Salmo 90
90
Libru 4
Salmo 90—106
Salmo 90 (89)
Yupashqa watalla runakuna kawayanqan
1a (1a) Kay salmum Diospa serviqnin Moisés rugakunqan.
1 1 (1b) Dios Yaya, qammi imayyaqpis tsinkakuyänä kanki.
2Jirkakuna manaraq kaptin y kay patsa manaraq kaptinpis unaypita imayyaqpis qamllam Dios kanki.
3Qam permïtiptikim runakuna wañuyan.
Qam niptikim wañuskir allpaman tikrayan.
4Qampaqqa waranqa (1,000) watapis juk junaq päsaqnöllam kaykan.
Paqaspa juk ishkay höra päsaqnöllam kaykan.#2Ped. 3.8.
5Illaqpitam runakunata yaku apaqnö apanki.
Runakunaqa puñuy päsaqnöllam kayan.
Llullu qewanöllam kayan.#Isa. 40.6-8.
6Tuktuykar warämuq waytanö kaykarpis tardipaqa äjusyar tsakishqanömi kayan.
7Rabyarqa sasmi ushakätsiyämanki.
Piñakuptikiqa alläpam mantsakäyä.
8Tukuyläya jutsa rurayanqätam musyanki.
Pakayllapa mana allikunata rurayanqätam rikanki.
9Alläpa rabyaptikim jankat ushakäyäshaq.
Imayka jamaynöllam kawaynïkunapis kaykan.
10Wakïqa qanchis chunka (70) watayaqllam kawayä.
Alli kawakur sänu kaqkunallam pusaq chunka (80) watayaq kawayan.
Tsaynö atska wata kawarpis aruywan jitapakashqam kawayä.
Manaraq unayta wata päsanqannömi noqakunapis ushakäyä.#Job 14.1; Ecl. 2.23; 11.8.
11Imanö rabyanqaykita manam ni pipis musyantsu.
Alläpa piñakunqaykita manam ni pï tantiyantsu.
12Yupashqa watalla kawayänäpaq kaqta tantiyaykatsiyällämay.
Tsaynöpam tantiyakuyäshaq munanqaykinö kawakuyänäpaq.
13Dios Yaya, yapay yanapaykayällämay.
¡Imayyaqraq qonqayämashkanki!
Serviqniki kaykäyaptïqa llakipaykayällämay.
14Kuyakuynikiwan cada alliq yanapaykayällämay.
Tsaynöpam wañukuyanqäyaq imaypis kushishqa alabayäshayki.
15Atska wata yarpachakur kawayänäpaqmi ñakaykunaman churayämashkanki.
Tsaynölla atska wata kushishqa kawayänäpaqpis yanapaykayällämay.
16Serviqniki kaykäyaptïqa noqakunata y tsurïkunatapis yanapayämar kushikuypaq kaqkunata ruraykullay.
17 Dios Yayallä, kuyakuq kanqaykita tantiyaykatsiyällämay.
Llapan aruynïkunamanpis bendicionnikita churaykallämuy.
Currently Selected:
Salmo 90: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
