Lucas 4

Jesústa Satanás tentayta munanqan

Mateo 4.1-11; Marcos 1.12-13

1Jesús bautizakuskir Espíritu Santupa poderninchö kaptinmi Jordán mayupita desiertuman Espíritu Santu pusharqan. 2Tsaychö chusku chunka (40) junaq kaykaptinmi diablu tentarqan. Tsay junaqkuna mana ni imatapis mikurmi Jesús mallaqarqan.

3Tsaymi diablu nirqan: <<Diospa Tsurin karqa mä kay rumita tantaman tikratsiy>>.

4Jesúsnam nirqan: <<Dios Yayapa palabranmi nin: <Runaqa manam tantata mikurllatsu kawan, [sinöqa Dios Yaya ninqankunata cäsurmi]> >>.#Deut. 8.3.

5Tsaypitanam altu jirkaman diablu pushaykur maytsay nacionkunata saslla rikätsir 6nirqan: <<Llapan rikanqayki nacionkunata y tsaychö riquëzakunatam qaraykuqman. Tsaykunata chaskishqa karmi munanqä kaqtaqa pitapis qarayküman. 7Qonqurikuykur adoramaptikiqa kay llapan rikanqaykitam qaraykuqman>>.

8Jesúsnam nirqan: <<[¡Kaypita witiy, Satanás!] Dios Yayapa palabranmi nin: <Dios Yayallatam adorayanki. Payllatam serviyanki> >>.#Deut. 6.13.

9Tsaypitanam Jerusalénman Jesústa diablu pusharqan. Tsaychömi templupa mas altunman ichiykatsir nirqan: <<Diospa Tsurin karqa mä kaypita jeqarpuy. 10Diospa palabranmi nin: <Angelninkunatam Dios Yaya kachamunqa cuidayäshunaykipaq. 11Paykunam achkuyäshunki chakillaykitapis rumikunachö mana takakunaykipaq> >>.#Sal. 91.11-12.

12Jesúsnam nirqan: <<Tsaynöllam Dios Yayapa palabranchö nin: <Dios Yayata ama tentankitsu> >>.#Deut. 6.16.

13Jesústa tentayta mana puëdirmi diablu aywakurqan yapay kutinanpaq yarpar.

Galileachö Jesús willakur qallanqan

Mateo 4.12-17; Marcos 1.14-15

14Tsaypitanam Espíritu Santupa poderninwan Galileaman Jesús kutirqan. Tsay markakunachömi runakuna Jesús alli yachatsikuq kanqanta parlayarqan. 15Sinagögakunachö yachatsikuptinmi payta alabarnin niyaq: <<¡Payqa allim yachatsikun!>>

Nazaret markanchö Jesús willakunqan

Mateo 13.53-58; Marcos 6.1-6

16Tsaypitanam wiñanqan markan Nazaretman Jesús kutir costumbrinmannö jamay junaqchö sinagögaman aywarqan. Tsaychömi Dios Yayapa palabranta liyinanpaq runakunapa puntanman ichirqan. 17Profëta Isaías qellqanqan rölluta makyayaptinmi liyiyta munanqanta kicharkur liyimurqan:

18<<Dios Yayam Espïritunta noqaman kachamushqa.

Paymi akramashqa alli willakuyninta waktsakunata willanäpaq.

Tsaynöllam kachamashqa [llakishqa kawaqkunata animatsinäpaq,]

juklä nacionman prësu aywaqkuna librina kayanqanta willanäpaq,

qaprakunata kutikätsinäpaq,

chikiqninkunapa poderninchö sufriq runakunata libranäpaq

19y Dios Yaya salvananpaq kaq tiempu chämunqanta willakunäpaq>>.#Isa. 61.1-2.

20Tsaynö liyiskirnam rölluta röllurkur sinagögachö yanapakuq runata kutiykatsirqan. Jamaykuptinnam tsaychö kaykaqkuna payta rikaräyarqan. 21Tsaynam Jesús nirqan: <<Liyimunqächö ninqannömi kanan cumplishqana>>.

22Tsaymi llapan runakuna alläpa kushikur ninakuyarqan: <<¡Payqa shumaqmi parlan! ¿Manaku Josépa tsurin kaykan?>>

23Jesúsnam nirqan: << <Jampikuq karqa kikikiraq jampikunkiman> niyanqannömi qamkunaqa munayanki Capernaúmchö milagruta ruranqänö kay markachöpis milagruta ruranäta>>.

