Salmo 40
40
Salmo 40 (39)
Yanapananpaq Dios Yayata mañakunqan
Salmo 70
1 (1) Cantaqkunapa mandakuqninpaqmi. David qellqanqan salmu.
1 1 (2) Yanapamänanpaqmi Dios Yayata shuyashkä.
Qayakunqäta wiyarmi yanapamashqa.
2 2 (3) Alläpa ruri tutapaq pözuman jeqashqanö kaykaptïmi salvamashqa.
Pätsiman jatikashqanö kaykaptïmi jipimashqa.
Mana yapay jatikänäpaqmi rumi jananman ichïtsimashqa.
Tsaymi mana llutskakaqnöna kawakuykä.
3 3 (4) Tsaynö yanapamaptinmi mushuq alabanzata cantar Diosnintsikta alabaykä.
Salvamanqanta rikarmi atskaq runakuna kushikur Dios Yayaman confiakuykäyan.
4 4 (5) Dios Yayaman confiakuqkunam kushishqa kawakuyan.
Paykunaqa allish tukuqkunaman manam confiakuyantsu.
Ïdulukunatapis manam adorayantsu.
5 5 (6) Dios Yaya, atska kutim mantsakaypaq kaqkunata rurar yanapayämashkanki.
Yanapayämanqaykita manam yupaytapis puëdïtsu.
Llapan imaykachö yanapayämanqaykita willakurpis manam ushämantsu.
6 6 (7) Qammi tantiyatsimashkanki sacrificiukunawan y tsaki mikuy ofrendakunawan mana kushikunqaykita.
Tsaynöllam musyatsimashkanki waykana sacrificiukunata y purificätsina sacrificiukunata mana munanqaykita.
7 7 (8) Tsaymi nirqaq:
<<Rölluchö noqapaq qellqashqa kanqannömi cäsunaqpaq kaychö kaykä.
8 8 (9) Dios Yaya, munanqaykita ruranäpaq listum kaykä.
Leynikikunatapis llapantam shonqüchö yarparaykä>>.#Heb. 10.5-7.
9 9 (10) Llapan runakuna qorikäyanqanchömi alli ruraq kanqaykita willakushkä.
Mana upällakunqätam musyanki.
10 10 (11) Willakurmi nirqä: <<Dios Yayam allillata ruran.
Prometinqanta cumplirmi salvamantsik.
Llakipäkuqmi y rasun kaqllatam nimantsik>>.
11 11 (12) Dios Yaya, llakipaykallämay.
Änimanqaykinölla llakipämar imaypis tsapaykallämay.
12 12 (13) Yupaytapis mana puëdiypaq ñakaykunawanmi ñakaykä.
Alläpa jutsata rurashqa karmi waqarnin ñawïtapis oqraykäna.
Aqtsäpitapis mas atskam jutsäkuna.
Tsaymi imata ruranäpaqpis gänasnï kannatsu.
13 13 (14) Dios Yaya, salvaykallämay.
Sas shamur yanapaykallämay.
14 14 (15) Wañutsimayta yarpaqkuna penqakur umpuykachäyätsun.
Mana alliman ishkinäta munaqkuna penqakur aywakuyätsun.
15 15 (16) Asipämaqkunapis penqakur aywakuyätsun.
16 16 (17) Qamta ashishuqnikikunaqa kushikuyätsun.
Salvanqaykipita kushikuqkunaqa imaypis niyätsun:
<<Dios Yaya alabashqa kaykullätsun>>.
17 17 (18) Llakishqa karmi ni imanakaytapis puëdïtsu.
Taytay, sas shamur libraykallämay.
Qammi yanapamaqnï y salvamaqnï kanki.
Dios Yayallä, sas yanapaykallämay.
Currently Selected:
Salmo 40: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
