkunata imaypis cäsuyarqan. 7Elisabet qolluq kaptinmi wamrankuna karqantsu. Ishkanpis yashqayäkushqanam kayarqan.
8Juk kutinam Zacaríasta y paywan aruq sacerdöti majinkunata töcarqan templuchö Dios Yayata serviyänanpaq. 9Costumbrinkunamannö sacerdötikuna sortiyayaptinmi Zacaríasta töcarqan templuman yaykur altarchö inciensiuta qoshnïtsinanpaq.#Éxo. 30.7-9. 10Templuchö inciensiuta qoshnïtsinqanyaqnam waqtachö atskaq runakuna Dios Yayata mañakuykäyarqan.
11Inciensiuta qoshniykätsiptinnam Dios Yaya kachamunqan ángel altarpa derëchu kaq lädunchö Zacaríasta yuripurqan. 12Angelta rikaykurnam Zacarías alläpa mantsakar ni imanakaytapis puëdirqantsu.
13Angelnam nirqan: <<Zacarías, ama mantsakaytsu. Mañakunqaykitam Dios Yaya wiyashqa. Warmiki Elisabetmi ollqu wamrata qeshyakunqa. Paypa shutinmi churanki Juanta. 14Tsuriki yuriskiptinmi alläpa kushikunki. Tsaynöllam wakin kaqkunapis kushikuyanqa.
15<<Dios Yayapa puntanchöpis alli ruraq runam kanqa. Manam vïnuta ni ima machätsikuqkunatapis upyanqatsu.#Núm. 6.1-3. Mamanpa pachanchö kanqanpitam Espíritu Santupa poderninchö kanqa. 16Pay yachatsikuptinmi atskaq Israel runakuna jutsankunata dëjaskir Dios Yaya munanqannöna kawakuyanqa. 17Dios Yayapa poderninwanmi profëta Elíasnö willakunqa.#1.17 Jesucristo manaraq shamuptinmi profëta Elíasta Dios Yaya kachamunanpaq runakuna shuyäyarqan (Mal. 4.5-6). Elíaspaq masta musyanaykipaq liyinki 1Rey. 17.1—19.21; 2Rey. 2.1-18. Tsaynö willakuptinmi taytankunawan wamrankuna alli päsakuychö kawakuyanqa. Mana cäsuqkunatam tantiyatsinqa Dios Yaya munanqannö allillata rurar kawakuyänanpaq. Tsaynöpam runakunata yachatsinqa Dios Yaya kachamunqan Cristo shamuqta chaskiyänanpaq>>.
18Zacaríasnam angelta tapurqan: <<¿Imanötan nimanqayki kanqa? Noqaqa awkinnam kä y warmïpis chakwannam>>.
19Angelnam nirqan: <<Noqaqa Dios Yayapa puntanchö serviqnin Gabrielmi kä. Paymi kachamashqa kay alli willakuyta willanaqpaq. 20Willanqaqnöllam llapan cumplinqa. Peru kanan mana creyimanqaykipitam tsuriki yurinqanyaq parlayta puëdinkitsu>>.
21Tsayyaqnam waqtachö runakuna Zacaríasta shuyarar niyarqan: <<Kay hörayaqnaqa ¿imanirtan yarqamuntsu?>>
22Templupita yarquskirnam shimin watakashqa kaptin sëñasllapa willakurqan. Tsaymi runakuna ninakuyarqan: <<¡Ruri templuchöchi Dios Yaya imatapis rikätsishqa!>>
23Templuchö serviyta ushaskirnam Zacarías wajinman kutikurqan. 24Tsaypitam warmin Elisabet qeshyaq tikraskir pitsqa killa wajillanchö kakurqan. Tsaymi nirqan: 25<<Dios Yaya munaptinmi qeshyaq kaykä. Kananpitaqa wawannaq kanqäta mananam musyapäyämanqanatsu>>.
