Eclesiastés 12

1Jöven kanqaykiyaq kamamaqnintsik Dios Yaya munanqannö kawanaykipaq yarpay. Awkinyaskirqa manam payta serviyta puëdinkinatsu. Kawarpis yarpachakurllanam kawanki. 2Tsaymi rupayta, killata, qoyllurkunata y ima atsikyaqtapis rikayta puëdinqaykiyaq y ñawikipis manaraq tutapanqanyaq Dios Yayata serviy.

3Awkinyaptikim llapan cuerpuyki tsuktsukyanqa.

Chankaykim karkaryanqa.

Kiruykim ushakanqa.

Ñawikim tutapanqa.

4Cällichö büllata rurayaptinpis manam wiyankinatsu.

Mulinu jaqraranqantapis manam wiyankinatsu.

Pishqukuna cantayanqantapis manam wiyankinatsu.

5Witsaypa aywaytapis mantsankinam.

Nänikunapa aywarpis ishkinankillanam.

Avellano jacha tuktuqnömi aqtsaykipis soquyanqa.

Chukllush puriqnömi purinkipis.

Majaykitapis manam munapankinatsu.

Wañukurmi imaypis mana kutimuq aywakunki.

Cällichömi qorikäyanqa waqaraykar pampaq apayäshunaykipaq.

6Tsaynö kaykaptinqa yuraq qellaypita cadenayki manaraq rachinqanyaq,

qoripita mankayki manaraq pakinqanyaq,

puyñuyki#12.6 Wakin runakunaqa uylluyki niyan. pözu kuchunchö manaraq pakinqanyaq

y pözupita yakuta jipinaykipaq waskayki manaraq rachinqanyaq Dios Yayata servinki.#12.6 Kay textuchömi nin manaraq wañunqaykiyaq Dios Yayata servinaykipaq kanqanta.

7Allpallapita rurashqa karmi cuerpuntsik allpallaman yapay tikranqa.

Peru Dios Yaya entregamanqantsik almantsikmi sïqa pay kaqman kutikunqa.

8Noqa yachatsikuqmi nï:

<<¡Imaykapis ushakaqllam!

¡Kay patsachö imanir y imapaq päsanqankunatapis manam tantiyayta puëdintsiktsu!>>

Libru ushanan

9Kay libruta qellqaq runaqa waran waran mas yachayyuq karmi runakunata yachanqanman yachatsirqan. Willakuyanqan proverbiukunata#12.9 Proverbiuqa wallka palabrallawan yätsikuymi kaykan. qoriskirmi maytsikata qellqarqan. Tsaynöllam atska proverbiukunata kikinpa yarpayninpita qellqarqan. 10Palabrakunata shumaq churarmi llapanta qellqarqan. Tsay qellqanqankunam llapan rasun kaqlla.

11Qaruchanö y firmi jawiraq estäcanömi yachayyuqkuna yätsinqankunaqa. Tsaynö yätsinanpaqmi Dios Yaya tantiyatsin. Payqa alli mitsikuqmi kaykan.

12Hïju, juk libruta liyir cuidädutaq kaychö qellqashqa kaykaqpita mas juk yachatsikuyta chaskinkiman. Runakunam maytsika librukunata qellqayan. Alläpa estudiaypis ajayätsikunmi.

13Kay llapan yachatsikuyta wiyarmi tantiyanki Dios Yayapita mantsakur mandamientunkunata cumplinaykipaq kanqanta. Tsaypaqmi kay patsachö runa kawan.

14Dios Yayam imanöpis kawanqantsikman juzgamäshun. Pakayllapa ruranqantsikpitam juzgamäshun.

Currently Selected:

Eclesiastés 12: qxn

Highlight

Copy

Compare