Malaquías 1

1Kaychömi qellqashqa kaykan Israel runakunata profëta Malaquías Dios Yayapa willakuyninta willakunqan.

Israel runakunata Dios Yaya kuyanqan

2 Dios Yayam nin: <<Noqam imaypis qamkunata kuyayaq.

<<Peru qamkunam niyämanki: <¿Imanötan kuyayämanqaykita musyayäman?>

<<Tsaymi niyaq: <¿Manaku Jacobwan Esaú juk wawqilla kayarqan? Tsaynö kaykäyaptinpis unay castaykikuna Jacobtam kuyarqä 3y Esaútanam chikirqä.#Gén. 25.23-26; Rom. 9.13. Tsaymi Esaú castakuna täkuyanqantapis tsunyaman tikratsishkä. Tsaychömi chacalkunallana pärayan> >>.#1.3 Esaú casta runakunam Israel runakunapa contran kayarqan. Tsaymi paykunata ushakätsir Dios Yaya tantiyatsirqan Israel runakunata kuyanqanta.#Isa. 34.5-17; 63.1-6; Jer. 49.7-22; Eze. 25.12-14; 35.1-15; Amós 1.11-12; Abd. 1-14.

4Tsaymi edomita#1.4 Edomita runakunaqa Esaú casta runakunam kayarqan. runakuna niyanqa: <<Markantsikkunata ushakätsiptinpis yapaymi kay nacionta shäritsishun>>.

Peru llapanta mandaq Dios Yayam nin: <<Markankunata yapay shäritsiyaptinpis yapaymi ushakätsishaq. Tsaynöpam nacionninkunata shutitsiyanqa Jutsasapa Runakuna Täkuyanqan Nacionta. Tsaynöllam niyanqa paykunawan imaypis rabyashqa kanqäta. 5Tsaynö ushakätsinqäta rikarmi niyanki: <Dios Yaya alabashqa kaykullätsun. Poderösu kanqanmi maytsay nacionkunachöpis musyakanqa> >>.

Sacerdötikunata Dios Yaya piñapanqan

6Sacerdötikunapaqmi llapanta mandaq Dios Yaya nin: <<Tsurinkunam taytankunata respitayan. Servikuq runakunapis patronninkunatam cäsuyan. Noqam taytaykikuna y patronnikikuna kä. Taytaykikuna kaykaptïqa ¿imanirtan respitayämankitsu? Patronnikikuna kaykaptïqa ¿imanirtan noqapita mantsakuyankitsu? Qamkunaqa manakaqmanmi churayämanki.

<<Tsaynöllam niyämanki: <¿Imachötan manakaqman churayashkaq?>

7<<Altarnïman mana alli wätakunata#Lev. 22.17-25; Deut. 15.21. sacrificiupaq apamurmi manakaqman churayämanki.

<<Tsaynö tantiyatsiyaptiqpis yapaymi niyämanki: <¿Imachötan manakaqman churayashkaq?>

<<Qamkunam mana alli wätakunata sacrificiupaq altarnïman apamur manakaqman churaykäyämanki. 8Qapra wätakunata sacrificiupaq apayämunqayki ¿alli kanqantaku yarpäyanki? Tsaynölla wishtu o qeshyaqyasha wätakunata apamur ¿allitatsuraq ruraykäyanki?#Lev. 22.18-25; Deut. 15.21. Mä gobernadornikikunata qarayänaykipaq tsaykunata apayay. Paypis manam kushishqatsu chaskiyäshunki. Noqa llapanta mandaq Dios Yayam tsaynö nï.

9<<Tsaynö mana allikunata ruraykarpis yanapayänaqpaq kanqanta yarparmi rugakayämankiraq. Peru mana alli wätakunata sacrificiupaq apayämuptiki ¿kushishqatsuraq chaskiyaqman? Noqa llapanta mandaq Dios Yayam tsaynö nï.

10<<¡Mas allim kanman pipis mana yaykunanpaq templupa punkunta wichqayaptin! Tsaynöpam altarnïman mana alli wätakunata ni pipis apayämunmantsu. Tsaynö apayämunqayki manam gustamantsu. Tsaymi apayämuptikipis chaskiyäshaykitsu.#Isa. 1.13; Amós 5.21-24.

11<<Rupay yarqamunqan lädupita rupay jeqanqan läduyaqmi atska nacionkuna shutïchö shumaq serviyäman. Maytsaychömi inciensiuta qoshnïtsir tsaki mikuykunata altarkunaman apayan. Tsaynö rurarmi maytsaychö respitayäman. Noqa llapanta mandaq Dios Yayam tsaynö nï.

12<<Peru qamkunaqa altarnïta mana respitarmi kikïtapis respitayämankitsu. Mana munanqäta altarnïman apamurmi manakaqman churaykäyämanki. 13Tsaynöllam nikäyanki serviyämanqayki alläpa aja kanqanta. Servimarpis janan shonqullam serviyämanki. Altarnïmanqa sacrificiupaq apaykäyämunki suwakuy wätata, wishtu wätata, qeshyaqyasha wätatam. Tsay wätakunata ¿chaskinäpaq kanqantaku yarpäyanki?

14<<Noqaqa llapanpaq poderösu reymi kä. Maytsay nacionkunachömi noqapita mantsakuyan. Qamkunam orqu wätakunapita sänu kaqta apayämunaykipaq äniskayämarpis däñakushqa wätakunallata altarnïman apamur maldicionashqa kayanki. Noqa llapanta mandaq Dios Yayam tsaynö nï>>.

Currently Selected:

Malaquías 1: qxn

Highlight

Copy

Compare