24Tsaypitanam nirqan: <<Rasun kaqtam niyaq: Manam ni mayqan profëtatapis markanchöqa chaskiyantsu. 25Rasun kaqtam niyaq: Profëta Elías kawanqan witsaymi kimsa wata y soqta killa alläpa usyaptin maytsay Israel markachö muchuy karqan. Tsay witsay Israelchö atskaq viüdakuna sufriyaptinpis 26Dios Yaya manam Israelchö ni mayqan viüdamanpis Elíasta mandarqantsu. Tsaypa rantinmi Sidónpa lädun Sarepta markachö täkuq viüdallaman mandarqan.

27<<Tsaynöllam profëta Eliseo kawanqan witsaypis Israelchö lepra qeshyaywan atskaq qeshyayarqan. Peru tsaynö kayaptinpis manam ni mayqantapis Eliseo kutikätsirqantsu. Tsaypa rantinmi Siria nacionpita Naamán shutiyuq runallata kutikätsirqan>>.

28Jesús tsaynö ninqanta wiyaykurmi sinagögachö kaykaq runakuna alläpa piñakuyarqan. 29Tsaymi llapan sharkur markapita Jesústa jipiskir marka kuchun tunaman apayarqan tsaypita cunjarpuyänanpaq. 30Tsaynö apaykäyaptinmi runakunapa rurinpita ulluskir aywakurqan.

Supay löcuyätsinqan runata Jesús kutikätsinqan

Marcos 1.21-28

31Tsaypitanam Galileachö Capernaúm markaman Jesús aywarqan. Tsaychömi cada jamay junaq runakunata yachatsirqan. 32Shumaq yachatsikunqanta wiyarmi mantsakashqa ninakuyarqan: <<¡Payqa poderösu karmi shumaq yachatsimantsik!>>

33Tsay sinagögachömi supay löcuyätsinqan runa kaykarqan. Paymi qayaraypa nirqan: 34<<¡Nazaretpita Jesús, [aywakuy]! ¡Imanankitan noqakunawan! ¿Ushakätsiyämaqnïku shamushkanki? ¡Noqam musyä Dios Yaya kachamunqan santu runa kanqaykita!>>

35Tsaymi supayta ollqutupar Jesús nirqan: <<¡Upälla kay runapita yarquy!>>

Niykuptinmi llapanpa puntanchö runata tsapiskir mana imanarlla aywakurqan. 36Tsayta rikarmi juknin juknin mantsakashqa ninakuyarqan: <<¡Imatanatan rikantsik! ¡Poderösu kayninwan piñapaptinmi supaykunapis cäsurnin aywayan!>>

37Supayta qarqunqanta musyaskirmi entëru Galileachö Jesús poderyuq kanqanta parlayaq.

Pedrupa suegranta Jesús kutikätsinqan

Mateo 8.14-15; Marcos 1.29-31

38 Sinagögapita yarquskirnam Simónpa wajinman Jesús aywarqan. Tsaychömi Simónpa suegran fiebriwan antsa qeshyaptin kutikätsinanpaq Jesústa rugayarqan. 39Rugayaptinmi qeshyaykaqman witiykur nirqan: <<Amana fiebriynatsu>>. Tsaynö niptinmi jina höra kutikaskir paykunata mikuyta qararqan.

Atskaq qeshyaqyashakunata Jesús kutikätsinqan

Mateo 8.16-17; Marcos 1.32-34

40Rupay jeqaykaptinnam tukuyläya qeshyaywan qeshyaykaqkunata Jesúsman apayämurqan. Jesúsnam juk juklla paykunaman makinta churar llapanta kutikätsirqan. 41Tsaymi supayyuq runakunapita supaykuna yarqurnin qayaraypa niyarqan: <<¡Qamqa Diospa Tsurinmi kanki!>>

Dios Yaya kachamunqan Cristo kanqanta supaykuna niyaptinmi mana parlayänanpaq Jesús ollqutuparqan.

Jesús willakur purinqan

Marcos 1.35-39

42Patsa waraskiptinnam tsunyaman Jesús aywakurqan. Tsaymi runakuna ashir pay kaykanqanman chaykur mana aywakunanpaq rugayarqan. 43Jesúsnam nirqan: <<Dios Yayapa mandakuyninpa alli willakuyninta wakin markakunachöpis willakunämi. Tsaypaqmi Dios Yaya kachamashqa>>.

44Tsaypitanam Israelchö maytsay markakunapa purirnin#4.44 Wakin griego copiakunachömi Galileapa purir niyan. sinagögakunachö Dios Yayapa willakuyninta Jesús willakurqan.

Currently Selected:

Lucas 4: qxn

Highlight

Copy

Compare