Jeremías 6
6
Jerusalénta atacayänanpaq willakunqan
1¡Benjamín trïbu runakuna, Jerusalénpita qeshpir aywakuyay!
¡Tecoachö cornëtata töcayay!
¡Bet-haquerem jirkachö qoshnïtsiyay!#6.1 Tsay witsaymi cornëtata töcayaq y jirkachö qoshnïtsiyaq soldädukuna atacaq shamuykäyanqanta musyayänanpaq.
¡Norti kaqläpitam alläpa mantsakaypaq castïgu chämunanpaqna kaykan!
2<<Siónta ushakätsinäpaqnam kaykä.
3Tsaymi üsha mitsikuqkuna üshankunata qatiqnö soldädunkuna pushashqa Jerusalénman reykuna chäyämunqa.
Üsha mitsikuqkuna üshankunawan patsakuqnömi marka waqtankunachö tumat patsakuyanqa.
Tsaypitam qewata üshakuna ushaqnö markata chipyat ushakätsiyanqa.
4<<Tsay reykunam willanakur niyanqa:
<¡Alli alistakushun Jerusalén runakunata atacanapaq!
¡Pullan junaq yaykapushun!
¡Peru tardiyaykannam!
¡Llantupis päsaykannam!
5¡Tsaynö kaykaptinqa tutapaypana yaykapushun!
¡Llapan palaciunkunatapis jankat juchutsishun!> >>
6Tsay mandakuq reykunatam llapanta mandaq Dios Yaya nin:
<<¡Jerusalén punkuta pakiyänaykipaq qerukunata walluyay!
¡Murällan waqtankunaman allpata montunayay lätar yaykuyänaykipaq!
Tsay markachö runakunatam castigashaq.
Tsaychömi mana alli ruraq runakuna kayan.
7Pukyuchö yaku imaypis mana ushakanqannömi Jerusalénchö mana alli ruraykunapis ushakanqatsu.
Pïmaymi mana allikunata rurar maqanakurnin wañutsinakuyan.
Ñakatsinakur chikinakuykaqllatam imaypis rikä.
8Jerusalén runakuna, imanö kawayanqaykita tantiyakuyay.
Mana tantiyakuyaptikiqa jaqiskiyäshaykim.
Täkuyanqayki naciontam tsunyaman tikratsishaq>>.
9Llapanta mandaq Dios Yayam nin:
<<Jerusalénchö quëdaq runakunatam chikiqninkuna ashiyanqa.
Üvata pallar yapay yapay ashiqnömi prësu apayänanpaq ashiyanqa>>.
10Tsaymi Dios Yayata nirqä:
<<¿Pitaraq willashaq?
¿Pitaraq albertishaq?
¿Piraq wiyamanqa?
Tsay runakunaqa rinrinkuna tsapashqanömi kaykäyan.
Willakuynikita wiyarmi asikuyan.
Ima ninqaykitapis manam wiyayta munayantsu.
11Tsaymi noqapis qam rabyanqaykinö rabyä.
Rabyanqaykita manam upällämantsu>>.
Dios Yayam nimarqan:
<<Rabyarnin castiganäpaq kaqta willay cällichö wamrakunata y grüpu grüpu puriq jövinkunatapis.
Warmikunata, ollqukunata, awkinkunata, chakwankunatam mana llakipar prësu apayanqa.
12Runakunapa chakrankuna, wajinkuna y warminkunapis jukpanam kayanqa.
Kay nacionchö täkuq runakunatam castigashaq.
Noqa Dios Yayam nï.
Profëtapis sacerdötipis jutsata rurayanqan
13<<Paykunam llapanpis yarpäyan suwakuypa imatapis tariyänanpaq.
Profëtakunapis sacerdötikunapis engañakuqmi kayan.#Jer. 8.10.
14Paykunam kuyanqä runakuna däñakushqanö kayaptinpis yanqalla jampiqnö kayan.
Castïgu kananpaq kaykaptinpis <manam ima castïgupis kanqatsu> niyan.#Jer. 8.11; Eze. 13.10.
15Melanaypaq jutsata rurarpis manam penqakuyantsu.
Manam penqakuytapis yachayantsu.
Tsaynö kayanqanpita castigaptïmi wakin runakunawan paqta wañuyanqa.
Noqa Dios Yayam nï>>.
Akranqan runakuna Dios Yayata mana cäsuyanqan
16 Dios Yayam nin:
<<Tinkuq nänikunachö ichiykur tapukuyay mayqan näni mas unay kanqanta y alli kawayman chätsikuq kanqanta.
