Isaías 1
1
Judá runakuna jutsasapa kayanqan
1Kaychömi qellqashqa kaykan Judá nacionchö y capitalnin Jerusalénchö täkuq runakunapaq Amozpa tsurin Isaíasta Dios Yaya revelanqan. Dios Yayam revelarqan Judá nacionchö Uzías,#2Rey. 15.1-7; 2Crón. 26.1-23. Jotam,#2Rey. 15.32-38; 2Crón. 27.1-9. Acaz#2Rey. 16.1-20; 2Crón. 28.1-27. y Ezequías#2Rey. 18.1—20.21; 2Crón. 29.1—32.33. rey kayanqan witsay.
2Ciëluwan kay patsapis, wiyayay.
Dios Yayam nin:
<<Yashqayäyanqanyaqmi wamräkunata kuyar wätashkä.
Peru yashqayaskirnam conträ tikrayashqa.
3Buyispis ämuntam reqin.
Ashnupis maychö ämun qaranqantam musyan.
Peru kuyanqä Israel runakunam sïqa wätaqnin kanqätapis tantiyayantsu>>.#Jer. 8.7.
4¡Allaw jutsasapa runakuna, imanöraq kayanki!
Qamkunaqa jutsa rurayllachömi kaykäyanki.
Jutsa rurayllatam taytaykikunapis yachatsiyäshunki.
Mana alli ruraq runakuna karmi Dios Yayata cäsuyankitsu.
Israel runakunapa santu Diosnintam rabyatsiyashkanki.
5¿Imanirtan mas castïguta ashiyanki?
¿Imanirtan kananyaq mana cäsukuq kayanki?
Castigayaptiq umaykikuna pakishqa kaptinmi juiciuykikunapis kannatsu.
6Chaki puntaykikunapita uma jirkaykikunayaq manam sänu kantsu.
Entëru cuerpuykikunam qerillana, qoyuy qoyuyllana, isquy poqur saksashqa.
Manam ni pipis jampiyäshushkankitsu ni watarkayäpushushkankitsu.
Nanayniki päsananpaq aceitillawanpis manam jampiyäshushkankitsu.#Jer. 30.12-15.
7Nacionnikikunapis tsunyam tikrashqa.
Markaykikunatapis rupatsirmi ushayashqa.
Rikaraykäyaptikim murukuyanqaykitapis juklä runakuna mikuyan.
Juklä nacionpita shamurmi imaykaykikunatapis chipyat apakuyan.
8 Siónmi üva chakrachö y melón chakrachö tsunya tsukllanö tikrashqa.
Soldädukuna tumat kunchawashqa markanö kaptinmi pipis yanapananpaq kantsu.
9Llapanta mandaq Dios Yaya juk ishkayllatapis kawaykaqta mana dëjamashqaqa Sodomanö y Gomorranömi#Gén. 19.1-29; Rom. 9.29. ushakashwan karqan.
Jutsankunapita arrepentikuyänanpaq ninqan
10Sodoma autoridänö kaqkuna,
Dios Yaya niyäshunqaykita wiyakuyay.
Gomorra runakunanö kaqkuna,
Diosnintsik yachatsiyäshunqaykita cäsukuyay.#Jer. 23.14.
11 Dios Yayam nin:
<<¿Imapaqnatan maytsika sacrificiukunata altarchö waykayanki?
Carnërukunata sacrificiupaq rupatsiyaptikim ajayashkäna.
Wätakunapa wiranta altarchö waykayaptikim ajayashkäna.
Manam munänatsu törukunapa, üshakunapa ni chïvukunapa yawarninta jichar sacrificiupaq waykayanqaykita.
12¿Imapaqnatan puntämanpis shayämunki?
Templüpa patiuntapis jarutakur shayämunaykipaq ¿pitan niyäshushkanki?
13Tsaki mikuy ofrendakunatapis ¿imapaqnatan apayämunki?
Apayämunqaykipis manakaqllapaqmi kanqa.
Inciensiuta qoshnïtsiyanqaykipis melanätsimanmi.
Llullu killa fiestata rurar
jamay junaqchö jamayanqayki
y wata wata qorikaykur fiestakunata rurayanqaykipis
jutsasapa kayaptikim gustamantsu.
14Llullu killa fiestata rurayanqaykita y wata wata fiestakunata rurayanqaykita jankatnam ajayashkä.
Mananam tsaykunata rikaytapis munänatsu.#Jer. 6.20; Amós 5.21-22.
