Habacuc 1
1
1Kaychömi profëta Habacucta Dios Yaya revelanqan qellqashqa kaykan.
Habacuc llakikur mañakunqan
2 Dios Yaya, llapan shonqüwan mañakamuptïpis ¡imayyaqraq wiyamankitsu!
Tsayläya mañakamuptïpis ¡imayraq mana alli runakunapa poderninpita librayämanki!#Sal. 13.1-2; 73.4-14; Jer. 12.1-4; Apoc. 6.10.
3¡Imayyaqraq mana allikunata rurayanqanta rikäshaq!
Kaychömi wañutsinakuywan ushakätsinakuylla kaykan.
Maytsaychöpis piñanakuywan chikinakuyllam kaykan.
4Tsaynö karmi leykunata cäsuyantsu.
Defendikuyta mana puëdiqkunatam allqutsäkuyan.
Munanqaykinö kawaqkunatam alläpa chikiyan.
Juezkunapis manam leykuna ninqannötsu justiciata rurayan.
Habacuc mañakunqanta Dios Yaya contestanqan
5Dios Yayam nirqan:
<<Wakin kaq nacionkunata ima päsanqanta tantiyakur alläpa mantsakäyay.
Alläpa mantsakaypaq kaqkunata ruranäpaqnam kaykä.
Imanö ruranäpaq kanqanta willayäshuptikipis manam creyiyankitsu.#Hech. 13.41.
6Noqam animaykätsï Babilonia#1.6 Hebreo idiömachömi Caldea nin. Caldeaqa Babiloniapa jukaq shutinmi. mana alli runakuna guërrata rurayänanpaq.#2Rey. 24.2.
Paykunam maytsaypa aywar runakunapa wajinkunata y chakrankunata qechur puriykäyan.
7Alläpa mantsaypaq mana allim kayan.
Juklä nacionkunaman chaykurpis tsay nacionpa leyninkunata mana cäsurmi kikinkunapa leyninkunallata välitsiyan.
8<<Paykunapa bestiankunam tigripitapis mas cörriyan.
Paqaspa puriq mantsaypaq löbupitapis masmi mantsaypaq kayan.
Bestiankuna montashqam yupaytapis mana puëdiypaq puriyan.
Imayka pitsak karupita chipshaman aywaqnömi guërramanpis karupita aywayan.
9Tinkuyanqan kaqtaqa pïmaytapis jankatmi ushakätsiyan.
Mayman chäyaptinpis runakuna alläpam mantsakäyan.
Prësu achkuyanqan runakunam lamar kuchunchö arenïllanöraq kayan.
10<<Nacionchö mandakuq reykunata y autoridäkunatapis asiparnin burlakurmi manakaqman churayan.
Markachö runakuna tsinkakuyänanpaq rurayanqan murällakunata rikarmi asikuyan.
Murällakuna waqtanman allpakunata montunaskirmi tsay markakunaman atacaqnin yaykuyan.
11Imayka apäkuy wayra imaykatapis ushakätsinqannömi pïmaytapis ushakätsiyan.
Dios Yayaman confiakuyanqanpa rantinmi kikinkunapa kallpankunallaman confiakuyan>>.
Dios Yayata Habacuc yapay mañakunqan
12Dios Yayatam yapay Habacuc nirqan:
<<Dios Yaya, imaypitapis kawaq santu Diosmi kanki.
Imaypis mana ushakaqmi kanki.
Tsapämaqnï qaqam kanki.
Kikiki yanapaptikim Babilonia runakunapis castigayämänanpaq shayämunqa.
13Tsaynö kaptinpis jutsa ruraq runakunata manam rikaytapis munankitsu.
Jutsasapa runakunata imaypis manam chaskinkitsu.
Tsaynö kaykarqa ¿imanirtan tsay mana alli ruraq runakunata ushakätsinkitsu?
¿Imanirtan tsay jutsasapakuna jutsannaq runakunata wañutsiyaptin upällalla kanki?#Sal. 5.4-6.
14¿Imanirtan permïtinki lamarchö pescäduta atarräyawan achkuskir apaqnö runakunata apayänanpaq?
¿Imanirtan pipis mana cäsushqa arashtanö wañutsiyänanpaq permïtinki?
15<<Anzuëluwan y atarräyawan karpis atska pescäduta achkuqnömi maytsay nacionpita runakunata wañutsir alläpa kushikuyan. 16Mikunanpaq maytsika kaptin pescaq runa atarräyankunata y anzuëlunta adorar sacrificiukunata waykanqannömi armankunata adorar kallpasapa kayanqanta aläbakuyan. 17¿Tsaynöllatsuraq wañutsir sïguiyanqa? ¿Tsaynöllatsuraq nacionkunata mana llakipaypa ushakätsiyanqa?>>
Currently Selected:
Habacuc 1: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
