Jeremías 8
8
Rupayta, killata y qoyllurkunata adorayanqanpita Dios Yaya rabyanqan
1Dios Yayam nin: <<Tsay witsaymi contraykikuna shamur wañuqkunapa tullunkunata jipiyanqa. Tsay tullukunam kanqa wañuq reykunapa, Judá nacionpa wakin mandaqninkunapa, sacerdötikunapa, profëtakunapa y Jerusalénchö unay runakunapa. 2(Tsay runakunam manaraq wañur rupayta, killata y qoyllurkunata qonqurpakur adorayarqan. Paykunam imatapis musyayta munar rupayta, killata y qoyllurkunata tapukuyarqan.) Tsay wañuqkunapa tullunkunata pipis qorimunanpaq ni pampananpaq mana kaptinmi wätakunapa wanunnö mashtaräyanqa. Tsaymi tullunkuna jitaraqta rupaypis, killapis y qoyllurkunapis rikäyanqa.#Jer. 25.33.
3<<Wañuypita qeshpiq kaqtam maytsayman qarqushaq. Juklä nacionman qarquptïmi alläpa llakikur wañuyta munayanqa. Llapanta mandaq Dios Yaya karmi nï.
Jutsa rurayta mana jaqiyanqan
4<<Tsaynölla Jerusalén runakunata ninki:
<< <Dios Yayam nin:
Pipis ishkirqa sharkunmi.
Nänita pantarpis aywanqan nänimanmi kutin.
5Tsaynö kaykaptinqa ¿imanirtan Jerusalén runakuna näniman mana kutiq runakunanö kaykäyan?
¿Imanirtan ninqäkunata mana cäsur conträ tikrayashqa?
Paykunam mana väliq ïdulukunaman creyir noqaman kutimuytapis munayannatsu.
6<< <Paykuna parlayanqantam wiyashkä.
Manam ni mayqantapis rasun kaqta parlaqtaqa wiyashkätsu.
Tsaynöllam ni mayqallantapis wiyashkätsu jutsata rurayanqanpita arrepentikur perdonta mañakayämanqanta.
Tsaypa rantinmi bestia mana mantsakur guërraman yaykuqnö mana mantsakur jutsata llapan rurayan.
7 Cigüeñapis usya tiempu y tamya tiempu maypa aywananpaq kanqanta musyanmi.
Kullkushpis, grüllapis y wayanïtupis imay witsay jukläman aywakunanpaq kanqanta musyanmi.
Peru kuyanqä runakunam sïqa leynïkunata musyaykarpis cäsuyantsu.#Isa. 1.3.
Sacerdötikuna y profëtakuna mana allita yachatsiyanqan
8<< <¿Imanöpatan niyankiman leynïkunata katsir musyaq yachayyuq kayanqaykita?
Leynïkunata yachatsiyäshuqnikikunapis llutantam yachatsiyäshunki.
9Peru tsay yachatsikuqkunam castigaptï penqakuychö kayanqa.
Trampaman yaykuq wätanömi mantsakäyanqa.
Ninqäkunata mana cäsukurmi rasunpa yachayyuqtsu kayan.
10Paykunam llapanpis yarpäyan suwakuypa imatapis tariyänanpaq.
Tsaymi paykunata castigar warminkunatapis y chakrankunatapis juklä runakunata entregashaq.
<< <Qamkunachö profëtakuna y sacerdötikunam mana allita yachatsikuyan.
11Paykunam kuyanqä runakuna däñakushqanö kayaptinpis yanqalla jampiqnö kayan.
Castïgu kananpaq kaykaptinpis <<manam ima castïgupis kanqatsu>> niyan.#Jer. 6.14; Eze. 13.10.
12Melanaypaq jutsata rurarpis manam penqakuyantsu.
Manam penqakuytapis yachayantsu.
Tsaynö kayanqanpita castigaptïmi wakin runakunawan paqta wañuyanqa.
Noqa Dios Yayam nï.#Jer. 6.12-15.
13<< <Paykunapaq manam imapis kanqanatsu.
Üva chakrankunapis y hïgus chakrankunapis manam wayunqanatsu.
Llapan murupakuyanqanmi tsakir ushakanqa.
Llapan alistapanqätam jankat qechushaq.
Noqa Dios Yayam nï> >>.
Castïguwan wañuyänanpaq kanqanta runakuna tantiyayanqan
14<<Tsaymi runakuna niyanqa:
<Chikimaqnintsikkunawan ushakätsimänapaqmi Dios Yaya destinamashkantsik.
Diosnintsikta rabyatsir jutsata ruranqantsikpita venenashqa yakuta upyatsimaqnintsiknömi kanqa.
Tsaynö kaykaptinqa tsinkakunapaq alli segurashqa markakunaman sas aywakushun.
Mejorqa kaychö wañunqantsikpa rantin tsaychö wañukushun.
15Alli kawanapaq kanqanta yarpashqapis manam yarpanqantsiknötsu kashqa.
Dios Yaya yanapamänapaq kanqanta yarpashqapis desgraciallam päsamantsik.
16Contrantsikkuna shamuptin bestiankuna jäkallyanqanpis Dan markapitam wiyakaykämun.
Bestiankuna wijijïyaptinmi llapan jirkakuna karkaryan.
Contrantsikkunam nacionnintsikta ushakätsiyänanpaq shamuykäyan.
Markakunata juchutsirmi tsaychö täkuqkunatapis llapanta wañutsiyanqa> >>.
17 Dios Yayam nin:
<<Qamkunamanmi contraykikunata kachamushaq venënuyuq culebrakunatanö.
Culebrata manshuyätsiyta mana puëdiptin kaninqannömi tsay contraykikunapis ushakätsiyäshunki.
Noqa Dios Yayam nï>>.
Jeremías alläpa llakikunqan
18Dios Yaya tsaynö niptinmi shonqüpis alläpa llakikuywan nanayparaq nanäman.
19Marka majïkunam maytsaychö waqar niyan: <<Sióntam Dios Yaya jaqishqa>>.
Tsaynöllam nikäyan Dios Yaya mandaqnin rey kaykarpis paykunawan manana kanqanta.
Dios Yayam nin:
<<¿Imapaqtan rabyatsiyämashkanki?
Juklä runakuna adorayanqan mana väliq ïdulukunata ¿imanirtan adoraykäyanki?>>
20Runakunanam niyan:
<<Trïgu cosëcha chämushqana kaptin
y üva cosëcha, hïgus cosëcha y olïvus cosëcha chämushqana kaptinpis
noqantsikqa muchuyllachömi kaykantsik>>.
21Marka majïkuna llakikuyanqanta rikarmi noqapis alläpa llakikü.
Mantsakaywanmi umäpis turbanan.
22Cuerpun qeshyaptinqa jampipis y jampikuqpis Galaadchö kanmi.
Peru jutsata rurayanqanpaqmi sïqa ima jampipis ni jampikuqpis kantsu.
Currently Selected:
Jeremías 8: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
