Proverbios 12
12
1Tantiyakuq runam pipis corrigiptin chaskikun.
Peru mana tantiyakuqmi sïqa corrigiptinpis chaskintsu.
2Alli ruraq runatam Dios Yaya yanapan.
Peru mana alli ruraq runatam sïqa castigan.
3Mana alli ruraq runatam pïmaypis chikin.
Peru alli ruraq runatam sïqa pïmaypis kuyan.
4Alli ruraq warmiqa ollquntam kushitsin.
Peru mana respitaq warmim sïqa ollqunta alläpa piñatsin.
5Alli ruraq runam allikunata rurananpaq yarpachakun.
Peru mana alli ruraqmi sïqa pitapis engañananpaq yarpachakun.
6Mana alli ruraq runa parlanqanqa pitapis wañutsinanpaq trampanömi kaykan.
Peru alli ruraq runa yätsinqanmi sïqa alli kawakunanpaq kaykan.
7Mana alli ruraq runakunam pöcu tiempullata ushakäyan.
Peru alli ruraq runakunam sïqa kikinwan castankunapis atska wata kawakuyanqa.
8Yachayyuq runatam pïmaypis respitan.
Peru mana tantiyakuq runatam sïqa pïmaypis mana alli rikan.
9Faltapukuychö kaykar allish tukunqanpitaqa mas allim kanman waktsa karpis amïguyuq kanqan.
10Alli ruraq runam wätantapis llakipan.
Peru mana alli ruraq runam sïqa llakipantsu.
11Arukuq runapam mikuyninpis sobrat sobrat kanqa.
Peru qela runakunawan tallukaq runaqa yarpayninnaqmi kaykan.
12Mana alli runam jukpa kaqta munapan.
Peru alli runam sïqa kikin arukunqanwan kushishqa kawakun.
13Mana alli ruraq runatam shimillan imaykamanpis qarpun.
Peru alli ruraq runam sïqa imayka problëmapitapis allilla yarqun.
14Pï runapis parlanqanpitam alli o mana alli rikashqa kayan.
Tsaynöllam imatapis ruranqanpita allita o mana allitapis tarin.#Prov. 13.2; 18.20.
15Mana yachayyuq runam ima ruranqanpis alli kanqanta yarpan.
Peru yachayyuq runam sïqa yätsiyanqanta chaskikun.
16Mana tantiyakuq runam imaykallapitapis sas rabyan.
Peru tantiyakuq runam sïqa ashayaptinpis upällakun.
17Alli testïguqa rasun kaqllatam parlan.
Peru mana alli testïgum sïqa imaykatapis llullakur parlan.
18Mana yachayyuq runakuna parlanqanqa cutsillunöraqmi shonqunman chan.
Peru yachayyuq runa parlanqanmi sïqa imayka jampi kutikätsiqnö.
19Rasun kaqta parlaq runam atska wata kawakun.
Peru llullakuq runam sïqa pöcu tiempulla kawakun.
20Mana alli ruraq runam pitapis engañanallanpaq yarparan.
Peru piwanpis alli kawakuq runa yätsiptinmi sïqa pïmaypis kushikun.
21Alli ruraq runataqa manam imapis päsantsu.
Peru mana alli ruraq runatam sïqa imayka desgraciapis päsan.
22Llullakuq runatam Dios Yaya rikaytapis munantsu.
Peru mana llullakuq runatam sïqa kuyan.
23Tantiyakuq runaqa yachayyuq kanqanta manam aläbakuntsu.
Peru mana tantiyakuq runam sïqa mana allikunata rurarpis aläbakun.
24Arukuq runam mandakuq tikran.
Peru qela runam sïqa jukta servin.
25Alläpa llakikurmi llakipaypaq purin.
Peru pillapis alli shiminpa parlapaptinmi sïqa kushikun.
26Alli ruraq runam runa majinta shumaq tantiyatsin.
Peru mana alli ruraq runam sïqa mana alliman ishkitsin.
27Qela runaqa manam ni imatapis tarintsu.
Peru arukuq runam sïqa imaykayuq tikran.
28Alli ruraq runam imaypis alli kawakun.
Peru juiciunnaq runam sïqa wañuytapis kikin ashin.
Currently Selected:
Proverbios 12: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