Jesús yurinanpaq ángel willakunqan
26Elisabet soqta killayuqna qeshyaq kaykaptinmi ángel Gabrielta Dios Yaya kachamurqan Galileachö Nazaret markaman. 27Tsaychömi virgen María täkurqan. Payqa unay rey Davidpa ayllun Joséwan casarananpaqmi parlashqana kayarqan. 28Angelnam María kaykanqanman yuriskir nirqan: <<¡Kushikuy, María! ¡Dios Yayam akrashushkanki! Paymi qamwan kaykan. [Wakin warmikunapitapis masmi Dios Yaya kuyashunki]>>.
29Tsaynö ángel niptinmi María mantsakar shonqullanchö nirqan: <<¿Imanirtan tsaynö niman?>>
30Angelnam nirqan: <<María, ama mantsakaytsu. Dios Yayam kuyashurniki akrashushkanki. 31Kananpitam qeshyaq kanki. Wawayki yuriskiptinmi shutin churanki Jesústa. 32Poderösu kaptinmi Dios Yayapa Tsurin kanqanta niyanqa. Unay ayllun Davidnö rey kananpaqmi Dios Yaya churanqa. 33Paymi Jacobpita miraq runakunata imayyaqpis mandanqa. Paypa mandakuyninqa manam ni imaypis ushakanqatsu>>.
34Maríanam tapurqan: <<¿Imanötan tsay nimanqayki kanqa, ollquwanpis manaraq täkuykaptïqa?>>
35Angelnam nirqan: <<Espíritu Santu qamman shamuptinmi Dios Yayapa poderninwan qeshyaq kanki. Tsaymi santu wawayki yuriptin Diospa Tsurin kanqanta niyanqa.
36<<Aylluyki Elisabetpis chakwan kayninchömi <qolluq warmi> nikäyaptinpis soqta killana qeshyaq kaykan. 37Dios Yayapaqqa manam ni imapis ajatsu>>.
38Maríanam nirqan: <<Noqaqa Dios Yayapa serviqninmi kallä. Qam nimanqaykinö kaykullätsun>>.
Tsaypitanam ángel aywakurqan.
Elisabetta watukaq María aywanqan
39Tsaypita juk ishkay junaqllatanam Judea jallqachö kaykaq juk markaman María saslla aywarqan. 40Chaykurnam Zacaríaspa wajinman yaykuskir Elisabetta saludarqan. 41Saludaykuptinmi Elisabetpa pachanchö wamra kuyurqan. Elisabetnam Espíritu Santupa poderninwan 42jinchi nirqan: <<¡Llapan warmikunapita masmi Dios Yaya bendicionninta qamman churamushqa! ¡Qeshyaq kanqayki wawaykipis bendïtum! 43¿Pitan noqallä kä Señorlläpa maman watukaykamänaykipaq? 44Saludamanqaykita wiyaskirmi pachächö wamra kushikur kuyushqa. 45¡Dios Yaya nishunqaykita cumplinanpaq kanqanta creyinqaykipitam kushishqa kaykanki!>>
Dios Yayata María alabanqan
46Maríanam nirqan:
<<Dios Yayatam llapan shonqüwan alabä.
47Kushikurmi salvamaqnï Dios Yayata alabä.
48Qollmi shonqu serviqnin kanqätam rikämashqa.
Kananpitam runakuna imaypis niyämanqa Dios Yaya bendicionninta noqaman churamunqanta.
49Poderösu Dios Yayam noqapaq allikunata rurashqa.
Payqa santum.
50Paypita mantsakuqkunatam imaypis llakipan.
51Poderösu kayninwanmi imayka ajakunatapis ruran.
Yachaq tukuqkunapa yarpayninkunatam mana väliqpaq churan.
52Mandakuqkunatam mandakuyanqanpita qarqun.
Qollmi shonqukunatam mandakuyänanpaq churan.
53Waktsakunatam wanayanqankunata qaran.
Rïcukunatam sïqa imaykankunatapis qechun.
54Serviqnin Israel runakunatam llakipar imaypis yanapan.
