Salmo 78
78
Salmo 78 (77)
Kuyanqan runakunata Dios Yaya alli rikanqan
1a (1a) Asaf qellqanqan salmum.
1 1 (1b) Marka majikuna, yachatsiyanqaqta shumaq wiyayämay.
Niyanqaqta shumaq chaskiyämay.
2Imamanpis iwalatsiypam yachatsiyäshayki.
Unay tiempu päsanqankunatam musyayänaykipaq willayäshayki.#Mat. 13.35.
3Awiluntsikkuna willamanqantsikpitam tsaykunata musyantsik.
4Tsaykunatam wamrantsikkunata willashun.
Dios Yaya poderösu kanqanta musyatsishun.
Poderösu kayninwan mantsakaypaq ruranqankunata willashun.
5Jacobpita miraqkunatam Dios Yaya leyninkunata entregarqan.
Tsay leykunachömi Israel runakuna imanö kawakuyänanpaq kanqantapis tantiyatsirqan.
Paykunatam musyatsirqan wamrankunata yachatsiyänanpaq.
6Tsaynöpam qepa yuriqkunapis musyayanqa.
Tsay qepa yuriqkunapis wamrankunatam yachatsiyanqa.#Deut. 6.7.
7Tsaynö yachatsishqam wamrantsikkunapis Dios Yayaman confiakuyanqa.
Dios Yaya yanapanqanta manam qonqayanqatsu.
Paypa mandamientunkunata llapantam cumpliyanqa.
8Unay kaq aylluntsikkunanö mana cäsukuqqa manam kayanqanatsu.
Unay aylluntsikkunam mana cäsukuq chukru shonqu kayarqan.
Paykunam mitu rinri mana wiyakuq kayarqan.
Tsaymi Dios Yayawan pactu rurayanqantapis cumpliyarqantsu.
9Efraín trïbukunam allish flëchay yachaq soldädukuna kayarqan.
Tsaynö kaykarmi guërrapita qeshpir aywakuyarqan.
10Dios Yayawan pactu rurayanqantapis manam cumpliyarqantsu.
Yachatsikuynintapis manam cäsuyarqantsu.
11Dios Yaya yanapanqantapis jankatmi qonqaskiyarqan.
Mantsakaypaq milagrukuna ruranqantapis jankatmi qonqaskiyarqan.
12Unay aylluntsikkuna rikaykäyaptinmi mantsakaypaq kaqkunata Dios Yaya rurarqan.
Egiptuchö kaykaq Zoán partichömi tsaykunata rurarqan.#Éxo. 7.8—12.32.
13Lamarta ishkanläman rakiskirmi paykunata päsatsirqan.
Päsayanqanyaqmi lamarta ishkanläman rakikaskatsir perqatanö ichirätsirqan.#Éxo. 14.21-22.
14Junaqpam pukutaywan pusharqan.#Éxo. 13.21-22.
Paqaspanam lunyaykaq ninawan pusharqan.
15Desiertuchö qaqatam tsillitsirqan.
Tsaypitam upyayänanpaq atska yaku yarqamurqan.
16Qaqata tsillikaskatsiptinmi mayunöraq yaku yarqamurqan.#Éxo. 17.1-7; Núm. 20.2-13.
17Tsaynö yanapaykaptinmi Dios Yayapa contran shäriyarqan.
Desiertuchömi poderösu Dios Yayata rabyatsiyarqan.
18Munayanqallanta mikuyta munarmi Dios Yayata shonqunkunachö tentayarqan.
19Dios Yayapam contran parlaykachar niyarqan:
<<Kay desiertuchö ¿maypitatan mikuynintsik alistamunqa?
20Musyantsikmi qaqata tsilliskatsiptin mayunöraq yaku yarqamunqanta.
Tsaynö ruraykarpis ¿maypitatan mikuynintsik alistamunqa?
Aytsatapis ¿maypitatan alistamunqa?>>
21Tsaynö parlayanqanta wiyarmi Dios Yaya piñakurqan.
Jacobpita miraq runakunapaqmi alläpa rabyarqan.
22Paykunam Dios Yayaman confiakuyarqantsu.
Yanapananpaq kanqantapis manam creyiyarqantsu.
