Proverbios 31
31
Mandakuq Lemuelta maman yätsinqan
1Rey Lemueltam maman yätsir nirqan:
2Hïju, wawä kaptikim alläpa kuyaq.
Dios Yayapa bendicionninwanmi kay patsaman apamushkaq.
Tsaymi kanan yätsishayki.
3Warmikunawan umayki achachashqa purikuytsu.
Tsaynö purikurmi reykunapis mana alli ruraykunaman chäyan.
4Tsaynöllam allitsu reykuna y autoridäkuna upyaman churakäyanqanpis.
5Macharkurmi Dios Yayapa leyninkunata qonqaskir waktsakunapa contran imatapis rurayanman.
6Vïnuta ni ima machätsikuqkunata ama upyaytsu.
Tsaykunam llakishqa y resentïdu kaqkunallapaq.
7Waktsa kayninkunata y llakikuyninkunata qonqäyänanpaq tsaykunata upyayätsun.
8Mana pïyuqkunapa favornin shäriy.
Waktsakunata pipis äjakunanta permïtiytsu.
9Waktsakunapa y qollmi shonqukunapa janan shärir alli justiciata ruray.
Arukuq warmita aläbanqan
10Alli arukuq warmitaqa ¿piraq fácil tarinman?
Arukuq warmiqa ima alhäjapitapis masmi välin.
11Alli warmimanmi ollqun imaypis confiakun.
Arukuq warmiwan churakaptinqa imaykanpis manam faltanqatsu.
12Tantiyakuq warmim waran waran ollqunta yanapan.
13Tsaynö warmiqa millwata y lïnuta ashiskirmi kushishqa putskakun.
14Imaykaläya negociuta puritsiq büquinömi wajinchö ima wananqantapis maytsaypita apamun.
15Tsaka tsakalla shärikuskirmi wamrankunatawan serviqninkunatapis mikuynin qaran.
16Alli rikaykurraqmi chakratapis rantin.
Arur gänanqan qellaywanmi üvatapis plantatsin.
17Mana qelanarmi kushi kushi arunpis.
18Ima negociuta rurananpaqpis shumaqraqmi yarpachakun.
Paqaspapis aktsita tsarirkatsirmi imayka rurayninkunatapis rurakun.
19Kikin putskakur awaskirmi llatapanpis ruran.
20Llakipäkuq kayninwanmi waktsakunata yanapar faltapukuqkunata imaykallatapis qaraykun.
21Wajinchö kaqkunatam janay janay shukutsin.
Tsaymi rashta shikwamuptinpis llakikuntsu.
22Kikinmi bayëtatapis awan.
Chaniyuq llatapakunatam shukukun.
23Ollqunpis marka majinkunachömi mas reqishqa.
Tsaymi nacionninchö mandakuqkunawan y mayor runakunawanpis qorikan.
24Negociantikunata rantikunanpaqmi llatapatapis ruran y wachukutapis awan.
25Pïmaypitapis respitatsikun.
Waray warantin kawananpaqpis yarpachakurmi previnikun.
26Manakaqkunataqa imaypis manam parlantsu.
Kushishqam allillata yachatsikunpis.
27Wajinchö rurayninkunatam imaypis mana ajayar rurakun.
Manam ni imatapis dembaldiqa mikuntsu.
28Wamrankunapis y ollqunpis aläbarmi niyan:
29<<Wakin warmikuna alli kayaptinpis qammi llapanpitapis mas alli kanki>>.
30Allish chïna kanqanpis manakaqllapaqmi.
Kuyakuypaq kanqanpis ushakaqllam.
Peru Dios Yayapita mantsakuq warmim sïqa aläbashqa kanqa.
31Alli arukuq kanqanpita aläbayay.
Tsaynölla llapan ruranqanpita felicitäyay.
Currently Selected:
Proverbios 31: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
