Oseas 13
13
Israel runakuna castigashqa kayänanpaq ninqan
1Unayqa Efraín runakuna yätsiyanqantam Israelchö wakin trïbukuna chaskikuyaq.
Peru tsaynö kaykarpis Baal diosta adorarmi Efraín runakunaqa wañushqanöna kaykäyan.
2Jutsa ruraytaqa manam dëjayantsu.
Yuraq qellayta tsulluskatsirmi munayanqanmannö ïdulukunata ruraykätsiyan.
Tsaypitam niyan: <<Ïduluntsikpaq llapantsik sacrificiuta waykashun>>.
Tsaynö nirmi mallwa törunö ïduluta mutsakuykäyan.
3Tsaymi patsa waraskiptin pukutay y shushall illakanqannö illakäyanqa.
Tsaki oqshata wayra apanqannö y jornupita qoshni illakanqannömi illakäyanqa.#Sal. 1.4; Jer. 13.24; Sof. 2.2.
4 Dios Yayam nin:
<<Egiptuchö unay aylluykikuna kayanqanpita kananyaqmi Diosnikikuna kä.
Noqallam salvayaqnikikuna kä.
Tsaynö kaykaptïqa ama ni imamanpis <diosnï> nir creyikuyankitsu.#Éxo. 20.2; Isa. 43.11; 45.21.
5<<Unay aylluykikuna desiertuchö puriyaptinmi cuidarqä.
6Qamkunatapis pacha junta mikuyänaykipaq mikuyta qarayaptiqmi orgullösu kayanki.
Tsaymi qonqaskayämar cäsuyämankinatsu.#Deut. 8.11-17.
7Tsaynö kayanqaykipitam imayka leonnö y nänichö tigri tsinkaykur atacaqnö atacayäshayki.
8Wawankunata suwaskiyaptin ösu atacanqannömi qamkunatapis ushakätsiyäshayki.
Imayka león atacar ushaqnömi jankat ushakätsiyäshayki.
Imayka chucaru wätanömi rachikachar ushayäshayki.
9<<Israel runakuna, yanapaykäyaptiqpis conträ kayanqaykipitam ushakätsiyäshayki.
10Mandakuqnin rey kananpaqmi unay castaykikuna autoridäninkunata mañakuyarqan.#1Sam. 8.5-6.
Kananqa salvayäshunaykipaq ¡maychötan tsay rey kaykan!
Autoridänikikunapis yanapayäshunaykipaq ¡maychötan kaykäyan!
11Mandakuqnin reyta churanäpaq mañakayämaptinmi rabyashqa kaykarpis reyta churarqä.#1Sam. 10.17-24.
Peru kananqa qamkunawanpis rabyashqa karmi mandakuq reyta ushakätsishaq.#1Sam. 15.26.
12<<Qamkuna jutsata rurayanqaykim libruchö apuntashqa kaykan.
13Warmi qeshyakunanpaq nanakur tsaripukuqnömi qamkunapis alläpa ñakayanki.
Qeshyakunanpaq tsaripukuptin jatikashqa soberbiösu wamranömi kayanki.
Tsay wamra tsakakashqa kar mamanpa pachanllachö wañunqannömi wañuyanki.
14<<¿Wañuypita salvayäshaykitsuraq?
¡Manam!
¡Ä wañuy! ¡Ushakätsikuq kaynikiwan yarqamuy!
¡Ä sepultüra! ¡Mikukuq kaynikiwan shamuy!
Tsay runakunata manam llakipäshaqnatsu.#1Cor. 15.55.
15<<Israel runakuna, alläpa rïcuyar kuyakuypaq waytanö kaykaqtam ushakätsiyäshayki.
Achaq wayra desiertupita shamur yakukunata y pashtaqkunata tsakitsinqannömi qamkunatapis ushakätsiyäshayki.
Contraykikuna shamurmi riquëzaykikunatawan alhäjaykikunatapis qechuskiyäshurniki apakuyanqa.
16 16 (14.1) Samaria markam ushakanqa.
Conträ kayanqaykipitam espädawan wañutsiyäshunki.
Tsurikikunatapis patsachö tsapikacharmi wañutsiyanqa.
Qeshyaq warmikunapa pachankunatapis qasharmi ushayanqa>>.
Currently Selected:
Oseas 13: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