23Tsaynö kayaptinpis Dios Yayam paykunaman pukutayta kachamurqan.
Kikinmi ciëlu punkutapis kicharqan.
24Kuyanqan runankunapaqmi tamyatanöraq manáta shikwatsimurqan.
Manámi ciëlupita shikwamuq mikuy karqan.
25 Angelkuna mikuyanqan tantatam mikuyarqan.
Pacha junta mikuyänanpaqmi Dios Yaya mikuyta alistapämurqan.#Juan 6.31.
26Rupay yarqamunan kaqläpita y sur kaqläpitam wayrätsimurqan.
27Tsay wayrawanmi codornizkunata chätsirqan.
Lamar kuchunchö arenïllatanöraqmi maytsika codorniz aytsa karqan.
28Tsay codornizkunatam Dios Yaya chätsirqan runakuna täkuyanqan campamentuman.
Carpankuna lädunmanmi tiwillyaqtaraq chätsirqan.
29Tsaytam jankat teqllayanqanyaq mikuyarqan.
Tsaynömi Dios Yaya mañakuyanqanta cumplirqan.
30Peru wakin kaqtam pachankuna manaraq juntaptin aytsankuna amushqa kaykaqllata 31Dios Yaya rabyar ushakätsirqan.
Mas kallpasapa kaq runakunatam wañutsirqan.
Israel runakunachö mas valienti kaq runakunatam ushakätsirqan.#Éxo. 16.2-15; Núm. 11.4-23, 31-35.
32Tsaykunata rikaykarpis jutsa rurayllachömi sïguiyarqan.
Mantsakaypaq ruranqankunata rikaykarpis manam Dios Yayaman creyikuyarqantsu.
33Tsaymi Dios Yaya paykunata imayka jamaytanölla desgraciawan ushakätsirqan.
34Wakin kaqta wañutsiqta rikarraqmi Dios Yayaman creyikuyarqan.
Tsaynöpam llapan shonqunkunawan perdonta mañakuyarqan.
35Tsayraqmi Dios Yaya ruminö tsapaqnin kanqanta yarpäyarqan.
Tsaynöpam poderösu Dios Yaya salvaqnin kanqanta yarpäyarqan.
36Peru tsaynö yarpaykarpis Dios Yayatam llullatsiyarqan.
37Dios Yayata cäsuyänanpaq äniskirpis manam cäsuyarqantsu.
Dios Yayawan pactu rurayanqantapis manam cumpliyarqantsu.
38Peru tsaynö kaykäyaptinpis Dios Yayam llakiparqan.
Jutsankunata perdonarmi ushakätsirqantsu.
Alläpa rabyarpis atska kutim castigarqantsu.
Rabyarpis pacienciakurqanmi.
39Runalla kayanqanta musyarmi llakiparqan.
Wayranö päsaqlla kayaptinmi llakiparqan.
40Paykunam atska kuti Dios Yayapa contran shäriyarqan.
Desiertuchömi atska kuti rabyatsiyarqan.
41Yapay yapaymi Dios Yayata tentayarqan munayanqanta rurananpaq.
Santu Diosnintam alläpa rabyatsiyarqan.
42Dios Yaya poderösu kanqantam qonqaskiyarqan.
Chikiqninkunapa poderninpita jipinqantapis manam yarpäyarqannatsu.
43Egiptuchö kaykaq Zoán partichö mantsakaypaq imaykakuna ruranqantapis manam yarpäyarqannatsu.
44Tsaychömi mayukunata yawarman tikratsirqan.
Tsaymi Egiptuchö täkuq runakuna upyayta melanäyarqan.#Éxo. 7.17-21.
45Pawrä chuspikunata#Éxo. 8.20-24. y säpukunatapis#Éxo. 8.1-6. tiwillyaqtaraqmi paykuna täkuyanqanman juntätsirqan.
46Chukllushkunatam chakrachö mikuykunata ushayänanpaq yuritsirqan.
Llapan murukuyninkuna jeqamuqllatam chipyat ushayarqan.#Éxo. 10.12-15.
47Mangäda runtu tamyawanmi üvakunatapis ushakätsirqan.
Qajapawanmi hïguskunatapis chipyat tsakitsirqan.
