Cantar de Cantares 8
8
Jipash:
1¡Ima alliraq kanman mamäpa chuchunta chuchur qeshpiq turï kaptiki!
Tsaynö kaptikim cällichö tinkur mutsaptiqpis ni pï musyapämanmantsu.
2Makipita jancharkurmi mamäpa wajinman pushaqman.
Tsaychömi kuyakuq kayta yachatsimankiman.
Granadïllata qapiskir yakuwan tallurkurmi mas alli kaq vïnuta qaraqman.#8.2 Tsay ninanqa noqapis qamta kuyar oqllakurkuqman ninanmi.
3Ima alliraq kanman itsuq kaq rikraykita jawnarkatsimaptiki.
Ima alliraq kanman derëcha kaq rikraykiwan abrazarkamaptiki.
Jöven:
4Jerusalén jipashkuna, prometiykayällämay kuyayllä puñukashqata mana rikchatsiyänaykipaq.
Puñuyta teqllanqanyaq puñukutsun.
Soqta kaq cantu
Yanasankuna:#Cant. 2.7; 3.5.
5¡Rikäyay!
¡Tsunyapitam jipash shamuykan kuyayninta abrazashqa!
Jöven:
Manzäna jacha chakinchö puñukuykaqtam rikchatsishkaq.#8.5 Manzäna jacha ninqanqa warmiwan ollqu kuyanakuyanqantam nikan. Rikchatsishkaq ninanqa kuyanakuytam yachatsishkaq ninanmi.
Tsaychömi mamayki qeshyaq tikrashqa.
Tsaychömi mamayki nanakur tsaripukushqa.
Jipash:
6Imaypis yarparämänaykipaq shonquykiman churaykallämay.
Mana qonqämänaykipaq shutïta rikraykiman qellqaykullay.
Kuyanakuytaqa wañuytanömi ni pipis tsapantsu.
Wayllunakuypitapis sepultürapitanö manam qeshpintsiktsu.
Kuyanakuyqa Dios Yayapita shamuq nina karmi imaypis wañuntsu.
7Kuyanakuytaqa manam lamar ni mayupis wañutsiyta puëdintsu.
Dëjanakunanpaq rïcu runa llapan riquëzankunata munatsipaptinpis manam dëjanakuyantsu.
Jipashpa turinkuna:
8Panintsikpa chuchunpis manaraqmi mukrunraqtsu.
Pipis ashiq shamuptin ¿ima nishuntan?
9Panintsik murällanö kaptinqa qellaypita palaciuta ruratsiqnömi adornashwan.
Adornarmi punkunö kaptin cedru tablakunawan adornaqnö adornashwan.
Jipash:
10Noqam murällanö kä.
Chuchükunapis rikachakuna törrikunanömi.
Kuyaylläpa lädunchömi alläpa kushishqa kä.
11Baal-hamónchömi Salomónpa üva chakran karqan.
Tsay chakrantam arrendakurqan.
Wata wata cosëchata ushaskirmi cada ünu waranqa (1,000) qellayta arriendunpita pägayaq.
12Salomón, tsay runakunapita waranqa qellayta chaskiptikipis
y chakra cuidaqkunata ishkay pachak (200) qellayta pägayaptikipis
noqaqa kikïmi üva chakräta rikä.#8.12 Jipashpa üvas chakranqa kikinpa cuerpupaqmi nikan. Tsaynöpam jipash nirqan juk runa aykata pägayta munaptinpis cuerpunqa kuyanqan jövinllapaq kanqanta.
Jöven:
13Huertakunachö jamaq reina, amïgükunam wiyaq wiyaqlla kaykäyan parlanqaykita wiyayänanpaq.
Noqapis wiyanäpaq imallatapis parlarkallämuy.
Jipash:
14Kuyayllä, lluytsunö o tarushnö karpis mushkuykaq jirkakuna jananpa cörrimuy.#8.14 Mushkuykaq jirkakunam jipashpa cuerpun.
Currently Selected:
Cantar de Cantares 8: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
