Isaías 39

Babiloniapita mandayanqan runakunata Ezequías chaskinqan

2 Reyes 20.12-19; 2 Crónicas 32.27-31

1Tsay witsaymi Babilonia nacionpa mandakuqnin rey Merodac-baladán musyarqan rey Ezequías alläpa antsa qeshyanqanpita kutikanqanta. (Merodac-baladánqa Baladánpa tsurinmi karqan.) Tsaymi cartakunatawan qaraykunata apatsirqan.

2Mandayanqan runakuna chäriyaptinmi Ezequías kushishqa chaskirqan. Paykunatam rikätsirqan qellayninta, qorinkunata, chaniyuq perfüminkunata, olïvuspita rurashqa aceitinkunata, armankunata y churakunan wajikunachö llapan imaykankunata. Palaciunchö kaqta y mandakunqan nacionchö kaqtam llapanta rikätsirqan.

3Tsaymi profëta Isaías rey Ezequíasman aywaykur tapurqan: <<Tsay runakuna ¿maypitatan shayämushqa? Y ¿ima niyäshuruykitan?>>

Ezequíasnam nirqan: <<Paykunaqa alläpa karu Babilonia nacionpitam shayämushqa>>.

4Isaíasnam yapay tapurqan: <<¿Imatatan palaciuykichö rikäyashqa?>>

Ezequíasnam nirqan: <<Palaciuchö kaqkunata y churakuna wajichö kaqkunatapis llapantam rikätsishkä>>.

5Tsaynam Ezequíasta Isaías nirqan: <<Tsaypunqa llapanta mandaq Dios Yaya ninqanta willashayki. 6Dios Yayam nin: <Tiempu chämunqam Babilonia nacionpita soldädukuna kay markata atacaskir palaciuchö rikätsinqayki riquëzakunata apayänanpaq. Paykunam unay castaykikuna qoriyanqankunata y qam qorinqaykikunatapis apayanqa. Tsaynö apayaptinmi kaychö ni imapis quëdanqanatsu. 7Qampita miraqkunatam wakinta Babiloniaman apayanqa. Tsayman chaykatsirmi ollqu kaqkunata capäyanqa mandakuq reypa serviqnin kayänanpaq> >>.#2Rey. 24.10-16; 2Crón. 36.10; Dan. 1.1-7.

8Tsaymi rey Ezequíasqa Isaíasta nirqan: <<Dios Yaya ninqanta allim willamashkanki>>.

Shonqullanchö yarparmi nirqan: <<Tsaynö kaptinpis kawanqäyaqqa manam ni imapis päsanqaraqtsu>>.

Currently Selected:

Isaías 39: qxn

Highlight

Copy

Compare