Tsay alli kaq nänipa aywayay.#6.16 Tsay alli kaq nänipa aywayay ninqanqa Dios Yaya unay ninqannö kawakuyay ninanmi.
Tsaynöpam jamayta tariyanki>>.#Mat. 11.29.
Peru runakunam niyan:
<<¡Manam tsay nänipaqa aywayäshaqtsu!>>
17Tsaymi rikachakuqkunata churar runakunata Dios Yaya nin:
<<¡Rikachakuqkuna cornëtata töcayämunqanta wiyaq wiyaqlla kaykäyay!>>#6.17 Rikachakuqkuna cornëtata töcayämunqanta wiyaq wiyaqlla kaykäyay ninqanqa profëtakuna willakuyanqanta cäsuyay ninanmi.
Peru runakunam niyan:
<<Manam wiyaytapis munayätsu>>.
Jerusalén runakunata castigananpaq willakunqan
18<<¡Maytsay nación runakuna, wiyayämay!
¡Kuyanqä runakunata imanö castiganäpaq kanqanta musyayay!
19<<¡Entëru mundu, shumaq wiyayämay!
Kay runakunatam alläpa castigashaq.
Tsaynömi castigashaq willakunqäta y leynïkunata mana cäsuyanqanpita.
20Paykunam manakaqllapaq juklä nacionpita mushkuq jachakunata apayämun.
Sabá nacionpita inciensiutapis manakaqllapaqmi altarnïman apayämun.
Noqaqa manam chaskïnatsu sacrificiuta altarchö waykayanqantapis.
Sacrificiukunata apayämunqan manam gustüpaqtsu.
21Tsaymi maypa aywayaptinpis trampanö paykunapaq kashaq.
Taytanpis, tsurinpis, vecïnunpis y reqishankunapis jankatmi wañuyanqa.
Noqa Dios Yayam nï>>.
22 Dios Yayam nin:
<<Norti kaqlä poderyuq nacionpita shayämunanpaqmi soldädukuna alistakuykäyan.
Alläpa karuchö täkuyanqanpitam shayämunqa.
23Paykunam flëchankunawan y espädankunawan kaykäyan.
Mana alli runa karmi pitapis llakipäyantsu.
Pelyarpis lamar yaku laqchikar qayaraqnöraqmi qayaräyan.
Bestiankuna montashqallanam guërrata rurayänanpaq kaykäyan.
¡Sión runakuna, atacayäshunaykipaqmi shayämunqa!>>#Jer. 50.41-42.
24Tsaymi Jerusalén runakuna niyanqa:
<<Tsay soldädukuna mana llakipäkuq kayanqanta musyarmi alläpa mantsakaywan kallpäkunapis kannatsu.
Alläpa llakikurmi qeshyakunanpaq tsaripukushqa warminö kaykäyä.
25¡Jallqapa ama aywashuntsu!
¡Nänikunapapis ama purishuntsu!
Chikimaqnintsikkunam espädankunawan tsaychö kaykäyan.
Maytsaychömi alläpa mantsakuypaq kaykan>>.#Jer. 20.3, 10; 46.5; 49.29.
26Tsaymi niyaq:
<<¡Marka majikuna, lütu llatapakunata shukurkur uchpachö qochpäyay!
¡Japallan tsuriki wañuptin waqaqnö alläpa waqayay!
¡Ushakätsimänapaq shamuqkunam illaqpita chäyämunqa!>>
27Dios Yayam nimarqan:
<<Qamtam churaq kuyanqä runakuna imanö kawayanqanta rikänaykipaq>>.
28Tsaymi nirqä:
<<Paykunam llapanpis mana cäsukuq y tumpakuq kayan.
Broncinö y fiërrunö shonqunkuna alläpa chukru kaptinmi mana alli rurayman churakashqa kayan.
29Herrërukuna fräguawan mayjina pükatsirpis yuraq qellaychö tallushqa metalkunata tsullutsiyta mana puëdiyanqannömi kä.
Tsaymi Jerusalén runakunata mayjina willarpis jutsa rurayta dëjayänanpaq tantiyatsiyta puëdïtsu.
30Tsay runakunatam Dios Yaya yanapanqanatsu.
Tsaymi pïmay niyanqa jitarishqa qellay kayanqanta>>.
Currently Selected:
Jeremías 6: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