55Imayyaqpis tsaynö yanapamänapaqmi unay aylluntsik Abrahamta y paypita miraqkunata prometirqan>>.#Gén. 12.1-3; 22.16-18.
56Elisabetwan kimsa killanö päraskirmi wajinpa María kutikurqan.
Bautizaq Juan yurinqan
57Tsaypitanam Elisabetpa killan paqtaskiptin ollqu wamrata qeshyakurqan. 58Tsayta musyaskirmi vecïnunkuna y ayllunkuna Elisabetman aywaykur alläpa kushikur niyarqan: <<¡Dios Yayam llakipäshurniki wawayki kananpaq permïtishqa!>>
59Wamra pusaq junaqyuq kaykaptinnam wamrata señalayänanpaq Zacaríaspa wajinman aywayarqan.#Gén. 17.10-12; Lev. 12.3. Tsaychönam taytan Zacaríaspa shutinta churayta munayarqan. 60Peru mamannam nirqan: <<¡Manam! ¡Shutinqa Juanmi kanqa!>>
61Runakunanam niyarqan: <<¡Imanir! Aylluykikunachöqa manatsaq pipis Juan shutiyuqqa kantsu>>.
62Tsaynam Zacaríasta sëñasllapa tapuyarqan: <<Tsurikipa shutin ¿imatatan churanki?>>
63Tsaynam ichik tablata mañaskir qellqarqan: <<Juanmi shutin kanqa>>. Tsayta liyiskirmi mantsakäyarqan. 64Tsay höram Zacaríaspa shimin pashtaskiptin Dios Yayata alabar qallaykurqan.
65Tsaychö llapan vecïnunkunam alläpa mantsakäyarqan. Tsaymi entëru Judea jallqachö runakuna tsaynö päsanqanta willakuyarqan. 66Tsay wamrata Dios Yaya yanapanqanta parlayaptinmi wiyaqkuna yarpachakur niyarqan: <<Tsay wamra jatunyar ¡imanö poderyuqraq kanqa!>>
Dios Yayata Zacarías alabanqan
67Tsaypitanam Espíritu Santupa poderninwan Zacarías nirqan:
68<<Israel runakunata kuyaq Dios Yaya alabashqa kaykullätsun.
Paymi salvamänapaq shamushqa.
69Serviqnin Davidpa ayllunchömi juk poderyuq salvador yurinanpaq kaykan.
70Tsaynö yurinanpaqmi unay santu profëtakunawan willakatsirqan.
71Contrantsikkunapa y chikimaqnintsikkunapa poderninpita salvamänapaqmi musyatsimarqantsik.
72<<Unay aylluntsikkunata llakiparmi sagrädu pactuta cumplinqa.
73Jurarmi unay aylluntsik Abrahamta prometirqan
74chikimaqnintsikkunapita salvamänapaq kanqanta
y mana mantsakur payllatana servinapaq kanqanta.
75Tsaynö kaykaptinqa jutsata manana rurar pay munanqannö waran waran kawakushun>>.
76Tsurintanam Zacarías nirqan:
<<Kuyay tsurillä, salvamaqnintsik shamuptin chaskikuyänanpaqmi nänita pitsaqnö runakunata willanki.
Tsaymi poderösu Dios Yayapa profëtan kanqaykita niyanqa.
77Dios Yaya kuyanqan runakunata perdonar salvananpaq kanqantam willanki.
78Diosnintsik llakipämarnintsik ciëlupita juk salvadorta kachamunqa.
Tsayqa patsa waraqnömi kushikuypaq kanqa.
79Aktsinö karmi tutapaychönö kawaqkunata y wañuyta mantsaqkunata salvanqa.
Paymi tantiyatsimäshun alli päsakuychö kawakunapaq>>.
80Zacaríaspa tsurin Juan wiñarmi Dios Yaya munanqannö kawananpaq tantiyakurqan. Israel majinkunata Diospa palabranta willakur qallanqanyaqmi tsunyakunallachö täkurqan.
Currently Selected:
Lucas 1: qxn
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.