Cantar de Cantares 1
1
1Kaychömi qellqashqa kaykan llapanpitapis mas kuyakuypaq kaq cantukuna. Kay cantukunam Salomónpa.
Punta kaq cantu
Jipash:#1Rey. 4.32; Cant. 3.9-11.
2¡Shumaq mutsaykiwan mutsaykamay!
Kuyamar mutsamanqaykim vïnupitapis mas mishkin.
3Perfümikipa mushkuyninmi mushkupäkuy munay.
Shutikipis perfüminö kuyakuypaqmi.
¡Tsaymi jipashkunapis alläpa kuyayäshunki!
4¡Taytay rey, cuartuykiman sas apakallämay!#1.4 Tsay witsaymi ollqunta warmi kuyar taytay rey niq.
Tsaychömi alläpa kushishqa kashun.
Vïnuta upyar kushikuypitapis masmi kuyanakur kushikushun.
¡Rasunpam jipashkuna kuyayäshunki!
5Jerusalén jipashkuna, zamballa karpis Cedar runakunapa carpankunanö kuyakuypaqmi kä.#1.5 Cedar runakunapa carpankunaqa yanam karqan.
Salomón ruratsinqan cortïnakunanö kuyakuypaqmi kä.
6Achaywan yanayashqa kanqäta ama rikäpäyämaytsu.
Turïkunam piñapäyämar üva chakrata täpanäpaq churayämarqan.
Tsaymi kikïpa üva chakräta cuidashkätsu.#1.6 Kikïpa üva chakrä ninanqa kikïpa cuerpü ninanmi.
7Kuyayllapaq jöven, willaykallämay.
Üshaykikunata ¿maychötan mitsinki?
Pullan junaq alläpa achachaptin ¿may llantumantan qatinki?
Willamaptikiqa manam amïguykikuna mitsikuyanqanchö ashirniki oqrakashqa purishaqtsu.
Yanasankuna:
8Llapan jipashkunapitapis mas kuyakuypaq jipash, ashinqayki jöven maychöpis kanqanta mana musyarqa üshakunapa llupillanta qatir aywanki hasta tarinqaykiyaq.
Mitsikuqkunapa tsukllankuna kaqman chaykur cabraykikunata mitsikunki.
Jöven:
9Kuyayllä, Faraónpa carrëtanta qarachaq fïna yëwanö kuyakuypaqmi kaykanki.
10Arëtikurkuptikiqa alläpa shumaq kuyakuypaqmi qaqllaykipis.
Perlas wallqata wallqakurkuptikim kuyakuypaq kunkaykipis.
11Qellaywan adornarmi qori arëtiki ruramushaq.
Jipash:
12Kuyanqä rey jamaykanqanyaqmi perfümïpa mushkuyninpis chan.
13Takshalla wallqaräkunä bolsachö mïrra perfümi pëchullächö kanqannömi kuyaynïpis pëchullächö warat puñun.
14En-gadi üva chakrachö kuyakuypaq alheña waytanömi kuyayllä kaykan.
Jöven:
15Kuyayllä, alläpa kuyakuypaqmi shumaq warmi kanki.
Kuyakuy munaymi kanki.
Ñawikipis ishkay palumanömi kuyakuypaq.
Jipash:
16Kuyayllä, alläpa kuyakuypaqmi kanki.
Alläpa shumaq karmi munapaypaq kanki.
Jöven:
Verdi qewam cämantsik.
17Cedru muntim wajintsik.
Ciprés jacham llanturämaqnintsik.
Currently Selected:
Cantar de Cantares 1: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
