Isaías 28

Samaria markapaq ninqan

1¡Allaw, Samaria marka!

Alli wayuq chakrakuna janan lömachömi shäritsishqa kanki.

Tsay lömachö kuyakuypaq marka karmi Efraín runakunapa#28.1 Efraín runakunapaq parlarqa norti kaqlä Israel nacionchö täkuqkunapaqmi parlan. Tsay nacionpam capitalnin Samaria karqan. corönannö kaykanki.

Qamchö täkuqkunam vïnuta upyaykarlla qoyaskiyanpis.

Machashqa allish tukuykäyanqanchömi kuyakuypaq wayta wasaqaqnö ushakäyanqa.

2Paykunata ushakätsinanpaqmi kallpasapa y poderyuq runata Dios Yaya akrashqa.

Tsay runam runtu tamyanö, shukukuy wayranö y mayu jeqaqnö imatapis tarinqan kaqta ushakätsinqa.

3Alläpa machashqalla kakuq Efraín runakunapa corönannö Samaria marka kaptinpis tsay markatam jarutakur ushayanqa.

4Tsaymi tsay alli wayuq chakrakuna janan lömachö kaykaq markaqa kuyakuypaq karpis waytanö ushakanqa.

Punta poquq hïgusta sas pallaskir mikuqnömi tsay markata ushakätsiyanqa.

5Tsay witsaymi kawaykar quëdaqkunapa corönan llapanta mandaq Dios Yaya kanqa.

Kuyanqan runankunapam kuyakuypaq adornun kanqa.

6Demandanakuyanqanta shumaq arreglayänanpaqmi juezkunata shumaq tantiyatsinqa.

Marka täpaq soldädukunatapis valienti kayänanpaqmi mas animatsinqa.

7Peru sacerdötikunawan profëtakunam vïnuta y imayka machätsikuqkunata upyakurkur tashtapaykachaykäyan.

Tsaynö machashqa karmi Diospa willakuyninta willakuyänanpaqpis musyayannatsu.

Tsaynöpam shumaq juzgaytapis puëdiyantsu.

8Llapan mësankunaman lanzayaptinmi melanaypaq rakcha kaykan.

Paykuna kayanqanchömi llapan imaykapis taqra.

9Tsay runakunam pipis consejaptin niyan:

<<¿Pita yachatsinqaykitatan yarpanki?

¿Pï kanqäta yarpartan Diospa willakuyninta willamanki?

¿Chuchuykaq wamra kanqätaku yarpanki?

¿Tsayraq waqtsashqa wamra kanqätaku yarpanki?

10Parlapämanqaykiqa wamra parlayta yachakur <ba, be, bi, bo, bu> ninqannöllam.

Maychö tsaychöpis tsayllatam nimanki>>.

11Tsaymi tsay runakunata castigar mana tantiyayanqan idiömachö Dios Yaya parlapanqa.#28.11 Kay textuchö mana tantiyayanqan idiömapaq parlarmi Asiria runakunapa idiömanpaq parlan. Tsaymi mana tantiyayanqan idiömachö Dios Yaya parlapanqa ninanqa Asiria runakunatam Dios Yaya mandanqa Israel runakunata atacar venciyänanpaq ninan. Tsaynöllam 28.13 versïculuchöpis nin.

12Paykunatam Dios Yaya nirqan:

<<Kaychömi tranquïlu kawakuyta tariyanki.

Pishipashqa kaykaqkunapis kaychömi jamayta tariyanqa>>.

Peru tsaynö niptinpis manam cäsukuyashqatsu.#1Cor. 14.21.

13Tsaymi paykunata castigar mana tantiyayanqan idiömachö Dios Yaya parlapanqa.

Tsay parlapanqanmi kanqa <<ba, be, bi, bo, bu>> niqnölla.

Wakchö kaychöpis tsayllatam tantiyayanqa.

Tsaymi puriyta yachakuq wamranö ankallaypa ishkiyanqa.

Contrankunapa makinman chäyaptinmi achkuskir prësu apayanqa.

Jerusalén markapa autoridäninkunata castigananpaq ninqan

14Jerusalénchö pitapis mana respitaq autoridäkuna, Dios Yaya ninqanta wiyayay.

15Qamkunam niyanki:

<<Wañuywanmi willanakuyashkä.

Sepultürawanmi pactuta rurayashkä.

Llullakuymanmi tsinkakuyä.

Engañakuymanmi confiakuyä.