15Makikikunata pallarkur mañakayämaptikipis tumakuskishaqmi.
Yapay yapay mañakayämaptikipis manam wiyayäshaykinatsu.
Qamkunam runakuna wañuyänanpaqpis jutsayuq kayanki.
16<<¡Limpiu kayänaykipaq mayllakuyay!
¡Mana alli ruraynikikunata jaqiyay!
Mana alli ruraykunata amana rurayaynatsu.
17Tsaypa rantin allikunallatana rurayay.
Demandanakuqkunata shumaq patsätsiyay.
Ñakaqkunata yanapayay.
Waktsayashqakuna quëjakuyäshuptiki justiciata rurayay.
Viüdakunatapis yanapayay>>.#Éxo. 22.21-22; Deut. 24.17-21; 27.19.
18 Dios Yayam nin:
<<Jutsaykikunapita perdonayänaqpaq kanan parlashun.
Jutsaykikuna pukanöraq kaptinpis rashtanöraqmi yuraq kayanki.
Granätiman tiñishqanöraq kaptinpis yuraq millwanöraqmi kayanki.
19Niyanqaqta cäsukurmi chakraykikunachö mikuy wayuqtapis allin kaqta mikuyanki.
20Peru mana cäsukurmi sïqa guërrachö espädawan wañuyanki>>.
Dios Yayam tsaynö nin.
Jerusalénta Dios Yaya juzgananpaq ninqan
21Jerusalén marka, Dios Yayata cäsuq kaykarqa ¿imanöpatan prostitütanö tikrashkanki?
Prostitüta warmi atskaq ollqukunawan kakunqannömi qampis atska dioskunata servishkanki.#Jer. 3.6-10; Eze. 16.15-36; 23.1-49.
Mas unaymi leynïkunata cäsur pïmaytapis yanapar kawarqayki.
Peru kananqa wañutsikuqmanmi tikrashkanki.
22Alli qellaynö kashqa karpis kananqa mana väliq qellaynömi kaykanki.
Alli vïnunö kashqa karpis kananqa yakuta yapashqa vïnunömi kaykanki.
23Autoridänikikunapis Dios Yayata manam cäsuyantsu.
Suwakuqkunata jananparmi qarayta chaskipäkuyan.
Demandanakuyanqanta arreglayänanpaqmi cobrayan.
Waktsakunata manam respitatsiyantsu.
Viüdakuna demandakuyaptinpis manam cäsuyantsu.
24Tsaymi llapanta mandaq Dios Yaya nin:
<<Alläpanam rabyatsiyämashkanki.
Kananmi sïqa chikiyämaptiki llapaykita castigayäshayki.
Conträ shäriyaptikim llapaykita ushakätsiyäshayki.
25Makïtam kanan musyayanki.
Taqra kayanqaykitam lejyawan mayllaqnö limpiayäshayki.
Limpiu kayänaykipaqmi llapan taqraykikunata jichkashaq.
26<<Unay jueznikikuna alli kayanqannömi yapay alli jueznikikuna kayanqa.
Tantiyatsiyäshuqnikikunapis unay kanqannömi yapay alli kayanqa.
Tsaymi Jerusalénpaq niyanqa:
<Jerusalénchömi alli ruraq runakuna kayan.
Tsaychömi Dios Yaya munanqannö kawakuyan> >>.#Zac. 8.3.
27Äninqannöllam Sión runakunata#1.27 Sión runakunaqa Jerusalén runakunam kayarqan. Dios Yaya salvanqa.
Jutsankunata dëjaskir cäsuyaptinqa manam ushakätsinqanatsu.
28Peru mana cäsukuqkunawan jutsa ruraqkunam sïqa wañuyanqa.
Dios Yayata mana cäsuqkunam llapan ushakäyanqa.
29Jerusalén runakuna, encina jachakuna chakinchö y huertakunachö ïdulukunata adorayanqaykipitam penqakuyanki.
Kuyayanqayki ïdulukunata adorayanqaykipitam penqakuyaptiki qaqllaykikunapis pukayanqa.
30Dios Yaya castigayäshuptiki qarwataykaq encina jachanö y yakunpita tsakiq huertanömi kayanki.
31Tsaki oqshaman chispa shikwar rupanqannömi kallpasapa runatapis Dios Yaya ushakätsinqa.
Mana wañuq nina imaykata ushanqannömi tsay runata imayka ruranqantawan ushakätsinqa.
Currently Selected:
Isaías 1: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
