Cantar de Cantares 4
4
Jöven:
1Kuyayllä, alläpa kuyakuypaq shumaq warmim kanki.
Kuyakuy munaymi kanki.
Ñawikipis vëluyki rurinchö ishkay palumanö kuyakuypaqmi.
Aqtsaykipis atska cabritukuna Galaad jirkakunachö tushur puriqnöraqmi.
2Kiruykikunapis majädachö tsayraq armatsishqa y rutushqa yuraq üshakunanöraqmi.
Parninpa parninpam kuyakuypaq.
Manam jukllayllapis faltantsu.#Cant. 6.5-6.
3Shimikipis kuyakuypaqmi puka jïlunöraq.
Parlakuynikim imaypis wiyay munay.
Vëluyki rurinchö qaqllaykipis granadïllanö ishkan lädu kuyakuypaq pukam.
4Kunkaykipis David ruratsinqan törrinömi kuyakuypaq.
Kunkaykichö wallqaykipis tsay törrichö waranqa (1,000) escüdukuna warkaraqnömi warkaraykan.
Valienti soldädukunapa escüdun kuyakuypaq kanqannömi wallqaykipis kuyakuypaq.
5Chuchuykipis millïshu mallwa lluytsukuna liriu waytakunapa chawpinchö mikuykaqnömi kuyakuypaq.#Cant. 7.3.
6Noqam manaraq patsa waraptin y llantupis manaraq päsaptin mïrra perfümi kanqan jirkaman y inciensiu kanqan lömaman#4.6 Mïrra perfümi kanqan jirkapaq parlar y inciensiu kanqan lömapaq parlarqa jipashpa cuerpunpaqmi parlaykan. aywashaq.
7¡Kuyayllä, qammi kuyakuypaq kanki!
¡Chaki puntaykipitam uma jirkaykiyaq shumaq kanki!
8Kuyay warmillä, Líbanupita noqaman shamuykullay.#4.8 Líbanuqa karu nacionmi karqan. Manam Líbanuchö kanqanpitatsu jipash shamunanpaq jöven nirqan, sinöqa paypita karuchö kanqanpita shamunanpaqmi. Lädunchö mana karmi tsay jipash maychö karpis karu Líbanuchö kaykaqnö jövinpaq karqan.
Líbano jirkakunachö kaykanqaykipita aywakallämuy.
Amaná niyanqan jirkakunapita aywakallämuy.
Senir niyanqan Hermón jankapita aywakallämuy.
Leonkuna pärayanqan machaypita tigrikuna kayanqan jirkapita aywakallämuy.
9Kuyay warmillä, qammi shonqü suwaq kanki.
Rikarämaptikim shonqüpis puruq puruqyanraq.
Wallqaykipa watullanwanmi shonqüta suwashkanki.
10Kuyamanqaykim shonqümanpis chayparaq chan.
Kuyamanqaykiqa vïnupitapis masmi mishkin.
Perfümiwan llushikunqaykipis llapan perfümikunapita masmi mushkun.
11Shimikipis abëjapa mishkinnöraqmi mishkin.
Mutsamanqaykipis abëjapa mishkinwan lichi mishkiqnöraqmi mishkin.
Llatapaykipis Líbanuchö jachapa mushkuyninnöraqmi mushkun.
12Kuyay warmillä, qammi kanki entërunpa circushqa huerta.
Qammi kaykanki pözuchö tsapashqa yaku.
13Cuerpuykim granadïlla frütayuq huerta kaykan.
Tsay huertachömi tukuyläya mishkiq frütakuna,
alheña waytakuna
y nardo waytakuna kaykan.
14Tsaychömi kaykan nardo y azafrán,
mushkuq cäña y canëla,
tukuyläya inciensiu jachakuna,
mïrra, áloe y wakin kaq mushkuq jachakunapis.
15Tsay huertata parqunaykipaq pashtaq chuya yakum kanki.
Pashtamuq yakum kanki.
Líbanupita urämuq yakum kanki.
Jipash:
16¡Witsaypa aywaq wayra, shumaq wayrämuy!
¡Uraypa aywaq wayra, shumaq wayrämuy!
¡Huertäman wayrämur kuyakuypaq mushkuyninta kuyaylläman apay!
¡Kuyaylläqa huertanman shamutsun!
¡Frütakunapa mishkiq wayuyninta tsaychö mikutsun!
Currently Selected:
Cantar de Cantares 4: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