Tsaymi noqakunamanqa wañuypis chämunqatsu>>.#28.15 Egipto runakunawanmi Judá runakuna pactuta rurayarqan Asiria runakuna atacayaptin yanapayänanpaq. Peru Isaíasmi tantiyarqan mana yanapayänanpaq kanqanta. Tsaynöllam tantiyarqan Egipto runakunaman confiakur wañuyänanpaq kayanqanta. Tsaymi Egipto runakunawan pactuta rurayashqa ninqanpa rantin Isaías nirqan wañuywanmi pactuta rurayashqa nir.

16Poderninchö katsimaqnintsik Dios Yayam nin:

<<Siónmanmi cimientupaq alli kaq rumita churä.

Tsay rumim akrashqa kaykan.

Wajipa esquïnanchö alli maestru mana kuyuq rumim kaykan.

Pipis tsay rumiman creyikuq kaqqa manam manakaqllapaqtsu creyikunqa.#Sal. 118.22-23; Rom. 9.33; 10.11; 1Ped. 2.6.

17<<Wajita shäritsinäpaqmi#28.17 Tsay rumi jananchö wajita Dios Yaya shäritsinqanmi paypa makinchö kaway kaykan. cordelnïpis y plomädäpis kan.

Cordelnïmi allillata ruranqä.

Plomädänam pitapis mana jananpar juzganqä.

Qamkuna confiakuyanqaykim mana alli tsinkakuyänayki wajinö kaykan.

Tsaymi runtu tamya y yaku bunyaypa bunyar wajita ushakätsinqannö contraykikuna shamur ushakätsiyäshunki.

Amïguykikuna salvayäshunaykipaq confiakuyanqaykipis manakaqllapaqmi kanqa.

18<<Wañuywan pactuta rurayanqaykita y sepultürawan willanakuyanqaykitam manakaqman churashaq.

Castïgu shamurmi mangäda tamyanö ushayäshunki.

19Cada vez chämurmi qarachashqa apayäshunki.

Waran waranmi paqaspa junaqpapis tsaynö ushayäshunki.

Chämunanpaq kaqta musyaskirllam mantsakar tsuktsukyäyanki.

20Taksha kawituchö tikrakuyta mana puëdiqnömi kayanki.

Taksha jakuwan qatakuyta mana puëdiqnömi kayanki>>.#28.20 Kay textuchömi Egipto nacionta iwalatsin taksha kawituman y taksha jakuman. Tsaymi Israel runakuna Egipto runakunaman manakaqllapaq confiakuyarqan.

21Perazim lömachö pelyanqannömi Dios Yaya yapay pelyanqa.#2Sam. 5.17-21.

Gabaón pampachö rabyanqannömi yapay rabyanqa.#Jos. 10.1-11.

Mana tantiyaypaqmi runakunata castiganqa.

Runa mana tantiyanqantam ruranqa.

22Tsayta rurarmi kay nacionta jankat ushakätsinqa.

Ushakätsinanpaqmi llapanta mandaq Dios Yaya nin.

Tsaynö kaykaptinqa willakuyninta manakaqman ama churayaytsu.

Mana cäsukuq kayanqaykipitam mas peor castigayäshunki.

23Willakunqäta tantiyayänaykipaq shumaq wiyayämay.

Imata ninqätapis shumaq tantiyayämay.

24Imatapis murunapaq manam yapay yapaytsu barbichantsik.

Tsaynöllam kurpakunata mashurpis qewakunata tapsirllatsu kantsik.

25Tsaypa rantinmi inöjuta, comïnuta, trïguta, cebädata y avënatapis murunapaq kaqman sas maqtsintsik.

26Tsaynö shumaq arunapaqmi Dios Yaya yarpätsimantsik.

27Inöjutaqa manam jarutsintsiktsu.

Comïnutapis carrëtawan manam jarutsintsiktsu.

Inöjuta y comïnutaqa llanu qerullawanmi wiruntsik.

28Peru trïgutam sïqa jarutsintsik.

Jaruskatsir manam yapay yapaytsu jarutsintsik.

Carrëtawan jarutsirpis muruntaqa manam ñutunqanyaqtsu jarutsintsik.

29Llapanta mandaq Dios Yaya tantiyatsimashqam tsaynö rurantsik.

Paypa yachatsikuyninmi mantsakaypaq.

Paypa yachayninmanqa manam imapis iwalantsu.#28.28-29 Kay textuchömi tantiyatsimantsik trïguta jarutsir murunta mana ñututsinqannö kuyanqan runakunata Dios Yaya alläpa mana castigananpaq kanqanta.

Currently Selected:

Isaías 28: qxn

Highlight

Copy

Compare