Daniel 1

Amïgunkunawan Babiloniachö Daniel kanqan

1Judá nacionchö kimsa watana Joacim rey kaykaptinmi Babilonia nacionpa mandakuqnin rey Nabucodonosor soldädunkunawan Jerusalénman chaykur tumat tsapaskiyarqan. 2Dios Yayam permïtirqan rey Joacimta Nabucodonosor prësu apananpaq y Diospa templunchö wakin kaq manëjukunatapis apananpaq. Tsaykunatam Babiloniaman apaykur diosninkunapa templunchö kaq almacén cuartuman churarqan.#2Rey. 24.1; 2Crón. 36.6-7.

3Tsaypitanam eunucukunapa mandakuqnin Aspenazta Nabucodonosor mandarqan prësu apayämunqan wakin Israel jövinkunata palaciuman pushananpaq. Wakin jövinkunaqa reypa castankunam kayarqan y wakinnam Israelchö rïcu runakunapa castan kayarqan.#2Rey. 20.18; 24.10-16; Isa. 39.7. 4Tsay akrayanqan jövinkunam kayarqan sänu, kuyakuypaq, yachayyuq, yachatsiyaptin sas yachakuq y alli yachaq. Tsaymi paykuna alli kayarqan reypa palaciunchö serviyänanpaq, Babilonia#1.4 Hebreo idiömachömi Caldea nin. Caldeaqa Babiloniapa jukaq shutinmi. runakuna qellqayanqankunata estudiayänanpaq y parlayanqan idiömata yachakuyänanpaq.

5Rey Nabucodonosormi ordenarqan palaciuchö kusinayanqan mikuykunata tsay jövinkuna waran waran mikuyänanpaq y vïnuta upyayänanpaq. Tsaynöllam ordenarqan kimsa wata shumaq yachakuskir palaciuchö payta serviyänanpaq.

6Tsay akranqan jövinkunachömi Judá nacionpita Daniel, Ananías, Misael y Azarías kayarqan. 7Paykunapa shutinkunatam Aspenaz cambiatsir churarqan Danielpa shutinta Beltsasarta, Ananíaspa shutinta Sadracta, Misaelpa shutinta Mesacta y Azaríaspa shutintana Abed-neguta.

8Danielmi impüru kayta mana munar yarpachakurqan reypa mikuyninta mana mikunanpaq y vïnuntapis mana upyananpaq. Tsaymi Aspenazta rugakurqan tsay mikuykunata mana qarananpaq. 9Dios Yaya yanapaptinmi Danielqa Aspenazwan mas alli confianza kayarqan. 10Tsaynö rugaptinmi Aspenaz nirqan: <<Peru reypitam mantsakü. Paymi nimashqa qamkunata alli mikuyta y alli vïnuta qarayänaqpaq. Wakin kaq jövinkuna werayaqta rikarmi qam uyuqta rikar wañutsimanqa>>.

11Tsaynam cuidaqnin runatana Daniel rugakurqan. Tsay runatam mandaq Aspenaz churarqan Danielta, Ananíasta, Misaelta y Azaríasta cuidananpaq. Rugakurmi Daniel nirqan: 12<<Taytay, rugakuyälläshayki. Verdürallata y yakullata chunka junaq qaraykayämay. 13Tsay chunka junaq päsaskiptin reypa mikuyninta mikuq jövinkunaman iwalatsiyämanki imanö kaykäyanqäta rikäyämänaykipaq. Paykunapita mas alli kayaptïqa mañakuyanqaqnölla qaraykayämanki>>.

14Tsaymi cuidaqnin runa äniskir mañakuyanqannölla chunka junaq qararqan. 15Chunka junaq cumpliskiptinnam rey alistapanqan mikuykunata mikuqkunapitapis mas sänu y allish chölu kayarqan. 16Tsaymi jövinkunata cuidaq runaqa reypa mikuyninta y vïnunta tsay jövinkunata qararqannatsu. Tsaypa rantinmi verdürallatana qararqan.

17Tsay chuskun jövinkunata Dios Yaya yachayta qararmi Babilonia runakuna qellqayanqan röllukunata liyiyänanpaq y yachatsiyanqankunata alli yachakuyänanpaq yanaparqan. Tsaynöllam Danielta yanaparqan pipis revelación chaskinqanta tantiyananpaq y runakuna imapaq sueñuyanqantapis musyananpaq.

18Rey Nabucodonosor ninqannölla kimsa wata yachaskatsirmi reypa puntanman tsay jövinkunata Aspenaz pusharqan. 19Danielwan, Ananíaswan, Misaelwan y Azaríaswan parlaskirnam rey tantiyarqan llapan jövinkunapitapis mas yachayyuq kayanqanta. Tsaymi yanapaqnin kayänanpaq paykunata churarqan. 20Mayjina aja kaqkunata rey tapuptinmi maytsaychö brüjukunapita y suerti qatiqkunapita chunka kuti mas tantiyayarqan. 21Tsaynöpam Daniel Babiloniachö täkurqan rey Ciro punta kaq wata mandakunqan witsayyaq.

Currently Selected:

Daniel 1: qxn

Highlight

Copy

Compare