Proverbios 22
22
1Yuraq qellayyuq y qoriyuq kaypitapis mas allim pïmaypitapis alli rikashqa kanqantsik.
2Rïcuta y waktsatapis Dios Yayam kamashqa.#Prov. 29.13.
3Alli yarpachakuq runaqam ima peligrupitapis cuidakun.
Peru mana yarpachakuq runam sïqa ima desgraciamanpis ishkin.#Prov. 27.12.
4 Dios Yayapita mantsakuq qollmi shonqu runam rïcuyanqa, pïmaypitapis alli rikashqa kanqa y alli kawayta tarinqa.
5Mana alli ruraq runataqa imayka desgraciapis päsanmi.
Peru alli ruraq runam sïqa tsaykunapita cuidakun.
6Wamrataqa wamra kanqanyaqlla alli kawananpaq shumaq yachatsiy.
Tsaymi yashqayarpis yachakunqantaqa qonqanqatsu.
7Rïcu runam waktsakunata poderninchö katsin.
Jaqan yaykuqtam prestaqnin poderninchö katsin.
8Mana alli ruraq runam jutsanpita ñakanqa.
Dios Yayam rabyayninwan ushakätsinqa.
9Waktsakunata llakipar imallatapis qararmi bendicionta chaskinqa.
10Abusïvu runata qarquskiptikim chikinakuy, piñakuy ni ashanakuypis kanqanatsu.
11Rasun kaqllata parlaq runatam reypis kuyan.
Alli shimillanpa parlaq runam reypa amïgun.
12Yachayyuq runatam Dios Yaya imaykapitapis tsapan.
Peru llullakuq runatam sïqa alläpa penqakuyman churan.
13Qela runam aruyta mantsar nin:
<<Nänichömi león mikumanqa>>.#Prov. 26.13.
14Ollqunta mana respitaq warmipa kuyakuyninqa imayka aswanïllanö trampam kaykan.
Tsay warmiwan kakuq runaqa Dios Yayatam rabyanätsin.
15Mana cäsukuq wamram mana allikunata ruran.
Peru astar corrigiyaptinmi mana alli ruraykunata dëjan.
16Rïcuyänan rayku waktsata engañar o rïcuman qaraykunata aparqa muchuymanmi chanqa.
Yachayyuq runakunapa kimsa chunka (30) yachatsikuyninkuna
17Yachayyuq runakuna yätsiyäshunqaykita chaskikuy.
Tantiyatsiyäshunqaykinölla imatapis ruray.
18Yachatsiyäshunqaykita imaypis yarparanki.
Tsaymi pitapis willanaykipaq imay hörapis listu kaykanki.
19 Dios Yayaman imaypis confiakunaykipaqmi yätsishayki.
20Qampaqmi qellqaykä kimsa chunka (30) yachatsikuykunata.
Tsaychömi kaykan yätsikuykunawan albertikuykuna.
21Tsaykunata yachakurmi alli yachayyuq kanki.
Tsaymi pï tapushuptikipis rasun kaqllata contestanki.
1
22Waktsa kaykaptin pitapis ama suwapunkitsu.
Mana imannaqkunata juezpa puntanchö ama tumpankitsu.
23 Dios Yayam waktsakunapa favornin shärin.
Waktsakunata qechuqkunatam kikinta waktsayätsinqa.
2
24Mana alli ruraq runawan y rabyaq runawanqa ama juntakankitsu ni amïgupis kankitsu.
25Paykunawan juntakarqa mana alli costumbrinkunatam yachakunki.
Paykunanö kawarmi kunkaykiman cutsilluta churaqnö kaykanki.
3
26Pitapis ama garantizankitsu.
27Tsay jaqanta pägakunaykipaq mana kaptinmi cämaykitapis qechuyäshunki.
4
28Unay aylluykikuna mujun churanqanta ama wititsinkitsu.#Deut. 19.14; 27.17; Prov. 23.10; Ose. 5.10.
5
29Alli aruq runam mandakuqkunapa yanapaqnin kanqa.
Manam lluta runakunapa poderninchötsu kanqa.
Currently Selected:
Proverbios 22: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
