Cantar de Cantares 3
3
Jipash:
1Paqaspapis cämächömi shonqü kuyanqan jövinta ashishkä.
Lamkaykacharpis manam tarishkätsu.
2Alläpa yarpachakurmi shärikushkä.
Markapa aywarmi cällikunachö y pläzakunachöpis kuyanqä jövinta ashishkä.
Mayjina ashirpis manam tarishkätsu.
3Tsaynö puriykaqtam markata cuidaq wardiakuna tariyämashqa.
Paykunawan tinkuskirmi tapukur nirqä:
<<¿Manaku rikäyällashkanki kuyanqä jövinta?>>
4Paykunapita päsaskirllam kuyakunqäwan tinkushkä.
Abrazarkurmi mamäpa wajinman apashkä.
Chaykatsirmi yurinqä cuartuman yaykatsishkä.
Jöven:
5Jerusalén jipashkuna, lluytsukunapa y tarushkunapa shutinchö prometiykayällämay kuyayllä puñukashqata mana rikchatsiyänaykipaq.
Puñuyta teqllanqanyaq puñukutsun.
Kimsa kaq cantu
Yanasankuna:
6Tsunyapita ¿imatan shamuykan?
¿Imatan qoshnirraq shamuykan?
Mïrra perfüminö, inciensiunö y tukuyläya kuyakuypaq perfümikunanö ¿imatan mushkuykämun?
7¡Tsayqa Salomónpa andasninmi!#3.7 Andasqa reyta jamarkatsir puritsiyänanmi. Cortïnayuq, sillëtayuq y llantuyuq shumaq adornashqam kaykan.
Soqta chunka (60) soldädukunapa chawpillantam shamuykan.
Tsay soldädukunam Israelchö valienti kaq soldädukuna kayan.
8Llapanmi espäda üsaq y pelyay yachaq soldädukuna kayan.
Paqaspa imapis kaptin sas pelyayänanpaqmi tseqllankunallachöna espädatapis puritsiyan.
9Andasnintam Líbanupita apatsimunqan alli kaq qerukunapita rey Salomón ruratsishqa.
10Andasninpa parantinkunam qellaypita.
Tsay parantinkunapa jawiräkunaqa qoripitam.
Reypa jamaränanmi granäti tëlapita.
Rurinpam Jerusalén warmikuna kushishqa bordayanqan.
11 Sión warmikuna, ¡shayämuy rey Salomón corönan shukushqa shamuykaqta rikäyänaykipaq!
Tsay corönatam casarakunan junaq maman shukutsishqa.
Tsay junaqmi Salomónpa shonqun alläpa kushikushqa.
Currently Selected:
Cantar de Cantares 3: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
