Eclesiastés 1

Llapanpis ushakaqlla kanqan

1Kaychömi qellqashqa kaykan yachatsikuq runa willakunqan. Paymi Davidpa tsurin kar Jerusalénchö rey karqan. 2Yachatsikuq karmi nirqan:

<<¡Llapan imaykam manakaqllapaq!

¡Kay patsachö päsanqankuna imanir y imapaq kanqantapis manam musyantsiktsu!

3¡Imatatan runa jipin kay patsachö mayjina arurpis!

4<<Maytsaychömi wamrakuna yuriyan y runakunapis wañuyan.

Tsaynö kaptinpis kay patsaqa kanqannöllam kaykan.

5Rupaypis mana ajayarmi yarqamun y jeqan.

Yapay yarqamunanpaqmi kanqanman kutin.

6Tsaynöllam wayrapis sur kaqläpa aywaskir norti kaqläman kutin.

Mana päraypam imaypis tumaykan.

7Llapan mayukunam lamarllaman aywayan.

Peru lamarqa manam ni imaypis juntantsu.

Pashtaq yakupa ñawinpitam yapay yaku yarqamun.

Tsaypitam imaypis aywanqannö yapay raqrapa aywan.

8Tsaynölla llapan kaptinmi alläpa llakikü.

Alläpa llakikunqätapis manam shumaq tantiyatsiyta puëdïtsu.

Mayjina runa rikaptinpis rikänanpaq kaqkuna masraqmi kan.

Maytsikata wiyaptinpis wiyananpaq kaqkuna masraqmi kan.

9<<Unay päsanqankunam yapay päsaykan.

Puntata rurakaqkunam yapay rurakaykan.

Kay patsachömi unay kanqannölla llapan kaykan.

10Tsaynö kaptinpis wakin kaqmi niyan:

<¡Peru kaymi sïqa imaypis päsashqatsu!>

Tsaynö niyaptinpis noqam nï:

<Noqantsik manaraq yurishqam tsaypis unayna päsashqa.

11Unay kaq runakuna rurayanqanpis qonqakashqanam.

Tsaynöllam kanan ruranqantsikpis qonqakanqa.

Qepa yuriq runakuna rurayanqanpis qonqakanqam> >>.

Llapan ruranqantsik manakaqllapaq kanqan

12Noqa yachatsikuqmi Jerusalénchö Israel runakunapa mandakuqnin rey karqä. 13Tsaymi imaykatapis dëjaykur yarpachakurqä kay patsachö imanir llapan päsanqankunata tantiyanäpaq. Tsayta tantiyanapaq Dios Yaya churamashqapis alläpa ajam. 14Kay patsachö imanir llapan päsanqankunata tantiyayta munarmi wayrata achkuyta munaqnölla kaykantsik.

15Ima wiksushqatapis manam derechayta puëdintsiktsu.

Mana kaptinqa imatapis manam yupantsiktsu.

16Shonqullächö yarpachakurmi tantiyarqä pïmaypitapis mas tantiyakuq kanqäta. Jerusalénchö noqapita mas punta kaq reykunapitapis mas yachayyuqmi kä.#1Rey. 4.29-31. 17Tsaymi yarpachakushkä alli ruraykuna y llutan ruraykuna imanö kanqanta musyanäpaq. Peru tantiyayta munarmi wayrata achkuyta munaqnölla kaykantsik.

18Mas yachayyuq karmi mas uma nanayta tarinqa.

Mas yachayyuq karqa masmi llakikunqa.

Currently Selected:

Eclesiastés 1: qxn

Highlight

Copy

Compare