48Runtu tamyawan y maqakuywanmi wäkakunata y üshakunatapis wañutsirqan.#Éxo. 9.22-25.
49Dios Yaya rabyarmi Egipto runakunata tsaynö castigarqan.
Wañutsikuq angelkunatam paykunaman kachamurqan.
50Paykunatam mana llakipaypa ushakätsirqan.
Mana perdonarmi wañutsirqan.
51Egiptuchömi llapanpa mayor ollqu tsurinkunata ushakätsirqan.#Éxo. 12.29.
52Kuyanqan Israel runakunatam üsha mitsikuqnö Egiptupita jipimurqan.
Paykunatam desiertupa pusharqan.#Éxo. 13.17-22; Sal. 77.20; Isa. 63.11-14.
53Mana mantsakuyänanpaqmi kikin següru pusharqan.
Peru chikiqninkunatam sïqa lamarwan millpuskatsirqan.#Éxo. 14.26-28.
54Tsaypitanam kuyanqan runankunata prometinqan nacionman pushamurqan.#Éxo. 15.17.
Paykunata entregananpaqmi tsaychö täkuq runakunata kikin vencirqan.
55Kuyanqan runakunapa puntanpitam tsay runakunata qarqurqan.#Jos. 11.16-23.
Paykunapa chakrankunata y markankunatam Israel runakunatana aypurqan.
56Peru tsaynö yanapaykaptinpis poderösu Dios Yayata tentarmi alläpa rabyatsiyarqan.#Jue. 2.11-15.
Dios Yaya mandanqankunata manam cäsuyarqannatsu.
57Unay ayllunkunanömi paykunapis Diosta prometiyanqanta cumpliyarqantsu.
Flëcha wiksunqannömi paykuna kayarqan.
58Markakunachö altarkunata rurarmi Dios Yayata rabyatsiyarqan.
Ïdulukunata adorarmi piñatsiyarqan.
59Tsaymi Dios Yaya alläpa rabyakurqan.
Israel runakunata dëjaskirmi yanaparqannatsu.
60Kay patsachö täkunqan carpantapis dëjaskirqan.
Silo marka carpanchöpis mananam täkurqannatsu.#Jos. 18.1; Jer. 7.12-14; 26.6.
61Contrankuna apakuyänanpaqmi Pactu Babultapis dëjaskirqan.#1Sam. 4.4-22.
62Kuyanqan runankunata espädawan wañutsiyänanpaqmi permïtirqan.
63Nina rupaqnöraqmi jövinkunatapis guërrachö wañutsiyarqan.
Tsaymi jipashkuna casarayänanpaq jövinkunapis karqannatsu.
64Sacerdötikunatapis espädawanmi wañutsiyarqan.
Viüdankunapis wañutsiyänanta mantsakurmi lütuyarqannatsu.
65Tsaymi puñukashqanö kanqanpita tantiyar kuyanqan runakunata Dios Yaya yapay yanaparqan.
Vïnuta upyarkur alli valorashqa valienti runanömi 66Dios Yaya chikiqninkunata venciskir qatikacharqan.
Tsaynöpam tsay chikiqninkuna imayyaqpis penqakuychö kayanqa.
67Dios Yaya manam munarqannatsu Josépita miraq Efraín trïbukuna täkuyanqan partichö templun kananta.
68Tsaypa rantinmi Judá trïbukuna täkuyanqan partita akrarqan.
Tsaychömi kuyanqan Sión lömata akrarqan templunta shäritsiyänanpaq.
69Templunta shäritsirmi ciëluyaq altu kananpaq ruratsirqan.
Kay patsanö mana ushakaq kananpaqmi ruratsirqan.
70Üshata mitsikur puriykaqtam serviqnin Davidta akrarqan.
71Jacobpita miraq kuyanqan Israel runakunata cuidananpaqmi üshata mitsikur puriykaqta akrarqan.#1Sam. 16.11-12; 2Sam. 7.8; 1Crón. 17.7.
72Tsaymi Davidqa llapan shonqunwan paykunata shumaq cuidarqan.
Alli yarpachakurmi paykunata pushararqan.
Currently Selected:
Salmo 78: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
